Read Samoan Old Version Bible – O LE TUSI PAIA ESOTO 32 Bible Online

ESOTO 32 - Samoan Old Version Bible – O LE TUSI PAIA bible

ESOTO 32

¹Ua iloa e le nuu ua faatuatuai ona alu ifo o Mose nai le mauga, ona faapotopoto mai lea o le nuu ia Arona, ma latou fai atu ia te ia, Tu ia oe i luga, ia e faia se atua mo i tatou, na te muamua atu ia i tatou; auā o le na Mose, o le tagata na aveina ae i tatou nai le nuu o Aikupito, tatou te lei iloa pe se a se mea ua oo ia te ia.

²Ona fai mai lea o Arona ia i latou, Ia outou motusi ese o mama auro o i taliga o a outou avā, ma o outou atalii, ma o outou afafine, ma aumaia ia te au.

³Ona motusi ese lea e le nuu uma o mama auro sa i o latou taliga ma avatu ia Arona.

⁴Ua talia e ia nai ia te i latou, ua na gaosi ai i le tofi, ua fai ai le tamai povi auro, ona ia fai atu lea ia i latou, Isaraelu e, o lou atua lenei, o le na aveina ae oe nai le nuu o Aikupito.

⁵Ua vaai atu i ai Arona, ona ia faia lea o le fata faitaulaga i ona luma; ona alaga atu lea o Arona, ua faapea atu, O le a fai le tausamiga ia Ieova a taeao.

⁶Ua latou tulai i le taeao lava, ua fai taulaga mu, ma latou avatua taulaga faafetai; ona nonofo lea o le nuu i lalo e aai ma inu, ona tutū lea i luga e sisiva.

⁷Ona fetalai mai lea o Ieova ia Mose, Alu ia oe i lalō; auā o lou nuu, na e aveina ae nai le nuu o Aikupito, ua leaga lava i latou;

⁸ua vave ona latou o ese i le ala na ou poloai atu ai ia te i latou, ua latou faia le tamai povi auro mo i latou, ua latou ifo i ai, ma fai taulaga i ai; o loo faapea ane foi i latou, Isaraelu, o lou atua lenei, o le na aveina ae oe nai le nuu o Aikupito.

⁹Ua fetalai mai foi Ieova ia Mose, Ua ou vaai atu i lenei nuu, faauta foi, o le nuu ua maaa lava le ua;

¹⁰o lenei, tuu mai ia o a‘u, ina ia tupu tele lo‘u ita ia te i latou, ina ia ou faaumatia i latou; a ou te faia oe ma nuu tele.

¹¹A ua matuā faatoga o Mose i lona Atua o Ieova; ua ia fai atu i ai, Ieova e, se a le mea e tupu tele ai lou toasa i lou nuu na e au mai nai le nuu o Aikupito i le mana tele ma le aao malosi?

¹²Se a le mea e tautala ai Aikupito, e faapea ane, Na ia aveina atu i latou ina ia malaia, ma ia fasioti ia te i latou i mauga, ma ia faauma ia i latou ai le fogāeleele? Ia e liliueseina lou toasa tele, ma ia e salamo i le leaga ne‘i oo i lou nuu.

¹³Ia e manatua Aperaamo, ma Isaako, atoa ma Isaraelu au auauna, na e tauto ai o oe ia te oe lava, ma e faapea atu ia te i latou, Ou te faatoateleina a outou fanau, pei o fetu o i le lagi, o lenei nuu atoa foi na ou fai atu ai, ou te avatua i‘a outou fanau e fai mo latou tofi e faavavau.

¹⁴Ona salamo ai lea o Ieova i le leaga na fai a faaoo atu i lona nuu.

¹⁵Ona liliu lea o Mose, ma ua alu ifo nai le mauga, ma papa maa e lua o le tulafono i lona lima, o papa maa na tusia i o la itu e lua, o lea itu ma lea itu ua tusia ai.

¹⁶O ia papa maa foi, o le galuega a le Atua ia; o le mea foi ua tusia, o le tusi lea a le Atua na togitogiina i papa maa.

