Read Samoan Old Version Bible – O LE TUSI PAIA ESOTO 24 Bible Online

ESOTO 24 - Samoan Old Version Bible – O LE TUSI PAIA bible

ESOTO 24

¹Ua ia fetalai mai foi ia Mose, Ina outou o mai i luga nei ia Ieova, o oe, ma Arona, ma Natapu, ma Aviu, atoa ma toeaina o Isaraelu e toafitugafulu, ma ia outou ifo mamao mai.

²Na o Mose e faalatalata toatasi o ia ia Ieova, ao i latou, aua ne‘i faatalatala mai; aua foi ne‘i o ae le nuu faatasi ma ia.

³Ona alu lea o Mose ma na faailo atu i le nuu o afioga uma lava a Ieova ma faamasinoga uma. Ona tali mai lea o le nuu uma ma le leo gatasi ua faapea mai, O mea uma lava ua fetalai mai ai Ieova, matou te faia lava.

⁴Ona tusi lea e Mose o afioga uma lava a Ieova; ona tulai lea o ia i le taeao lava, ma na faia le fata faitaulaga i lalo o le mauga, atoa ma faailoga maa e sefulu ma le lua mo itu aiga o Isaraelu e sefulu ma le lua.

⁵Ua ia aauina atu foi taulelea o le fanauga a Isaraelu, ua latou avatu taulaga mu, ma latou faia taulaga faafetai; o povi ia, ia Ieova.

⁶Ona ave lea e Mose le tasi vaega o le toto, ma ua liligi i ipu; o le tasi vaega o le toto ua ia sausauina i luga o le fata faitaulaga.

⁷Ua ia ave foi le tusi o le feagaiga, ma na faitaulia i luma o le nuu; ona latou fai mai ai lea, O mea atoa uma ua fetalai mai ai Ieova matou te faia lava, ma faalogo i ai.

⁸Ona ave lea e Mose o le toto, ma na sausauina ai le nuu; ua ia faapea atu foi, Faauta i le toto o le feagaiga ua osia e Ieova ma outou i nei mea uma lava.

⁹Ona o ae lea o Mose, ma Arona, ma Natapu, ma Aviu, atoa ma toeaina o Isaraelu e toafitugafulu;

¹⁰ua latou vaai atu foi i le Atua o Isaraelu; sa i lalo ifo o ona aao pei o le mea ua faia i maa safaira, e pei o le lagi lava ona pupula.

¹¹Ua ia le faaoo atu foi lona aao i alii o le fanauga a Isaraelu; ua latou ilo atu i le Atua, ma latou aai ma inu.

¹²Ua fetalai mai foi Ieova ia Mose, Ina sau ia oe i luga nei ia te au i le mauga, ma e nofo ai; ou te avatu ai ia te oe papamaa, ma le tulafono, ma poloaiga na ou tusia, e a‘oa‘o ai ia te i latou.

¹³Ona tulai lea o Mose ma lana auauna o Iosua; ona alu ae lea o Mose i le mauga o le Atua.

¹⁴Ua ia fai atu foi i toeaina Ia outou tali atu i mau atu iinei, seia ma foi mai ia te outou; faauta, o Arona ma Huro o ia te outou i lana; ai se tasi ua i ai se mea e faamasino ai ia alu atu o ia ia i laua.

¹⁵Ona alu ae lea o Mose i le mauga, ona ufitia lea o le mauga i le ao;

¹⁶ua tumau foi le pupula o Ieova i luga o le mauga o Sinai, e ono foi aso na ufitia ai i le ao; o le aso fitu foi na ia valaau mai ai ia Mose ai totonu o le ao.

¹⁷O le tino mai foi o le pupula o Ieova, sa pei o le afi maamaai i le tumutumu o le mauga i luma o le fanauga a Isaraelu.

¹⁸Ua alu foi Mose i totonu lava o le ao, ua alu ae foi i le mauga; sa i ai Mose i le mauga i ao e fagafulu ma po e fagafulu.