Read Samoan Old Version Bible – O LE TUSI PAIA ESOTO 34 Bible Online

ESOTO 34 - Samoan Old Version Bible – O LE TUSI PAIA bible

ESOTO 34

¹Ona fetalai mai lea o Ieova ia Mose, Ia e ta mai ni papa maa se lua, pei o papa muamua; ou te tusi foi i ia papa o upu sa i ai i papa muamua, na e taeia;

²ma ia e saunia i le taeao, ma alu ae i le taeao i le mauga o Sinai, e te tu mai ai i o‘u luma i le tumutumu o le mauga.

³Aua foi ne‘i lua o ae ma se tasi; aua ne‘i iloa se tagata e toatasi i le mauga uma; o lafu mamoe foi ma povi, aua ne‘i tataa i luma o lea mauga.

⁴Ona ta lea e ia o papa maa e lua, e pei o papa muamua; ua tulai foi Mose i le taeao lava, ua alu ae i le mauga o Sinai, faapei ona fetalai mai ai o Ieova ia te ia, ua ave foi i lona lima o papa maa e lua.

⁵Ona afio ifo lea o Ieova i le ao, ua la tutū foi ma ia i lea mea, ua ia ta‘u mai foi le suafa o Ieova.

⁶Ua afio ane foi Ieova i ona luma, ma na‘ta‘u mai, O Ieova, o Ieova, o le Atua alofa mutimutivale ma le alofa fua, e telegese lona toasa, a e tele le alofa ma le faamaoni;

⁷o lō tausi le alofa e oo atu i afe o tupulaga; o lē faamagalo foi i le amioletonu ma le solitulafono ma le agasala, a e le faasaoina lava e ia o e agasala; a e taui atu e ia le agasala a mātua i a latou fanau ma le fanau a latou fanau, e oo i le tolu ma le fa o tupulaga.

⁸Ona faataalise lea o Mose, ua punou i le eleele, ma ifo.

⁹Ua ia foi atu foi, Le Alii e, afai e te alofa mai ia te au, le Alii e, ina tatou afio atu ma oe; auā o le nuu lenei ua maaa le ua, ia e faamagalo foi a matou amioletonu, ma a matou agasala, ia avea foi i matou mou tofi.

¹⁰Ona fetalai mai lea o ia, Faauta, ou te osia le feagaiga; ou te faia vavega i luma o lou nuu uma, e lei faia lava i le lalolagi uma, po o nuu ese uma; e vaaia foi le galuega a Ieova e le nuu uma e te i ai oe; auā o le mea matautia o le a ou faia ia te oe.

¹¹Ia e tausi i le upu ou te fai atu ai ia te oe i le asō; faauta, ou te tuli ese atu i ou luma o sa Amorī, ma sa Kananā, ma sa Hetī, ma sa Perisē, ma sa Hivī, ma sa Iepusē.

¹²Ia oe, ne‘i e osi le feagaiga ma e o nonofo i le nuu o le a e alu atu i ai, ne‘i avea ai ma mailei ia te oe;

¹³a ia outou sofaia o latou fata faitaulaga, ia nutipala i o latou tupua, ma vavae i lalo o latou tupua o Asaira.

¹⁴Auā e te le ifo i se tasi atua; auā o Ieova, o le Fuā, o lona lea suafa, o le Atua fuā lava o ia.

¹⁵Ne‘i e osi le feagaiga ma e o nonofo i le nuu, e mulilulua ai foi i latou i o latou atua, ma fai taulaga i o latou atua; e valaau foi i latou ia te oe, ona e ‘ai lea i a latou taulaga.

¹⁶Ne‘i e au mai foi o latou afafine ma avā a ou atalii, e mulilulua foi o latou afafine i o latou atua, e mulilulua ai foi ou atalii i o latou atua.

¹⁷Aua ne‘i e fai mo oe ni atua uamea.

