Read Samoan Old Version Bible – O LE TUSI PAIA ESOTO 15 Bible Online

ESOTO 15 - Samoan Old Version Bible – O LE TUSI PAIA bible

ESOTO 15

¹Ona pepese ai lea o Mose ma le fanauga a Isaraelu i lenei pese ia Ieova, ua latou fai ane, o loo faapea, Ou te pese ia Ieova, auā ua matuā manumalo o ia; o le solofanua atoa ma le na tietie ai, ua ia lafoina i le sami.

²O Ioa, o lo‘u malosi ia, ma la‘u pese, ua fai foi o ia mo‘u olataga; o lo‘u Atua lenei, ou te faaneenee i ai; o le Atua o lo‘u tamā, ou te vivii lava ia te ia.

³O Ieova, o le toa lava ia, o Ieova o lona suafa lea.

⁴O kariota o Farao ma lana itu taua ua ia lafoina i le sami; o ona toa silisili foi ua gogoto i le sami Ulaula.

⁵O le moana ua ufitia ai i latou, ua latou o ifo i le mea loloto pei o se maa.

⁶Ieova e, ua mamalu lou aao taumatau i le malosi; Ieova e, o lou aao taumatau ua nutipalaina ai le ua ita mai.

⁷O le tele o lou malosi ua e lepetia ai e na tulai mai ia te oe; ua e tuuina atu loa toasa, ua ‘aina ai i latou pei o le tagutugutu o saito.

⁸O le savili foi mai lou fofoga ua faupue ai le sami; na tulai ona tafe pei o se mea mautietie, na to‘a le moana i totonu lava o le sami.

⁹Sa faapea ane le na ita mai, Ou te tuliloaina, ou te maua atu; ou te tufatufa le vete, e mălie ai lava lo‘u loto; ou te to ae la‘u pelu, e fasiotia i latou i lo‘u lima.

¹⁰Na e faaagi mai lou matagi, ona ufitia ai lea o i latou i le sami; ua gogoto i latou pei o le palu i le moana sausau.

¹¹Ieova e, o ai ea se ua tusa ma oe i le vao o atua? O ai se ua tusa ma oe, o lē silisili ona paia, o lē matautia i viiga, o lē fai vavega?

¹²Na e faaloaloa lou aao taumatau, na foloina i latou e le eleele.

¹³O lou alofa ua e ta‘ita‘iina mai ai lenei nuu, ua e togiolaina ai lava; o lou malosi ua e ta‘ita‘iina ai i latou i lou afioaga paia.

¹⁴E faalogologo i ai le vao o nuu, e gatete ai; o e nonofo i Filisitia e maua i latou i le tiga.

¹⁵Ona atuatuvale lea o matai o Etoma; o alii o Moapi e maua i latou i le gatete; e faavaivaia lava o i latou uma ua nonofo i Kanana.

¹⁶E oo ia i latou le fefe tele lava ma le mata‘u; o lou aao malosi e le gaoioi ai i latou, pei o le maa; seia o ane lou nuu, Ieova e, seia o ane lenei nuu ua e faatauina.

¹⁷E te faaoo atu, ma e totōina i latou i le mauga o lou tofi, Ieova e, o le mea ua e saunia, e te afio ai; o le mea paia, le Alii e, ua e faatumauina i ou aao.

¹⁸E fai Ieova ma tupu e faavavau faavavau lava.

¹⁹Auā na alu le solofanua a Farao, ma ona kariota, ma ana ‘au e tietie i solofanua i le sami, ona faafoisia lea e Ieova o le suāsami i luga ia i latou; a o le fanauga a Isaraelu na savavali i latou i le iliti tai matutu i totonu o le sami.

²⁰O Miriama, o le perofeta fafine, o le tuafafine o Arona ua ave e ia le topa i lona lima, ua o atu foi fafine uma lava ua mulimuli atu ia te ia ma topa ma siva.

²¹Ua fai atu Miriama ia te i latou, Ia outou pepese ia Ieova, auā ua matuā manumalo o ia; o le solofanua ma le na tietie ai, ua ia lafoina i le sami.

²²Ona tuua lea e Mose ma Isaraelu le sami Ulaula, ua latou oo atu i le vao o Sura; ua aso tolu la latou malaga i le vao, a e lei maua se vai.

²³Ua latou oo foi i Mara; a e lei mafai ona latou inu i le vai i Mara, auā ua oona; o le mea lea na igoa ai lea mea o Mara.

²⁴Ona muimui ai lea o le nuu ia Mose, o loo fai mai, Se a se mea a matou inu ai?

²⁵Ona ia alaga atu lea ia Ieova, ona faaali lea e Ieova ia te ia o le laau; ua na lafoina i le vai, ona magalo ai lea o le vai; ua ia tuuina atu i lea mea o le tulafono ma le faamasinoga ia te i latou, ua ia tofotofo foi ia te i latou i lea lava mea.

²⁶Ua ia fetalai mai foi, Afai e te matuā faalogo i le leo o Ieova lou Atua, ma e fai le amio tonu i ona luma, ma e uai mai ou taliga i ana poloaiga, ma e tausi i ana sauniga uma lava, ou te le tuuina atu ia te oe se tasi o ia ma‘i na ou tuuina atu ia Aikupito; auā o a‘u o Ieova, o le na te faamaloloina oe.

²⁷Ona latou oo lea i Ailima, ua i ai vaipuna e sefulu ma le lua, ma pama e fitugafulu; ua latou to lauapi e lata ane i le atuvai.