Read Samoan Old Version Bible – O LE TUSI PAIA ESOTO 31 Bible Online

ESOTO 31 - Samoan Old Version Bible – O LE TUSI PAIA bible

ESOTO 31

¹Ona fetalai mai lea o Ieova ia Mose, ua faapea mai,

²Faauta, ua ou valaauina i lona lava igoa, o Pesaleli le atalii o Auri, o le atalii lea o Huro, o le itu aiga o Iuta.

³Ua ou faatumuina foi o ia i le Agaga o le Atua, i le poto, ma le faautauta, ma le iloa lelei e fai ai galuega uma lava;

⁴ina ia mafaufau o ia i galuega faigata; ina ia galue o ia i le auro, ma le ario, atoa ma le ‘apa memea;

⁵e togitogi foi i maa, e faamau ai, e togitogi foi i laau, e fai ai galuega uma lava.

⁶Faauta foi, ua ou tuuina atu ia te ia, o Aliavu le atalii o Aisamako, o le itu aiga o Tanu; ua ou tuu foi le poto i loto o e popoto uma lava, ina ia latou faia o mea atoa uma ua ou fai atu ai ia te oe;

⁷o le fale fetafai o le faapotopotoga, ma le atolaau o le tulafono, ma le nofoa o le alofa e i ona luga, ma mea uma o le fale fetafai;

⁸o le laoai ma ana mea uma, o le tuugālamepa auro lelei ma ana mea uma, ma le fata e mu ai mea manogi;

⁹o le fata e fai ai taulaga mu ma ana mea uma lava, o le taelega ma lona tulaga;

¹⁰ma ie o mea e fai a‘i tapuaiga, ma ofu sa o le ositaulaga o Arona, o ofu foi o ona atalii e fai ai le faiva o ositaulaga;

¹¹o le uu foi e faauu a‘i, ma le mea manogi lelei e mu mo le mea paia; faapei o mea uma ua ou fai atu ai ia te oe, ia latou faia lava.

¹²Ua fetalai mai foi Ieova ia Mose, ua faapea mai,

¹³Ia e fai atu i le fanauga a Isaraelu, ia faapea atu i ai, Tou te tausi lava i o‘u sapati, auā o le faailoga lea ia te au ma outou, e oo i a outou tupulaga amuli, ina ia iloa ai, o a‘u nei o Ieova, o lē faapaiaina outou.

¹⁴Ia outou tausi i le sapati, auā e paia lava ia ia te outou; o le na te solia, ia fasiotia lava o ia; auā ai se tasi e fai ai se galuega, ia vavaeeseina lea i lona nuu.

¹⁵E ono aso e fai ai galuega, a o le aso fitu o le sapati lea e malolo ai, e paia ia Ieova; ai se tasi e fai ai sana galuega i le aso sapati e fasiotia lava o ia.

¹⁶Ia tausi e le fanauga a Isaraelu i le sapati, e fai ma sapati i a outou tupulaga amuli, o le feagaiga e faavavau.

¹⁷O le faailoga lea e faavavau ia te au atoa ma le fanauga a Isaraelu; auā o aso e ono na fai ai e Ieova le lagi atoa ma le lalolagi; a o le aso fitu na ia malolo ai, ma mapu ai.

¹⁸Ua uma atu ana fetalaiga ia Mose i le mauga o Sinai, ona avatu ai lea e ia ia te ia o papa e lua o le tulafono, o papa maa lava na tusia e le aao o le Atua.