Read Samoan Old Version Bible – O LE TUSI PAIA ESOTO 12 Bible Online

ESOTO 12 - Samoan Old Version Bible – O LE TUSI PAIA bible

ESOTO 12

¹Ona fetalai mai lea o Ieova ia Mose ma Arona i le nuu o Aikupito, o loo faapea mai,

²E avea lenei masina ia te outou ma uluai masina, o le masina muamua lava lea ia te outou i le tausaga.

³Ia oulua fai atu i le faapotopotoga uma o Isaraelu, ia faapea atu, O le aso e sefulu o lenei masina ia taitasi ai i latou ma lana tamai mamoe i aiga o latou tamā, o le aiga ma le tamai mamoe.

⁴Pe afai foi e toaitiiti le aiga, e le mafai ona uma sa latou tamai mamoe, ona la faatasi ai lea ma le ua tuaoi o la aiga, e tusa ma le faitau aofai o tagata; ia faatatau le tamai mamoe ma tagata latou te aai ai.

⁵Ia sao ona lelei la outou tamai mamoe, o le poa, e tasi lona tausaga, tou te au mai ai i le lafu mamoe, po o le lafu ‘oti.

⁶Tou te tausi i ai seia oo atu i le aso e sefulu ma le fa o lenei masina; ona fasi ai lea e le faapotopotoga atoa uma o Isaraelu i le afiafi.

⁷Ia latou ave foi nisi toto, ma avatu i pou e lua o le faitotoa ma ona faalava i luga i o latou fale latou te aai ai.

⁸Latou te aai foi le tino i lea lava po, ua tunu i le afi, atoa foi ma areto e le faafefeteina, ma laau oona latou te ina‘i a‘i.

⁹Aua tou te aai ai e faalevela po o tunua i le vai, a ia tunua lava i le afi, o lona ulu, ma ona vae, ma ona tōtōga.

¹⁰Aua foi ne‘i ai se mea e toe, e oo i le taeao; a o se mea e toe, e oo i le taeao, ia susunu lava ia i le afi.

¹¹Ia faapea foi ona outou aai ai, o outou sulugatiti ia fusia, ma o outou see i o outou vae, ma o outou tootoo i o outou lima, tou te aai ai faataalise; o le paseka lava lea ia Ieova.

¹²Auā o le po nanei, ou te ui ane ai i le nuu o Aikupito, ma ou taia ulumatua uma lava i le nuu o Aikupito, o tagata atoa ma manu; ou te faasala foi i atua uma lava o Aikupito; o a‘u lava o Ieova.

¹³E fai foi le toto ma faailoga ia te outou i fale tou te i ai, ou te vaai atu foi i le toto, ona ou sosopo ai lea ia te outou; e le oo foi ia te outou le mala e fano ai, pe a ou taia le nuu o Aikupito.

¹⁴E fai foi lenei aso ma faamanatuga ia te outou, tou te fai ai foi le tausamiga ia Ieova; e faia i a outou tupulaga amuli le tausamiga, o le tulafono e faavavau.

¹⁵E fitu aso tou le aai ai areto e le faafefeteina; o le aso muamua lava tou te ave ese ai mea e faafefete a‘i i o outou fale; auā ai se ‘ai le areto ua faafefeteina e afua i le aso muamua e oo i le aso fitu, e vavaeeseina lea tagata i Isaraelu.

¹⁶Tou te faia foi le faapotopotoga paia i le aso muamua, ma le faapotopotoga paia i le aso fitu; aua le fai ai se galuega e tasi, tau lava o mea e ‘ai a tagata uma, na o lea tou te faia.

¹⁷Ia outou tausi foi i le tausamiga o areto e le faafefeteina, auā o lenei lava aso ua ou au mai ai a outou ‘au nai le nuu o Aikupito, o le mea lea tou te tausi ai lenei aso i a outou tupulaga amuli, o le tulafono lea e faavavau.

¹⁸O le uluai masina, o le aso e sefulu ma le fa o le masina, o le afiafi, tou te aai ai areto e le faafefeteina, seia oo i le afiafi o le aso i luafulu ma le tasi o le masina.

¹⁹O ona aso ia e fitu aua ne‘i iloa ai i o outou fale se mea e faafefete a‘i; auā ai se ‘ai le areto e faafefeteina, e vavaeeseina lea tagata nai le faapotopotoga o Isaraelu, o le tagata ese atoa ma le tama a le eleele.

²⁰Aua ne‘i outou aai sina areto e faafefeteina; ia outou aai areto e le faafefeteina i mea uma tou te nonofo ai.

²¹Ona aami lea e Mose le au toeaina uma o Isaraelu, ma na fai atu ia te i latou, Ia outou pupue ma ave mamoe mo outou aiga, ona outou fasi ai lea o le paseka.

²²Tou te ave foi se fusi isopo, ma fufui i le toto ua i le ipu, ma ta a‘i le laau faalava i luga ma pou e lua o le faitotoa i le toto i le ipu; aua foi ne‘i ai so outou e ulufafo atu i le faitotoa o lona fale seia oo i le taeao.

²³A afio ane foi Ieova na te fasia Aikupito, pe a silafia e ia le toto i le laau faalava i luga ma pou e lua o le faitotoa, ona sosopo ane lea o Ieova i lea faitotoa, na te le tuuina atu le na te fasiotia e ulu atu i o outou fale e fasi ia te outou.

