Read Samoan Old Version Bible – O LE TUSI PAIA ESOTO 11 Bible Online

ESOTO 11 - Samoan Old Version Bible – O LE TUSI PAIA bible

ESOTO 11

¹Ona fetalai mai lea o Ieova ia Mose, E toe tasi le mala ou te faaooina atu i luga o Farao, i luga foi i Aikupito, e mulimuli ane e tuuina mai e ia o outou e o ese i lenei mea; a oo ina tuuina mai e ia, e matuā tutuli ese lava o ia ia te outou i lenei mea.

²Ia e fai atu i le nuu ia latou lagona, Ia taitasi ma ole atu o le tane i lē la te tuaoi, ma le fafine i lē la te tuaoi i mea ario ma mea auro.

³Ua faatupuina e Ieova le alofa o Aikupito i le nuu. O lenei tagata o Mose, na sili ona mamalu lava o ia i le nuu o Aikupito, i le manatu o auauna a Farao, ma le manatu o le nuu.

⁴Ona fai atu lea o Mose, O loo faapea ona fetalai mai o Ieova, A lata i le tulua o po ma ao, ona ou alu atu lea i totonu o Aikupito,

⁵ona oti ai lea o ulumatua uma lava i le nuu o Aikupito, e afua i le ulumatua a Farao, o lē tietie i lona nofoālii, e oo lava i le ulumatua a le auauna fafine o loo i tua o le maaolo, atoa ma ulumatua uma lava a manu.

⁶Ona fai ai lea o le auega tele i le nuu atoa uma o Aikupito, e lei faapea anamua, e le toe faapea lava.

⁷A o le fanauga uma lava a Isaraelu, e leai se ulī e faagaoioi lona laulaufaiva i se tagata po o se manu; ina ia outou iloa ua faailogaina e Ieova ia Aikupito ma Isaraelu.

⁸E o ifo foi o au nei auauna uma lava ia te au, latou te ifo ia te au, e faapea mai, Ina alu ia oe ma le nuu uma lava o loo mulimuli ia te oe; a mavae nei mea, ona ou alu ai lea. Ona alu lea o ia nai luma o Farao, ua ita tele.

⁹Ua fetalai mai foi Ieova ia Mose, E le faalogo Farao ia te oulua, ina ia faatele ai o‘u vavega i le nuu o Aikupito.

¹⁰Na faia foi e Mose ma Arona o ia vavega uma i luma o Farao, a ua faamaaa e Ieova le loto o Farao, e lei tuuina mai e ia o le fanauga a Isaraelu e o ese i lona nuu.