¹⁸Ia e tausiusi i le tausamiga o le areto e le faafefeteina. E fitu aso e te ‘ai ai le areto e le faafefeteina, na ou fai atu ai ia te oe, i ona po na atofaina i le masina o Apipa; auā o le masina o Apipa na e sau ai nai Aikupito.

¹⁹O ulumatua uma lava e fai lava ia mo a‘u; o poa uma o au manu, o le ulumatua a le povi atoa ma le mamoe;

²⁰a o le ulumatua a le asini, e te sui a‘i i se tamai mamoe; afai foi e te le suia, ia e vavae lona ua; e te suia o ulumatua uma a ou atalii. Aua foi ne‘i iloa mai se tasi i o‘u luma ua leai sana mea.

²¹E ono aso e te galue ai, a o le aso fitu ia e malolo ai; ia e malolo ai lava i le tau e suo ai, ma le tau e selesele ai.

²²E te faia foi le tausamiga o vaisapati, o le faapolopolo o le seleselegāsaito, atoa ma le tausamiga o le faaputugāfua ina a uma le tausaga.

²³E tai atu tolu i tausaga ia iloa ai tane uma lava ua ia te oe i luma o le Alii o Ieova, o le Atua o Isaraelu.

²⁴Auā ou te tuli ese nuu ese i ou luma, ma ou faalautele lou laueleele; e le manao foi se tagata i lou fanua pe a e alu ae faatolu i tausaga, ina ia iloa ai oe i luma o Ieova lou Atua.

²⁵Aua ne‘i e fai taulaga i le toto o la‘u taulaga ma le areto ua faafefeteina; aua ne‘i aoina le taulaga i le tausamiga o le paseka.

²⁶O le faapolopolo o le uluai fua o lou laueleele e te aumaia i le fale o Ieova lou Atua. Aua ne‘i e tunu le tamai ‘oti i le suāsusu o lona tinā.

²⁷Ona fetalai mai lea o Ieova ia Mose, Ia e tusi nei upu, auā ua ou osia le feagaiga ma oe atoa ma Isaraelu e tusa ma ia lava upu.

²⁸Sa i lea mea foi i laua ma Ieova e fagafulu ona ao, e fagafulu foi ona po; e lei ‘ai ai o ia, e lei inu ai foi; na tusi foi e ia i luga o papa maa o upu o le feagaiga, e sefulu upu.

²⁹Ua oo ina alu ifo Mose nai le mauga o Sinai ma papa e lua o le tulafono i le lima o Mose, na alu ifo o ia nai le mauga, e lei iloa e Mose ua pupula le pa‘u o ona fofoga, a o fetalai i laua ma ia.

³⁰A ua iloa atu e Arona, ma le fanauga a Isaraelu uma lava ia Mose, faauta, o loo pupula mai le pa‘u o ona fofoga; ona latou fefefe lea i faalatalata ia te ia.

³¹A ua valaau atu Mose ia te i latou, ona toe foi atu lea ia te ia o Arona ma alii uma o le faapotopotoga; ona tautala atu lea o Mose ia te i latou.

³²E mulimuli ane foi ua faalatalata mai le fanauga uma a Isaraelu, ona fai atu ai lea o ia ia te i latou upu uma lava na fetalai mai ai Ieova ia te ia i le mauga o Sinai.

³³Ua uma atu upu a Mose ia te i latou, ona tuuina lea e ia o le ufiufi i ona fofoga.

³⁴A ulu atu Mose i luma o Ieova, ina ia la tautalatala ma ia, ona tuu ese ai lea o le ufiufi, ina seia toe ulufafo, ona alu atu lea o ia, ma fai atu i le fanauga a Isaraelu le mea na fetalai mai ai.

³⁵Ua iloa e le fanauga a Isaraelu fofoga o Mose, ua pupula mai le pa‘u o fofoga o Mose, ona tuu lea e Mose o le ufiufi i ona fofoga, ina seia toe ulufale atu la te tautalatala ma ia.