²⁴Tou te tausia foi lenei mea, o le tulafono ia te oe atoa ma au fanau e faavavau lava.

²⁵A outou oo atu i le nuu e foaiina mai e Ieova ia te outou, faapei ona ia fetalaia mai, ona outou tausia lava lea lenei sauniga.

²⁶Pe a fai mai foi a outou fanau ia te outou, O le a ea le uiga ia te outou o lenei sauniga?

²⁷Ona outou tali atu ai lea, O le taulaga o le paseka lenei ia Ieova, o le na sosopo ane i fale o le fanauga a Isaraelu i Aikupito, ina ua fasia e ia o Aikupito, a ua faasao mai e ia i o tatou aiga. Ona punonou lea o le nuu, ma ifo.

²⁸Ona o atu lea o le fanauga a Isaraelu, ma latou faia e pei ona poloai Ieova ia Mose ma Arona; sa faapea lava ona latou faia.

²⁹Ua oo i le tulua o po ma ao, ona fasi ai lea e Ieova o ulumatua uma lava i le nuu o Aikupito, o le ulumatua Farao, o le na tietie i le nofoālii, atoa ma le ulumatua a le ua faatagataotauaina i le fale puipui, atoa uma ma ulumatua a manu.

³⁰Ona tulai lea o Farao i le po, o ia ma ana auauna uma lava, atoa ma Aikupito uma, sa tele foi le tagiaue i Aikupito; auā sa leai lava se fale e aunoa ma le oti.

³¹Ona ia aami atu lea ia Mose ma Arona i le po, ua ia fai atu i ai, Ina tutū ia, o ese atu ia i lo‘u nuu, oulua atoa ma le fanauga a Isaraelu, o atu ia outou, ma auauna ia Ieova, faapei ona oulua fai mai na.

³²Ia ave foi o outou lafu mamoe ma o outou lafu povi, pei ona oulua fai mai na, ma ia outou o; ia oulua faamanuia mai foi ia te au lava.

³³Ua nanati foi Aikupito i le nuu ina ia vave ona tuuina atu i latou e o ese i le nuu; auā ua latou faapea ane, O le a uma lava i tatou i le oti.

³⁴Ona ave ai lea e le nuu o a latou palugāfalaoa, a o lei faafefeteina, atoa ma a latou mea e palu ai falaoa ua afifi i o latou ofu i luga i o latou ua.

³⁵Ua fai foi e le fanauga a Isaraelu faapei ona fai mai ai Mose, ua latou fai atu ia Aikupito i mea ario, ma mea auro, atoa ma ofu.

³⁶Ua faatupuina e Ieova le alofa o Aikupito i le nuu; ua latou aumaia mea na fai atu ai; ua latou faamatitivaina ai Aikupito.

³⁷Ona ō malaga lea o le fanauga a Isaraelu nai Ramese i Sukota, pe atoa le ono galau o afe o tagata malolosi o savavali, e lei faitaulia tama.

³⁸Ua o ae foi faatasi ma i latou tagata ese e toatele, atoa ma lafu mamoe ma povi, o mea e tele lava.

³⁹Ua latou tunu foi le palugāfalaoa na latou aumaia nai Aikupito, o potoi areto e le faafefeteina; auā e lei faafefeteina, auā na tulia i latou nai Aikupito, e le mafai ona faatuatuai, e lei saunia foi sa latou oso.

⁴⁰O ona po foi sa nonofo ai le fanauga a Isaraelu i Aikupito, ua fa galau ma le tolugafulu o tausaga.

⁴¹Ua oo ina ua atoa o tausaga e fa galau ma le tolugafulu, o lea lava aso, na o ese atu ai o ‘au uma lava a Ieova nai le nuu o Aikupito.

⁴²O le po lava lea e tausiusia mo Ieova, ina ua na au mai ai i latou nai le nuu o Aikupito; o le po lava lenei e tausiusia mo Ieova e le fanauga uma lava a Isaraelu i o latou tupulaga amuli.

⁴³Ua fetalai mai foi Ieova ia Mose ma Arona, O le tulafono lenei i le paseka; aua le a‘i ai se tagata ese.

⁴⁴A o auauna uma lava a tagata ua faatauina i tupe pe a peritomeina so latou, ona ‘ai ai lava lea o ia.

⁴⁵O lē āumau ma lē galue i le totogi, aua ne‘i aai ai.

⁴⁶E tasi le fale e aai ai, aua ne‘i ave i fafo sina tufaaga nai le fale; aua foi ne‘i outou gagau sona ivi.

⁴⁷E fai lava lenei mea e le faapotopotoga atoa uma o Isaraelu.

⁴⁸Pe afai foi e āumau ia te oe se tagata ese, a manao ia e fai le paseka ia Ieova, ia peritomeina o tane uma lava ua ia te ia, ona faalatalata ane lea o ia e fai ai; e tusa foi o ia ma tama a le eleele; a e aua ne‘i ‘ai se tasi e le peritomeina.

⁴⁹E tasi le tulafono mo le tama a le eleele, ma le tagata ese na te āumau ia te outou.

⁵⁰Ona fai lea e le fanauga uma lava a Isaraelu faapei ona poloai mai ai Ieova ia Mose ma Arona, ua faapea ona latou faia.

⁵¹O lea lava aso na au mai ai e Ieova o le fanauga a Isaraelu nai le nuu o Aikupito i a latou lava ‘au.