Read Samoan Old Version Bible – O LE TUSI PAIA ESOTO 16 Bible Online

ESOTO 16 - Samoan Old Version Bible – O LE TUSI PAIA bible

ESOTO 16

¹Ona latou o lea nai Ailima, ua oo foi le faapotopotoga atoa uma o le fanauga a Isaraelu i le vao o Sina, o i le va o Ailima ma Sinai, i le aso e tasi le sefulu ma le lima o lona lua o masina talu ona latou tuua le nuu o Aikupito.

²Ona muimui lea o le faapotopotoga atoa uma o le fanauga a Isaraelu ia Mose ma Arona i le vao.

³Ua fai atu foi le fanauga a Isaraelu ia te i laua, E! ana oti i matou i le aao o Ieova i le nuu o Aikupito, a o matou nonofo latalata i ulo e tunu ai tufaaga, na matou aai foi le mea e ‘ai ma maoona ai; auā ua oulua aumai i matou i lenei vao ina ia fasiotia lenei faapotopotoga atoa uma i le fia‘ai.

⁴Ona fetalai mai lea o Ieova ia Mose, Faauta, ou te faatotōina ifo le mea e ‘ai mai le lagi mā outou, e o atu foi le nuu ma latou faaputuina, o le aso ma ana mea e tusa ai; ina ia ou tofotofo ai ia te i latou, pe latou te savavali i la‘u tulafono pe leai.

⁵A oo foi i le aso ono, latou te sauni le mea e au mai ai, e tailua mea i mea e faaputu ai i lea aso ma lea aso.

⁶Ona fai atu lea o Mose ma Arona i le fanauga uma a Isaraelu, A afiafi tou te iloa ai, o Ieova lava na aumaia outou nai le nuu o Aikupito.

⁷A taeao foi, tou te vaai atu i le pupula o Ieova, ina ua faafofoga o ia i lo outou muimui ia Ieova; o ai ea foi i maua nei, tou te muimui mai ai ia te i maua?

⁸Ua fai atu foi Mose, A afiafi e foai mai ai e Ieova ia te outou o manu tou te aai ai, o le taeao foi e foai mai ai le mea e ‘ai tou te maoona ai lava; ina ua faafofogaina e Ieova lo outou muimui tou te muimui ai ia te ia; auā o ai ea i maua nei? E le o i maua, a o Ieova tou te muimui i ai.

⁹Ua fai ane foi Mose ia Arona, Ia e fai atu i le faapotopotoga atoa uma o le fanauga a Isaraelu, Ia outou faalatalata mai i luma o Ieova, auā ua ia faafofoga i lo outou muimui.

¹⁰Ua oo foi ina o tautala atu Arona i le faapotopotoga atoa uma o le fanauga a Isaraelu, ua latou vaai atu i le vao, faauta, o le pupula o Ieova ua faaali mai i le ao.

¹¹Ona fetalai mai lea o Ieova ia Mose,

¹²ua faapea mai, Ua ou faalogo i le muimui o le fanauga a Isaraelu; ina fai atu ia ia te i latou, ia faapea atu, O le afiafi tou te aai ai manu, o le taeao foi tou te maoona ai i le mea e ‘ai, i le tou te iloa ai, o a‘u lava o Ieova lo outou Atua.

¹³Ua oo foi i le afiafi ona ae mai lea o salu, ua ufitia ai le togālauapi, o le taeao foi ua totō ai le sau, ua sioina ai le togālauapi.

¹⁴Ua alu ae foi le sau sa totō, faauta, o le fogāeleele, ua i ai ni mea iti faalapotopoto, e la iti pei o le sauto‘a i luga o le eleele.

¹⁵Ua iloa e le fanauga a Isaraelu, ona latou fai ane lea o le tasi i le tasi, Se a ea lenei? Auā latou te lei iloa po o le a lea. A ua fai atu Mose ia te i latou, O le mea e ‘ai lenei, ua foaiina mai e Ieova ia te outou e aai ai.

¹⁶O le mea lava lenei ua poloai mai ai Ieova, Ia faaputu i ai e taitasi le tagata e tusa ma lana e ‘ai ai, o le omera mā le tagata, e tusa ma o outou tagata ua faitauina, ia outou taitasi ma ave e faatatau i e o i lona fale ie.

