Read Samoan Old Version Bible – O LE TUSI PAIA ESOTO 35 Bible Online

ESOTO 35 - Samoan Old Version Bible – O LE TUSI PAIA bible

ESOTO 35

¹Ona faapotopoto mai lea e Mose o le faapotopotoga uma o le fanauga a Isaraelu, ua fai atu ia te i latou, O mea nei ua poloai mai ai Ieova ia faia.

²E ono aso e fai ai galuega, a o le aso fitu e paia lea ia te outou, o le sapati e malolo ai ia Ieova; ai se fai galuega ai e fasiotia lava ia.

³Aua ne‘i mu se afi i so outou fale i le aso sapati.

⁴Ua fai atu foi Mose i le faapotopotoga uma o le fanauga a Isaraelu, ua faapea atu, O le mea lenei, ua poloai mai ai Ieova, ua faapea mai,

⁵Ina fai ia e outou se taulaga ia Ieova, e taitoatasi o lē manatu i ai i lona loto, ia au mai e ia le taulaga ia Ieova, o le auro, ma le ario, ma le ‘apa memea,

⁶ma le ie uli, ma le pāuli, ma le mūmū, ma le ie vavae, ma fulufulu ‘oti,

⁷ma pa‘u mamoe poa faalanu ulaula, ma pa‘u takesa, ma le laau o le setima;

⁸o le suauu foi e mu a‘i le afi, o mea manogi e manogi a‘i le uu e faauu a‘i, e fai a‘i foi le mea manogi lelei e mu,

⁹o maa soama, ma maa e teu ai i le efota ma le ufifatafata.

¹⁰O i latou uma foi o ia te outou ua popoto, ia latou o mai, ma latou faia mea uma lava ua poloai mai ai Ieova;

¹¹o le malumalu, o lona fale fetafai, ma lona ufiufi, o ona faamau, o ona laupapa, o ona faalava, o ona pou, ma ona lago;

¹²o le atolaau, ma ona amo, o le nofoa o le alofa, ma le ie puipui;

¹³o le laoai, ma ona amo, ma ana mea uma lava, ma la areto e laulauina i luma;

¹⁴ma le tuugālamepa, e mu ai le afi, ma ana mea, ma ona lamepa, ma le suāuu e mu a‘i le afi;

¹⁵ma le fata e mu ai mea manogi, ma ona amo, ma le uu e faauu a‘i, ma le mea manogi lelei e mu, ma le ie puipui o le faitotoa e pupuni ai le malumalu;

¹⁶o le fata e fai ai taulaga mu, ma lona taigaafi ‘apa memea, o ona amo, ma ana mea uma; o le tanoa e mulumulu ai ma lona tulaga;

¹⁷o ie puipui mo le lotoā, o ona pou, ma ona lago, ma le ie puipui mo le faitotoa o le lotoa;

¹⁸o faamau mo le malumalu, ma faamau mo le lotoā, ma ona maea;

¹⁹o ie o mea e fai ai tapuaiga e auauna ai i le mea paia, o ofu sa mo le faitaulaga o Arona, ma ofu o ona atalii, e fai ai le faiva o ositaulaga.

²⁰Ona tuua lea o le faapotopotoga uma o le fanauga a Isaraelu nai luma o Mose;

²¹ona latou o mai lea, o i latou uma o e ua uai i ai o latou loto, ma i latou uma o e ua manatu i ai o latou loto, ua latou aumaia le taulaga ia Ieova mo le galuega o le fale fetafai o le faapotopotoga mo ona sauniga uma, atoa ma ofu sa.

²²Ua latou o mai, o tane atoa ma fafine; o i latou uma lava o e na manatu i ai o latou loto, ua latou aumaia o mama, ma mama o taliga, ma mama o lima, ma asoa auro, ma mea auro uma, e taitoatasi uma lava o e na fai taulaga, ua fai ai le taulaga auro ia Ieova.

²³E taitoatasi uma foi ua i ai se ie uli, ma le pāuli, ma le mūmū, ma le ie vavae, ma fulufulu ‘oti, ma pa‘u mamoe poa faalanu ulaula, ma pa‘u takesa, ua latou aumaia.

²⁴E taitoatasi uma o e na faitaulaga i le ario, ma le ‘apa memea, ua au mai e ia le taulaga ia Ieova; e taitasi uma foi na i ai laau o le setima e aoga i se mea o le galuega, ua aumaia.

²⁵O fafine taitoatasi uma foi ua atamamai, ua milo i o latou lima, ma au mai o mea na milo, o le ie uli, ma le pāuli, ma le mūmū, ma le ie vavae.

²⁶O fafine uma foi na uai i ai o latou loto ma le poto, ua milo e i latou fulufulu ‘oti.

²⁷O alii foi, ua au mai e i latou o maa soama, ma maa e teu ai i le efota ma le ufifatafata;

²⁸ma le mea manogi, ma le suāuu e mu a‘i le afi, ma le uu e faauu a‘i, atoa ma le mea manogi lelei e mu.

²⁹E taitoatasi uma o tane atoa ma fafine e na manatu i ai i o latou loto, ua aumaia mea e fai a‘i galuega uma lava na poloai mai ai Ieova ia Mose ia faia; ua aumaia ma le loto e le fanauga a Isaraelu ia Ieova.

³⁰Ona faapea atu lea o Mose i le fanauga a Isaraelu, Faauta, ua valaauina e Ieova i lona lava igoa o Pesaleli, o le atalii o Auri, o le atalii lea o Huro, o le itu aiga o Iuta;

³¹ua faatumuina foi o ia i le Agaga o le Atua i le poto, ma le faautauta, ma le iloa lelei, e fai ai galuega uma lava;

³²ina ia mafaufau o ia i galuega faigata, e galue o ia i le auro, ma le ario, ma le ‘apa memea;

³³e togitogi foi i maa e faamau ai, e togitogi foi i laau, e fai ai galuega faigata uma lava.

³⁴Ua ia tuuina i lona loto ia mafai ona a‘oa‘o atu, o ia atoa ma Aliavu, o le atalii o Aisamako, o le itu aiga o Tanu.

³⁵Ua na faatumuina foi i laua i le poto e fai galuega uma a le tufuga togitogi mea, ma le galuega a le tufuga poto, ma lē lalaga ie lanu eseese, o le ie uli, ma le pāuli, ma le mūmū, ma le ie vavae, atoa ma le galuega a ē lalaga mea, ma mata galuega eseese, ma galuega a e mafaufau i galuega faigata.