Read Samoan Old Version Bible – O LE TUSI PAIA ESOTO 25 Bible Online

ESOTO 25 - Samoan Old Version Bible – O LE TUSI PAIA bible

ESOTO 25

¹Ua fetalai mai foi Ieova ia Mose, ua faapea mai,

²Ia e fai atu i le fanauga a Isaraelu, ia latou au mai le taulaga ia te au, e taitasi le tagata ma le mea ua manatu fua i ai i lona loto, tou te talia mai ai le taulaga ia te au.

³O le taulaga foi lenei tou te talia mai ia i latou, o le auro, ma le ario, atoa ma le ‘apa memea;

⁴ma ie uli, ma le pauli, ma le mūmū, ma le ie vavae, ma fulufulu ‘oti,

⁵ma pa‘u mamoe poa ua faalanu ulaula, ma pa‘u takesa, ma le laau o le setima;

⁶o le suāuu e mu a‘i le afi, o mea manogi e manogi a‘i le uu e uu a‘i, e fai a‘i foi le mea manogi lelei e mu;

⁷o maa soama, ma maa e teu ai i le efota, atoa ma le ufifatafata.

⁸Ia latou faia foi mo a‘u se malumalu, ou te nofo ai faatasi ma i latou;

⁹e tusa ma mea uma lava ou te faaali ai ia te oe, pei o le faatusa o le malumalu, ma le faatusa o ana mea uma lava; ia faapea ona outou faia.

¹⁰Ia latou fai foi le atolaau i le laau o le setima; e lua kupita ma le vaeluagalemu o le kupita lona umi, o le kupita ma le vaeluagalemu o le kupita lona lau, o le kupita foi ma le vaeluagalemu o le kupita lona maualuga.

¹¹Ia e ufiufi foi i ai i le auro lelei, i totonu ma tua e te ufiufi ai; ia e fai foi i ona luga o le pale auro e siosioina ai.

¹²Ia e tunu le auro i le fai a‘i o mama e fa, ma ia e tuuina i ona tuli ato e fa, e lua mama i le tasi ona itu, e lua foi mama i le tasi ona itu.

¹³Ia e fai foi amo o le laau o le setima, ma ia e ufiufi ai i le auro;

¹⁴ona e sulu atu lea o amo i totonu o mama i ona itu o le atolaau, e amo a‘i le atolaau.

¹⁵Ia tuu pea lava amo i mama o le atolaau, aua le aveeseina ai.

¹⁶Ia e tuu foi i totonu o le atolaau le tulafono ou te avatu ai ia te oe.

¹⁷Ia e fai foi le nofoa o le alofa i le auro lelei; e lua kupita ma le vaeluagalemu o le kupita lona umi, o le kupita foi e tasi ma le vaeluagalemu o le kupita lona lau.

¹⁸Ia e fai foi kerupi auro e lua ia e togitogi faamamanuina i pito e lua o le nofoa o le alofa.

¹⁹Ia e fai le tasi kerupi i le tasi pito nofoa, o le tasi foi kerupi i le tasi pito nofoa; o le mea e fai a‘i le nofoa o le alofa tou te fai ai foi kerupi i ona pito nofoa e lua.

²⁰E fālō foi e kerupi o la apaau i luga, ia faamalumalu ifo le nofoa o le alofa i o la apaau; o fesagai foi o la mata; ia faasaga foi o mata o kerupi i le nofoa o le alofa.

²¹Ia e faaee foi le nofoa o le alofa i luga o le atolaau; e te tuu foi i le atolaau o le tulafono ou te avatu ai ia te oe.

²²Ta te fetaiai ma a‘u i lea mea, ma ou tautala atu ia te oe ai luga o le nofoa o le alofa, ai le va o kerupi e lua i luga o le atolaau o le tulafono, i mea uma lava ou te fai atu ai ia te oe, e te fai atu i le fanauga a Isaraelu.

²³Ia e fai foi le laoai i le laau o le setima; e lua kupita lona umi, o le kupita e tasi lona lau, o le kupita ma le vaeluagalemu o le kupita lona maualuga.

²⁴E te ufiufi ai foi i le auro lelei, ma fai ai le pale auro e siosioina ai.

²⁵E te fai ai foi o lona tafatafa i lalo e siosioina ai, o le lautele o le alofilima e tasi lona lau; ma ia e fai le pale auro mo le tafatafa i lalo e siosioina ai.

²⁶Ia e fai ai foi mama auro e fa, ma tuu taitasi mama i ona tuli laoai e fa, i ona vae e fa;

²⁷Ia felatai mama ma le tafatafa i lalo, e fai ma mea e tuu ai amo, e amo a‘i le laoai.

²⁸E te fai ona amo i le laau o le setima, ma ufiufi ai i le auro, e amo a‘i le laoai.

²⁹E te fai foi ona tanoa salalafa, ma ona ipu, o ona tanoa, ma ona ipu e asu a‘i, e liligi i ai; e te faia ia mea i le auro lelei.

³⁰E te laulauina foi i luga o le laoai o le areto e laulauina i luma, ia le aunoa i o‘u luma.

³¹E te fai foi le tuugālamepa i le auro lelei, e te fai ai le tuugālamepa e togitogi faamamanuina; e faia i lea lava mea o lona ‘au, ma ona maga, ma ona ipu faaofuofu, o ona pona, ma ona fuga.

³²E o atu maga e ono i ona itu, e tolu maga o le tuugālamepa i le tasi itu, e tolu foi maga o le tuugālamepa i le tasi itu.

³³E tolu ipu faaofuofu e pei o sekati, o le pona foi atoa ma le fuga i le maga e tasi; e tolu foi ipu faaofuofu e pei o sekati i le tasi maga, o le pona ma le fuga; ia faapea i maga e ono e atu nai le tuugālamepa.

³⁴E i le tuugālamepa foi o ipu faaofuofu e fa e pei o sekati, o ona pona atoa ma ona fuga;

³⁵o le pona i lalo o isi ona maga e lua, ma le pona i lalo o isi ona maga e lua, ma le pona i lalo o isi ona maga e lua; e faatatau i maga e ono e o atu nai le tuugālamepa.

³⁶O lea lava mea e fai a‘i ona pona ma ona maga; e faia atoa uma i le auro lelei e tasi e togitogi faamamanuina.

³⁷E te fai ai foi ona lamepa e fitu, na te faaee i luga foi ona lamepa e faamalamalama a‘i i ona lava luma.

³⁸E fai foi ona selelamepa ma ona tuugāmatapa‘u o le afi i le auro lelei;

³⁹e fai ai i le taleni o le auro lelei, atoa ma ia mea uma lava.

⁴⁰Ia oe lava, ia e faia e pei o le faatusa sa faaali atu ia te oe i le mauga.