¹⁷Ua faapea lava ona faia e le fanauga a Isaraelu, ua latou faaputu lava, ua tele a isi, a ua itiiti a isi.

¹⁸Ona latou fuatia lea i le omera; o le ua tele ana mea e leai sana mea e toe, o le ua itiiti ana mea, e le faalelava foi ana mea, ua latou taitasi ma faaputu e tusa ma lana mea e ‘ai ai.

¹⁹Ona fai atu lea o Mose ia i latou, Aua ne‘i tuu e se tagata sina toe mea i le taeao.

²⁰A e lei faalogo i latou ia Mose, ua tuu e nisi tagata toe mea i le taeao, i le ua tupu ai ilo, ua elosia; ona ita ai lea o Mose ia te i latou.

²¹Ua latou faaputu ai foi i lea taeao ma lea taeao, e taitasi le tagata e tusa ma lana e ‘ai ai; a vevela foi le la, ona usi ai lea.

²²Ua oo foi i le aso ono, ona latou faaputu ai lea e lua mai a latou mea e ‘ai, e tailua omera mā le tagata e toatasi; i le ua o ane ai o matai uma o le faapotopotoga, ma faaali atu ai ia Mose.

²³Ona fai atu lea o ia ia te i latou, O le mea lava lenei ua fetalai mai ai Ieova, O le aso taeao o le malologa lea o le sapati paia ia Ieova; o mea tou te fia tao, ina tao ia, o mea foi tou te fia tunuina, ina tunu ia; o mea uma foi ua toe ia outou tuu lea mā outou, ma teu ai seia taeao.

²⁴Ua latou tuua foi i le taeao, pei ona poloai mai ai o Mose; a e lei elosia lava, e leai lava se ilo o i ai.

²⁵Ona fai atu lea o Mose, Tou te aai lea i le asō, auā o le sapati le aso nei ia Ieova, tou te le maua se mea i le vao i le asō.

²⁶O aso e ono tou te faaputu ai, a o le aso fitu, o le sapati lea, e le i ai se mea.

²⁷Ona oo lea i le aso fitu, ua o ane ai nisi tagata latou te faaputu, a e lei maua se mea e i latou.

²⁸Ona fetalai mai lea o Ieova ia Mose, Tou te le mafafai seia afea ona tausi i a‘u poloaiga ma a‘u tulafono?

²⁹Faauta ea, ua tuuina mai e Ieova le sapati ia te outou, o le mea lea ua ia foaiina mai ai i le aso ono o le mea e ‘ai mo aso e lua, ina ia outou nonofo e taitasi i le mea e nofo ai, aua le alu i fafo se tagata i le mea e nofo ai i le aso fitu.

³⁰Ona malolo lea o le nuu i le aso fitu.

³¹Ua faaigoa lea mea e le aiga o Isaraelu, o le manai; e pei o le fatu koriano foi ia, e sinasina, e tusa foi lona manogi ma le faapāpā areto ua palu ma le meli.

³²Ua fai atu foi Mose, O le mea lenei ua fetalai mai Ieova, Ia outou faatumuina ai se omera, ina ia teu mo o outou tupulaga amuli, ina ia latou iloa le mea e ‘ai na ou fagaina ai outou i le vao, ina ua ou aumaia outou nai le nuu o Aikupito.

³³Ua fai ane foi Mose ia Arona, Ia e ave se ato, ma tuu i ai le tumu o le omera o le manai, ma ia e tuuina i luma o Ieova, ina ia teu mo outou tupulaga amuli.

³⁴Faapea ona fetalai mai Ieova ia Mose, ua faapea lava ona tuuina e Arona i luma o le atolaau o le tulafono, ina ia teu ai.

³⁵Ua aai foi le manai e le fanauga a Isaraelu i ona tausaga e fagafulu, ina seia latou oo atu i le nuu āina, ua oo tuaoi o le nuu o Kanana ua latou aai ai le manai.

³⁶O le omera, o lona vaega e sefulu lea o le efa.