Read Samoan Old Version Bible – O LE TUSI PAIA ESOTO 21 Bible Online

ESOTO 21 - Samoan Old Version Bible – O LE TUSI PAIA bible

ESOTO 21

¹O nei upu foi e faamasino ai, e te tuuina atu ia te i latou.

²Pe a e faatau se auauna Eperu, e auauna o ia ia te oe i tausaga e ono; a o le fitu o tausaga, e te faasaoloto fua ia te ia.

³Pe afai na sau toatasi o ia, ia alu foi e toatasi; a e peitai afai ua fai avā, ia o i laua ma lana avā.

⁴Pe afai na avatu e lona matai se avā ia te ia, ma ua fanau mai ni ona atalii po o afafine, ia tuu pea i lona matai le avā ma ana fanau, ua na o ia e alu ese e taotasi.

⁵Pe afai foi e matuā fai ane le auauna, Ou te alofa lava i lo‘u matai ma la‘u avā, ma la‘u fanau, ou te le alu ese lava a‘u;

⁶ona ta‘ita‘iina ane lea o ia e lona matai i faamasino; e ta‘ita‘iina foi e ia i le puipui, po o le pou o le faitotoa; ona tui lea o lona matai i lona taliga i le au, ona auauna pea lava lea o ia ia te ia.

⁷A e afai e faatau e se tagata i lona afafine e fai ma auauna fafine, aua le alu ese ia, pei ona alu o auauna tane.

⁸Afai e leaga ia i le manatu o lona matai na faufautane ai, ia tuu atu ia toe fautauina ia; e le toe pule ia i ai lona faatau i se nuu ese, auā ua ia ‘ole‘ole ia te ia.

⁹Pe afai foi na te faufautane ia te ia i lona atalii, na te faia ia te ia o mea e tusa i afafine.

¹⁰Pe afai e toe fai se tasi ava, ia avatu pea lana mea e ‘ai, ma ona ofu, ma le tu e tatau a le tane ma le avā.

¹¹Pe afai foi na te le faia o nei mea e tolu ia te ia, ona alu fua lava lea o ia, e le avane ni tupe.

¹²O le na te fasi se tagata e oti ai o ia, ia fasiotia lava o ia.

¹³A e afai e lei lamalama o ia i ai, a ua tuuina atu o ia e le Atua i lona lima; ou te tofia mo oe se mea e sola i ai o ia.

¹⁴A e afai e faamaualuga se tagata i le tasi, ma fasioti ia te ia i se togafiti, e te ave ese lava ia te ia i lo‘u fata faitaulaga ia oti o ia.

¹⁵O se fasi i lona tamā, po o lona tinā, ia fasiotia lava o ia.

¹⁶O se gaoi foi i se tagata, ma faatauina o ia, po ua iloa o ia o loo ia te ia, ia fasiotia lava o ia.

¹⁷O se fetuu foi i lona tamā, po o lona tinā, ia fasiotia lava o ia.

¹⁸Afai e femisai tagata, ona fasi lea o le tasi i le tasi i se maa, po o lona lima; a le oti o ia, a e taoto i lona moega;

¹⁹pe a toe tulai o ia, ma fealualuai i fafo ma lona tootoo, ona sao lea o le na fasi ia te ia, a e taui atu e ia ia te ia i ona aso na taoto ai, ma faamalolo lava ia te ia.

²⁰Pe afai e fasi se tagata i lana auauna tane, po o lana auauna fafine i le tootoo e oti loa ai o ia i lona lima, ia matuā faasalaina lava o ia.

²¹A e peitai a ola ia i se aso e tasi, po o aso e lua, aua le faasalaina o ia; auā o ana tupe lava ia.

²²Pe afai e femisai tagata, ona lavea ai lea o se fafine ua to, ona le au ai lea o lana tama, a e lei afaina ai o ia, ia matuā au mai lana sala, e faitalia le tane a le fafine ona faatatau atu i ai; e avane lava e ia le totogi, e faitalia faamasino.

²³A e afai e tigaina ai le fafine, ia e sui atu le oti i le oti;

²⁴o le mata e sui a‘i le mata; o le nifo e sui a‘i le nifo; o le lima e sui a‘i le lima;

²⁵o le vae e sui a‘i le vae; o le mu e sui a‘i le mu; o le manua e sui a‘i le manua; o le ta e sui a‘i le ta.

²⁶Pe afai foi e ta e le tagata le mata o lana auauna tane, po o le mata o lana auauna fafine, e mole ai le mata, ia tuu saoloto ia te ia e sui a‘i lona mata.

²⁷Pe afai foi e ta e ia le gutu, ua paū ai le nifo o lana auauna tane, po o le nifo o lana auauna fafine, ia tuu saoloto ia te ia e sui a‘i lona nifo.

²⁸Pe afai e sua e se povi i se tane, po o se fafine e oti ai o ia, ia fetogia i maa ia mate lea povi; aua foi le ‘aina lona tino, a ia sao lē ana le povi.

²⁹A e afai ana masani lea povi ona sua i aso ua mavae, ma ua faailoa atu i lē ana le povi, a e lei leoleoina e ia; a oti ai se tane, po o se fafine, ia fetogia i maa ia mate lea povi, ia oti foi lē ana le povi.

³⁰Ae afai e tuuina ia te ia e au mai se togiola, ona avatu lea e ia se togiola, e tusa ma mea atoa uma e tuuina atu ai ia te ia.

³¹Afai o se atalii e suatia, po o se afafine e suatia, ia faia lava ia te ia e tusa ma lenei faamasinoga.

³²Afai e suatia e le povi se auauna tane, po o se auauna fafine, ona avatu ai lea e ia i lona alii o sekeli ario e tolugafulu, a ia fetogia i maa ia mate le povi.

³³Pe afai foi e susue e se tagata se lua, pe eli e se tagata se lua, a e le ufitia, afai foi e paū i ai se povi, po o se asini;

³⁴ona taui ai lea e lē ana le lua, e avatu tupe i lē ana le manu, a e fai māna le manu ua mate.

³⁵Afai foi e lavea e le povi a le tasi tagata o le povi a le tasi, e mate ai ia; ia faatauina atu le povi ola, ma ia la vaeluaina tupe, ia la vaeluaina foi le povi ua mate.

³⁶A e afai ua iloa ua masani lea povi ona sua i aso ua mavae, a e lei leoleoina e lē ana le manu, ona taui atu lava lea o le povi e sui a‘i le povi, a e fai māna le povi ua mate.