Read Samoan Old Version Bible – O LE TUSI PAIA ESOTO 26 Bible Online

ESOTO 26 - Samoan Old Version Bible – O LE TUSI PAIA bible

ESOTO 26

¹E te faia le malumalu i ie puipui e sefulu, o le ie vavae ua milo ona manoa, e lanu uli, ma le pāuli, ma le mūmū; o kerupi, o le galuega a le tufuga poto, e te fai ai ia mea.

²O le umi e taitasi o ie puipui, e luafulu ma le valu ona kupita; o le lau e taitasi o ie puipui, e fa ona kupita; e tasi le fua o ie puipui uma.

³E faasooina ie puipui e lima, ia faatasi; e faasooina foi o ie puipui e lima, ia faatasi.

⁴E te faia foi o faamaufaalave i le ie uli i le tafatafa o le ie puipui e tasi; i le tafatafa e soo ai; e te fai faapena foi i le tafatafa lava o le tasi ie puipui i le mea e soo ai ma le tasi.

⁵E limagafulu faamaufaalave e te faia i le tasi ie puipui, e limagafulu foi faamaufaalave e te faia i le tafatafa o le ie puipui i le mea e soo ai ma le tasi, ina ia faafeagai o faamaufaalave le tasi i le tasi.

⁶E te faia foi faamau auro e limagafulu, ma fefaasooai o ie puipui i faamau, e fai ma malumalu e tasi.

⁷E te faia foi o ie puipui i fulufulu ‘oti, e fai ma ufi i luga o le malumalu; e sefulu ma le tasi ie puipui e te faia;

⁸e tolugafulu kupita le umi o le ie puipui e tasi; e fa foi kupita le lau o le ie puipui e tasi; e tasi lava le fua o ie puipui ia e sefulu ma le tasi.

⁹E te faasoo foi o ie puipui e lima, ia faatasi, ma ie puipui e ono, ia faatasi; e te gauluaina foi lona ono o ie puipui i luma o le fale fetafai.

¹⁰E te faia foi faamaufaalave e limagafulu i le tafatafa aupito i fafo o le tasi ie puipui i le mea e faasooina ai; e limagafulu foi faamaufaalave i le tafatafa o le tasi ie puipui i le mea e soo ai ma le tasi.

¹¹E te faia foi faamau ‘apa memea e limagafulu, ma sulu ia faamau i faamaufaalave e faasoo ai le fale fetafai, ina ia tasi.

¹²O le toe pito ie puipui o le fale fetafai, o le toe vaeluaga o le ie puipui, ia tautau lea i tua o le malumalu.

¹³O toe mea i le umi o ie puipui o le fale fetafai, o le kupita i le tasi itu, o le kupita foi i le tasi itu, e tautau lava ia i itu o le malumalu i lea itu ma lea itu e ufiufi ai.

¹⁴E te faia foi le ufiufi mo le fale fetafai i pa‘u mamoe poa faalanu ulaula, ma le ufiufi o pa‘u takesa e laualuga.

¹⁵E te faia foi laupapa o le laau o le setima mo le malumalu, e faatutū;

¹⁶o le umi o laupapa taitasi e sefulu ona kupita; o le lau o laupapa e tasi le kupita ma le vaeluagalemu o le kupita.

¹⁷E lua foi mea faanifo i laupapa taitasi, e faafeagai le tasi i le tasi; e faapea ona e faia lava o laupapa uma lava o le malumalu.

¹⁸E te faia laupapa e luafulu mo le malumalu i le itu i toga; e feagai lea ma le itu i toga.

¹⁹E te faia foi lago ario e fagafulu i lalo o ia laupapa e luafulu, e lua lago i lalo o le tasi laupapa e faatatau i mea faanifo e lua; e lua foi lago i lalo o le tasi laupapa e faatatau i mea faanifo e lua.

²⁰O i le tasi foi itu o le malumalu, o le itu i matu lea, e luafulu o laupapa.

²¹E fagafulu foi o latou lagi o ario; e lua lago i lalo o le tasi laupapa, e lua foi lago i lalo o le tasi laupapa.

²²O itu i sisifo foi o le malumalu e te fai ai laupapa e ono.

²³E lua foi laupapa e te faia i tulimanu o le malumalu i ona itu e lua.

²⁴E faasooina foi ia, ia faagatasi i lalo, e faasooina foi i luga i le faamaumama e tasi; e faapea lava mo ia mea e lua i ona tulimanu e lua.

²⁵O laupapa ia e valu, ma o latou lago ario, o lago e sefulu ma le ono, e lua lago i lalo o le tasi laupapa, e lua foi lago i lalo o le tasi laupapa.

²⁶E te faia foi faalava i le laau o le setima, e lima mo laupapa i le tasi itu o le malumalu,

²⁷e lima foi faalava mo laupapa i le tasi itu o le malumalu, e lima foi faalava mo laupapa o le itu o le malumalu i ona itu e lua i sisifo.

²⁸O le faalava vaeloto i totonugalemu o laupapa, ia gata mai i le tasi pito fale, e gata atu i le tasi pito fale.

²⁹E te ufiufi foi laupapa i le auro, e fai foi o latou faamaumama i le auro, e sulu ai faalava; e te ufiufi foi o faalava i le auro.

³⁰Ia e faatu foi le malumalu e pei o le faatusa ua faaali atu ai ia te oe i le mauga.

³¹E te faia foi le puipui ie uli, ma le pāuli, ma le mūmū, o le ie vavae ua milo ona manoa; na te faia i ai kerupi i le galuega a le tufuga poto.

³²E te tautauina ai i pou setima e fa e ufitia i le auro; e faia foi o latou faamau i le auro i luga o lago ario e fa.

³³E te tautau foi le ie puipui i lalo o faamau, ma ia e avatu ai le atolaau o le tulafono i totonu i tala atu o le ie puipui; e pupuni atu foi le ie puipui i le va o le mea paia ma le mea e sili ona paia.

³⁴E te faaee foi le nofoa o le alofa i luga o le atolaau o le tulafono, i le mea e sili ona paia.

³⁵E te tuuina foi le laoai i le itu mai o le ie puipui; o le tuugālamepa foi e feagai ma le laoai i le itu i toga o le malumalu; o le laoai foi e te tuuina i le itu i matu.

³⁶E te faia foi le puipui tautau mo le faitotoa o le fale fetafai i le ie uli, ma le pāuli, ma le mūmū, ma le ie vavae ua milo ona manoa, o le galuega a le tufuga fai ie lanu eseese.

³⁷E te faia foi mo le puipui tautau o pou setima e lima, ma ufiufi ai i le auro; e fai foi o latou faamau i le auro; ia e tunu le ‘apa memea e fai a‘i o latou lago e lima.