Read Samoan Old Version Bible – O LE TUSI PAIA ESOTO 33 Bible Online

ESOTO 33 - Samoan Old Version Bible – O LE TUSI PAIA bible

ESOTO 33

¹Ua toe fetalai mai Ieova ia Mose, Ina alu ia, ma ia outou o ae ai lenei mea, o oe ma le nuu na e aveina ae nai Aikupito, i le nuu na ou tauto atu ai ia Aperaamo, ma Isaako, ma Iakopo, ua faapea atu, Ou te tuuina atu ai i lau fanau.

²Ou te auina atu foi i ou luma le agelu; ou te tuli ese atu foi o sa Kananā, ma sa Amorī, ma sa Hetī, ma sa Perisē, ma sa Hivī, ma sa Iepusē;

³o le nuu lea o loo tafe ai le suāsusu ma le meli; auā tatou te le o ae ma outou, auā o le nuu outou ua maaa le ua; ne‘i ou faaumatia outou i le ala.

⁴Ua faalogo le nuu i lenei tala leaga, ona latou faanoanoa ai lea, e le teuteu foi se tasi i ana teuga;

⁵auā na fetalai mai Ieova ia Mose, Fai atu ia i le fanauga a Isaraelu, O le nuu ua maaa le ua outou, o le emo o le mata ou te alu ae ai i totonu o outou, ma ou faaumatia outou; ina tuu ese ia o a outou teuga ia te outou, seia ou iloa, pe se a se mea ou te faia ia te outou.

⁶Ona to ese lava lea e le fanauga a Isaraelu o a latou teuga i le mauga o Horepa.

⁷A o Mose, ua ave e ia le fale ie, ua faatu ai e ia i tala atu o le togālauapi, e vava mamao ma le togālauapi; ua ia faaigoa ai foi, le fale ie o le faapotopotoga; ona o ai lea i o latou uma e na saili ia Ieova i le fale ie o le faapotopotoga i tala atu o le togālauapi.

⁸A oo ina alu atu Mose i le fale ie, ona tutū lea i luga o le nuu atoa uma, ua taitasi ma tu mai i le faitotoa o lona fale ie, ua latou tulimata‘i ia Mose, ina seia ulu atu ia i le fale ie.

⁹Ua ulu atu Mose i le fale ie, ona ifoifo ai lea o le ao faaniutu, ua tu foi i le faitotoa o le fale ie; ona fetalai mai lea o Ieova ia Mose.

¹⁰Ua iloa e le nuu atoa uma o le ao faaniutu, o loo tu i le faitotoa o le fale ie, ona tulai lea o le nuu uma, ma ifo atu ai, e taitoatasi i le faitotoa o lona fale ie.

¹¹Ua fetalai mai foi Ieova ia Mose, o loo fesagai lava, faapei o le tagata ona tautalatala ma lana uo; ua foi atu Mose i le togālauapi, a o lana auauna o Iosua, o le atalii o Nuno, o le taulealea, e lei alu ese lava o ia i le fale ie.

¹²Ua fai atu foi Mose ia Ieova, Silasila mai, ua e fetalai mai ia te au ia ou aveina ae le nuu nei, a e te lei faailoa mai, po o ai e te auina mai ma te toalua, a ua e fetalai mai faapea, Ua ou iloa oe i lou lava igoa, ua alofagia foi oe e a‘u.

¹³O lenei, afai ua alofagia a‘u e oe, ia e faailoa mai ia te au lou ala, ina ia ou iloa oe, ina ia alofagia a‘u e oe, ma ia e manatu o ou tagata le nuu nei,

¹⁴Ona fetalai mai lea o Ieova, Ta te o atu lava ma a‘u; ou te avatua foi le mapusaga mo oe.

¹⁵Ona tali atu lea o ia ia te ia, Pe afai ta te le afio atu ma oe, aua le aveina ae i matou nai le mea nei.

¹⁶Se a lava le mea e iloa ai ua alofagia a‘u e oe, o a‘u atoa ma lou nuu, na o lea, ina ua e afio atu faatasi ma i matou? Ona vavaeeseina lea o i matou, o a‘u ma lou nuu ai nuu uma lava i le fogāeleele.

¹⁷Ona fetalai mai lea o Ieova ia Mose, O le mea ua e fai mai ai na, ou te faia lava, auā ua alofagia oe e a‘u; ua ou iloa foi oe i lou lava igoa.

¹⁸Ona fai atu lea o Mose, Ia e faaali mai ia te au lou mamalu.

¹⁹Ona fetalai mai lea o ia, Ou te faaui atu lo‘u lelei uma i ou luma; ou te ta‘u atu foi le igoa o Ieova i ou luma; ou te alofa atu foi i e ou te fia alofa atu i ai, ma ou alofa mutimutivale i e ou te fia alofa mutimutivale i ai.

²⁰Ua ia fetalai mai foi, E te le mafaia ona vaai mai i o‘u mata; auā e le mafai ona vaai mai lava se tagata ia te au, ma ola pea ia.

²¹Ua fetalai mai Ieova, Faauta i le mea e latalata ane ia te au, e te tu ai i luga o le papa;

²²a ui ane ai lo‘u mamalu, ou te tuuina oe i le māvaevae o le papa, ou te ufitia oe i lo‘u lima seia mavae ane a‘u;

²³a a‘u ave ese lo‘u lima, ona e iloa mai lea o lo‘u tua; a o o‘u mata e le vaaia lava ia.