¹⁷Ua faalogo atu Iosua i le leo o le nuu o loo alalaga, ona fai atu lea o ia ia Mose, O le vāvāo o le taua o i le togālauapi.

¹⁸A ua tali mai o ia, E le o le leo o e alalaga ina ua malo; e le o le leo foi o e alalaga ina ua lafoia; a o le leo o le pese lava ou te faalogo i ai.

¹⁹Ua faalatalata atu o ia i le togālauapi, ona iloa ai lea e ia o le tamai povi ma le siva; ona tupu tele ai lea o le ita o Mose, ua lafo ifo papa maa nai ona lima, ua nuti ai i lalo o le mauga.

²⁰Ona tago ai lea o ia i le tamai povi na latou faia, ua susunu i le afi, ua olo ai ua fai ma efuefu, ua sasaa ai foi i le vai, ma faainu ai le fanauga a Isaraelu.

²¹Ona fai atu lea o Mose ia Arona, O le a le mea na faia e lenei nuu ia te oe ina ua e faaoo ai lenei agasala tele ia te i latou?

²²Ua tali mai Arona, Aua ne‘i tupu tele mai le toasa o lo‘u alii; ua e silafia le nuu nei, ua leaga lava i latou.

²³Ua latou fai mai ia te au, Ina faia mo i tatou se atua e muamua atu ia i tatou; auā o lena tagata o Mose na na aveina ae i tatou nai le nuu o Aikupito, tatou te le iloa pe se a se mea ua oo ia te ia.

²⁴Ona ou fai atu lea ia te i latou, O e o i ai auro ia motusi ese, ma ia latou aumaia ia te au; ona ou lafo ai lea i le afi, i le ua sau ai lenei tamai povi.

²⁵Ua vaai atu Mose ua salalau le nuu, auā ua faasalalauvaleina e Arona e faalumaina ai i latou i e laga mai ia te i latou;

²⁶ona tulai lea o Mose i le faitotoa o le togalauapi, ma faapea atu, O ai se ‘au ma Ieova? Ina sau ia ia te au. Ona faapotopoto mai lea ia te ia o le fanauga a Levi uma lava.

²⁷Ona fai atu lea o ia ia te i latou, O loo faapea ona fetalai mai Ieova, o le Atua o Isaraelu, Ia taitasi ma tuu lana pelu i lona itu, ina feoai ia i lea faitotoa ma lea faitotoa i le togālauapi, ma ia taitasi ma fasioti i lona uso, ma lana uo, ma le la te tuaoi.

²⁸Ona faia lea e le fanauga a Levi faapei ona fai atu ai o Mose, ua fasia le nuu i lea aso pe toatolu gaafe o tagata.

²⁹Ua faapea atu foi Mose, Ia tofia outou e outou i le aso mo Ieova, e taitoatasi i lona atalii ma lona uso, ina ia tuuina mai i le asō se manuia ia te outou.

³⁰Ua oo i le taeao, ona fai atu lea o Mose i le nuu, Ua outou faia le agasala o le agasala tele; o lenei, o le a a‘u alu ae ia Ieova, pe mafai ona ou faia se togiola ona o a outou agasala?

³¹Ona foi atu lea o Mose ia Ieova, ma na fai atu ai, Aue! ua agasala le nuu nei i le agasala tele, na fai mo i latou le atua auro.

³²O lenei, pe mafai ona e faamagalo la latou agasala; a leai, ia soloiesea a‘u i le tusi ua e tusia.

³³Ona fetalai mai lea o Ieova ia Mose, O le ua agasala mai ia te au, ou te soloiesea lava lea i la‘u tusi.

³⁴O lenei, alu ia oe, ta‘ita‘i atu ia le nuu i le mea na ou fai atu ai ia te oe; faauta, e muamua atu la‘u agelu i ou luma; o le aso foi ou te asiasi ai, ou te asiasi lava ia i latou ona o la latou agasala.

³⁵Ona taia lea e Ieova o le nuu, ona ua latou faia le tamai povi, na faia e Arona.