Read Samoan Old Version Bible – O LE TUSI PAIA ESOTO 14 Bible Online

ESOTO 14 - Samoan Old Version Bible – O LE TUSI PAIA bible

ESOTO 14

¹Ua fetalai mai foi Ieova ia Mose, o loo faapea mai,

²Ia e fai atu i le fanauga a Isaraelu, ia latou liliu ane ma to lauapi e feagai ma Peairota, i le va o Mekatala ma le sami, e feagai ma Paalasefona, tou te to lauapi i ona luma e lata ane i le sami.

³A e fai ane Farao i le fanauga a Isaraelu, Ua fememeai i latou i le nuu, ua punitia i latou i le vao.

⁴Ou te faamaaa le loto o Farao, na te tuliloa mai ai ia i latou, e fai ai so‘u viiga ia Farao atoa ma lana itu taua uma lava; ona iloa ai lea e Aikupito, o a‘u nei lava o Ieova. Ua faapea lava ona latou faia.

⁵Ona ta‘uina atu lea i le tupu o Aikupito, ua sosola le nuu; ona toe liliuina lea o le loto o Farao, ma ana auauna i le nuu; ua latou fai ane foi, Se a le mea ua tatou fai ai lenei mea, ina ua tatou tuuina atu o Isaraelu e ō, ia le auauna mai ia i tatou?

⁶Ona sauni lea o lona kariota, ua latou o ma lona nuu.

⁷Ua ia ave foi kariota ua sili ona lelei, e ono selau, ma kariota uma lava o Aikupito, e taitasi ma ona tagata totoa.

⁸Ua faamaaa e Ieova le loto o Farao le tupu o Aikupito, ua ia tuliloa mai le fanauga a Isaraelu; ua o atu foi le fanauga a Isaraelu ma le lima malosi.

⁹A ua tuliloa mai Aikupito ia i latou, ua latou maua mai foi i latou, o loo to lauapi e lata ane i le sami, (o solofanua uma ma kariota o Farao, ma ana ‘au e tietie i solofanua, ma lana itu taua,) e lata ane i Peairota, e feagai ma Paalasefona.

¹⁰Ua faalatalata i ai Farao, ona tepa ae lea o le fanauga a Isaraelu, faauta, o Aikupito o loo mulimuli mai ia i latou; ona latou matuā matatau ai lea, ua alalaga foi le fanauga a Isaraelu ia Ieova.

¹¹Ua latou fai mai foi ia Mose, Ona ua leai ea ni tuugamau i Aikupito, na e aumaia ai i matou ina ia matou oti i le vao? Se a le mea na e fai ai lenei mea ia i matou, ina ua e aumaia i matou nai Aikupito?

¹²E le o le mea ea lenei na matou fai atu ai ia te oe i Aikupito, o loo faapea atu, Ia e tuu pea ia i matou, ina ia matou auauna ia Aikupito; auā e lelei ana matou auauna ia Aikupito, a e leaga ona matou oti i le vao.

¹³Ona tali atu lea o Mose i le nuu, Aua tou te fefefe, a ia outou laulau tutū ma vāai atu i le olataga mai ia Ieova, o le a faia e ia mo outou i le aso nei; auā o Aikupito ia tou te vāai atu i ai i le aso nei, tou te le toe iloa lava i latou e faavavau.

¹⁴O le a tau Ieova mo outou, a e faalologo outou.

¹⁵Ona fetalai mai lea o Ieova ia Mose, Se a le mea ua e alaga mai ai ia te au? Fai atu i le fanauga a Isaraelu,

¹⁶ia latou o atu pea ia; a o oe, ia e sii i luga lou tootoo, ma faaloaloa lou lima i luga o le sami, ma e vaeluaina ai; e o atu ai le fanauga a Isaraelu i totonu o le sami, i le iliti tai matutu.

¹⁷O a‘u foi, faauta, ou te faamaaaina loto o Aikupito, latou te mulimuli atu foi ia te i latou, e viia foi a‘u ona o Farao, ma lana itu taua uma lava, ma ona kariota, atoa ma ana ‘au e tietie i solofanua.

¹⁸Ona iloa lea e Aikupito, o a‘u lava o Ieova, pe a viia a‘u ona o Farao, ma ona kariota, atoa ma ana ‘au e tietie i solofanua.

¹⁹Ona alu ane lea o le agelu a le Atua, o le na muamua atu i ‘au a Isaraelu, ua alu ane, ua mulimuli atu ia te i latou; o le ao faaniutu foi ua alu ane nai o latou luma, ua tu i o latou tua.

²⁰Ua ia ui ane foi i le va o ‘au a Aikupito ma ‘au a Isaraelu, ua fai ma ao ma le pouliuli i tua, a o le malamalama i le po i luma; o le mea lea na le faalatalata ai le tasi i le tasi i lea po atoa.

²¹Ona faaloaloa lea e Mose o lona lima i luga o le sami, ona faatafeeseina lea e Ieova o le sami i le matagi tele mai sasae i lea po atoa; ua ia faia foi le sami ma eleele matutu, ua vaeluaina lava le sami.

²²Ona ui atu lea o le fanauga a Isaraelu i totonu o le sami i le iliti tai matutu; ua fai foi le sami ma aupa ia te i latou i lo latou itu taumatau, ma lo latou itu tauagavale.

²³Ona tuliloa mai lea o Aikupito, ua mulimuli mai ia te i latou i totonu o le sami o solofanua uma lava a Farao, ma ona kariota, ma ana ‘au e tietie i solofanua.

²⁴Ona oo lea i le leoleoga o le taeao, ua silasila ifo Ieova i ‘au a Aikupito nai le afi ma le ao faaniutu, ua ia faaatuatuvaleina ‘au a Aikupito.

²⁵Ua ia tuu ese foi o mea e taavalevale a‘i o latou kariota, ona toso gata ai lea; ona fai ane lea o Aikupito, Ina tatou sosola ese ia ia Isaraelu; auā o Ieova o loo tau ma Aikupito mo i latou.

²⁶Ona fetalai mai lea o Ieova ia Mose, Ina faaloaloa ia lou lima i luga o le sami, e foi atu ai lona suāsami i luga o Aikupito, i luga o ona kariota, ma ana ‘au e tietie i solofanua.

²⁷Ona faaloaloa lea e Mose o lona lima i luga o le sami, ona foi atu lea o le sami i le vave ao i lona tūga tuai; ua sola ese ai Aikupito i lona fetaiaiga; a ua lafoina e Ieova o Aikupito i totonu o le sami.

²⁸Ua foi le suāsami, ua ufitia ai kariota, ma ‘au na tietie i solofanua, o le itu taua atoa uma a Farao, e na mulimuli atu ia te i latou i le sami; e leai se tasi na toe o i latou.

²⁹A o le fanauga a Isaraelu, na latou savavali i le iliti tai matutu i totonu o le sami; ua fai foi le suāsami ma aupa ia te i latou i lo latou itu taumatau ma lo latou itu tauagavale.

³⁰Sa faaola e Ieova i lea aso ia Isaraelu nai lima o Aikupito; ua iloa foi e Isaraelu tagata Aikupito i le matafaga, ua oti.

³¹Ua iloa foi e Isaraelu le vavega na faia e Ieova ia Aikupito, ona matatau lea o le nuu ia Ieova; ua latou faatuatua foi ia Ieova, atoa ma lana auauna o Mose.