Read Samoan Old Version Bible – O LE TUSI PAIA ESOTO 27 Bible Online

ESOTO 27 - Samoan Old Version Bible – O LE TUSI PAIA bible

ESOTO 27

¹E te faia foi le fata faitaulaga i le laau o le setima, e lima kupita lona umi, e lima foi kupita lona lau, ia fai faatāfafa le fata faitaulaga, e tolu foi kupita lona maualuga.

²E te faia foi ona nifo i luga o ona tuli fata e fa, e fai foi i lea lava mea ona nifo, ma ia ufiufi ai i le ‘apa memea.

³E te faia foi ona tanoa e tali ai ona lefulefu, ma ona suo, ma ona ipu, ma ona tui, ma ona salefu, o ana mea uma lava e te fai ai i le ‘apa memea.

⁴E te fai ai foi lona taigaafi, e fai faamataupega i le ‘apa memea; o i luga foi o le mea faamataupega, e te fai ai o mama ‘apa memea e fa i ona tuli taigaafi e fa;

⁵ma ia e tuuina i lalo ifo o le tafatafa i totonu o le fata faitaulaga, ina ia oo le mea faamataupega i le totonugalemu o le fata faitaulaga.

⁶E te faia foi amo mo le fata faitaulaga, o amo o le laau o le setima, ma ia ufiufi ai i le ‘apa memea.

⁷E sulu atu foi amo i mama, e i itu e lua o le fata faitaulaga o amo e amo a‘i.

⁸Ia e faia i laupapa, ia faaōō; pei ona faali atu ia te oe i le mauga, ia faapea lava ona latou faia.

⁹E te faia foi le latoā o le malumalu, i le itu i toga, o loo faasaga lea i le itu i toga, o ie puipui mo le lotoā, o le ie vavae ua milo ona manoa, e tasi le selau o kupita le umi o le itu e tasi;

¹⁰o ona pou foi e luafulu ma o latou lago e luafulu e fai i le ‘apa memea; a o faamau o pou, ma lo latou amo pou e faia i le ario.

¹¹E faapea foi i le itu i matu i lona umi, o ie puipui e tasi le selau o kupita lona umi, ma ona pou e luafulu, ma o latou lago e luafulu, e fai i ‘apa memea; a o faamau o pou, ma lo latou amo pou e faia i le ario.

¹²O le lautele foi o le latoā i le itu i sisifo, o ie puipui e limagafulu kupita lona umi, o latou pou e sefulu, ma o latou lago e sefulu.

¹³O le lautele foi o le latoā i le itu i sasae, e faasaga i sasae, e limagafulu ona kupita.

¹⁴O ie puipui foi mo le tasi itu o le faitotoa, e sefulu ma le lima kupita ia; o latou pou foi e tolu, ma o latou lago e tolu.

¹⁵O i le tasi foi itu o ie puipui e sefulu ma le lima kupita, o latou pou e tolu, ma o latou lago e tolu;

¹⁶mo le faitotoa foi o le lotoā o le ie puipui e luafulu o kupita lona umi, o le ie uli, ma le pāuli, ma le mūmū, ma le ie vavae ua milo ona manoa, o le galuega a le tufuga fai ie lanu eseese; o latou pou e fa, ma o latou lago e fa.

¹⁷O pou uma lava e siosioina ai le lotoā ia fai o latou amo pou i le ario, e faia o latou faamau foi i le ario, a o latou lago o le ‘apa memea lea.

¹⁸E tasi le selau o kupita le umi o le lotoā, o lona lautele foi e limagafulu i mea uma, e lima foi kupita lona maualuga, o le ie vavae ua milo ona manoa; o latou lago foi e fai i le ‘apa memea.

¹⁹O ipu uma lava o le malumalu, e fai ai ona sauniga uma, ma ona faamau uma lava, ma faamau uma lava o le lotoā e faia i le ‘apa memea.

²⁰Ia e fai atu foi i le fanauga a Isaraelu, ia latou aumai ia te oe le suāuu olive lelei e tu‘ia mo le afi, e mu ai pea le lamepa, (verase 21 is the continuation of the last verse 20)

²¹i le fale fetafai o le faapotopotoga i le itu mai o le ie puipui, i luma o le atolaau o le tulafono; ia teua e Arona ma ona atalii, e afua mai i le afiafi seia oo i le taeao i luma o Ieova; e fai ma tulafono e faavavau i o latou tupulaga amuli i le fanauga a Isaraelu.