Read Samoan Old Version Bible – O LE TUSI PAIA ESOTO 17 Bible Online

ESOTO 17 - Samoan Old Version Bible – O LE TUSI PAIA bible

ESOTO 17

¹Ona o lea o le faapotopotoga uma lava o le fanauga a Isaraelu nai le vao o Sina, ua savavali i latou e tusa ma le afioga a Ieova, ua latou to lauapi i Refiti, a e leai se vai e inu ai le nuu.

²Ona finau mai lea o le nuu ia Mose, ua latou fai mai ia te ia, Au mai ia se vai ia te i matou, matou te inu ai. Ona tali atu lea o Mose ia te i latou, Se a ea le mea te finau mai ai ia te au? Se a foi le mea tou te tofotofo ai ia Ieova?

³Ona fiainu lea o le nuu i lea mea; ua latou muimui foi ia Mose, ua fai mai, Se a le mea na e avae ai i matou nai Aikupito, e fasioti ai ia te i matou, ma a matou fanau, atoa ma a matou manu i le fia inu?

⁴Ona alaga lea o Mose ia Ieova, ua faapea atu, Se a se mea ou te faia i lenei nuu, e toe ina latou fetogi mai ia te au i maa?

⁵Ona fetalai mai lea o Ieova ia Mose, Ia e alu atu i luma o le nuu, tou te o ma nisi toeaina o Isaraelu; ia e ave foi i lou lima lou tootoo na e taia a‘i le vaitafe, ma e alu.

⁶Faauta, ou te tu ai i ou luma i luga o le papa i Horepa; e te taia le papa, ona puna mai ai lea o le vai, e feinu ai le nuu. Ona faapea lea ona faia e Mose i luma o teoaina o Isaraelu.

⁷Ua ia faaigoa foi lea mea o Mase, i le ma Meripa, ona o le finau o le fanauga a Isaraelu, ma lo latou tofotofo ia Ieova, o loo faapea ane, Ua ia i tatou ea Ieova, pe leai?

⁸Ona o mai lea o Amaleka e tau ma Isaraelu i Refiti.

⁹Ona fai ane lea o Mose ia Iosua, Ina filifili ia mo i tatou tagata, tou te o e tau ma Amaleka; o a taeao ou te tu ai i le tumutumu o le mauga ma le tootoo o le Atua i lo‘u lima.

¹⁰Ua fai foi e Iosua faapei ona fai ane o Mose ia te ia e tau ma Amaleka; ua o ae foi o Mose, o Arona, ma Huro i le tumutumu o le mauga.

¹¹A sii i luga e Mose lona lima, ona malo atu ai lea o Isaraelu; a tuu foi i lalo lona lima, ona malo mai ai lea o Amaleka.

¹²Sa mamafa lima o Mose, ona la ave lea o le maa, ma tuu ai i ona lalo, ona tietie ai lea o ia; a o Arona ma Huro na la taofi i luga ona lima, o le tasi i lea itu, ma le tasi i lea itu; ua mau ai ona lima ina seia goto le la.

¹³Ua lafoia foi Amaleka ma ona tagata e Iosua i le pelu.

¹⁴Ona fetalai mai lea o Ieova ia Mose, Ina tusi ia lenei mea i le tusi e fai ma faamanatuga, ma ia faamatalaina i taliga o Iosua; a u‘a ou te matuā soloiesea le faamanatuga ia Amaleka i le lalolagi.

¹⁵Ona faatu ai lea e Mose le fata faitaulaga, ma faaigoa ai O IEOVA-NESE.

¹⁶Ua ia fai ane foi, Auā na sii lona lima i le nofoālii o Ioa, e tau e Ieova le taua ma Amaleka i lea tupulaga ma lea tupulaga.