Read Samoan Old Version Bible – O LE TUSI PAIA ESOTO 36 Bible Online

ESOTO 36 - Samoan Old Version Bible – O LE TUSI PAIA bible

ESOTO 36

¹Ona galulue lea o Pesaleli, ma Aliavu, ma tagata popoto uma lava, o e na avatu i ai e Ieova le poto ma le mafaufau, ina ia iloa ai e galulue i le galuega uma lava mo le sauniga o le malumalu e tusa ma mea uma lava na poloai mai ai Ieova.

²Ua valaau Mose ia Pesaleli, ma Aliavu, ma tagata popoto uma lava e na avatu i ai e Ieova le poto i o latou loto, e taitoatasi uma ua uai i ai o latou loto e o mai i le galuega ina ia faia.

³Ua latou ave foi nai luma o Mose le taulaga uma lava ua aumaia e le fanauga a Isaraelu mo le galuega o le sauniga o le malumalu e fai ai; na latou au mai ai pea ia te ia ma le loto i lea taeao ma lea taeao.

⁴Ona o mai lea o tagata popoto uma lava e ua faia le galuega uma o le malumalu, e taitasi ma sau mai lana galuega ua latou faia.

⁵Ua latou fai mai ia Mose, ua faapea mai, Ua tele lava mea ua au mai e le nuu e sauni ai le galuega na poloai mai ai Ieova ia faia, o le a totoe.

⁶Ona poloai lea o Mose, ia latou faasalalauina le upu i le togālauapi, o loo faapea, Soia le toe faia e se tane po o se fafine se galuega mo le taulaga i le malumalu.

⁷Ona vaoia lea o le nuu, ua le toe au mai ai; auā o mea ua faia ua lava ia i galuega uma e fai ai, e totoe lava.

⁸O e popoto uma lava i e ua faia le galuega o le malumalu, ua latou faia ie puipui e tasi le sefulu i le ie vavae ua milo ona manoa, ma le ie uli, ma le pāuli, ma le mūmū; ua ia fai i ai kerupi i le galuega a le tufuga poto.

⁹E luafulu ma le valu o kupita le umi o le ie puipui e tasi, ma le lau o le ie puipui e tasi e fa ona kupita; ua gatasi le fua o ie puipui uma.

¹⁰Ona faasoosoo lea e ia o ie puipui e lima, o le tasi i le tasi; ua na faasoosoo foi le isi lima o ie puipui, o le tasi i le tasi.

¹¹Ua ia faia foi faamaufaalave i le ie uli i le tafatafa o le tasi ie puipui i le tafatafa e soo ai; ua ia fai faapena foi i le tafatafa lava o le tasi ie puipui i le mea e soo ai ma le tasi.

¹²Ua ia faia faamaufaalave e limagafulu i le tasi ie puipui, ma faamaufaalave e limagafulu i le tafatafa o le ie puipui i le mea e soo ai ma le tasi; o faamaufaalave ia ua faamauina le tasi i le tasi.

¹³Ua ia faia foi faamau auro e limagafulu, ma na faasooina ai ie puipui o le tasi i le tasi i faamau; i le ua fai ma malumalu e tasi.

¹⁴Ua ia faia foi ie puipui i fulufulu ‘oti e fai ma ufi i luga o le malumalu; ua ia faia ie puipui e sefulu ma le tasi;

¹⁵e tolugafulu kupita le umi o le ie puipui e tasi; e fa foi kupita le lau o le ie puipui e tasi; e tasi le fua o ia ie puipui e sefulu ma le tasi.

¹⁶Ua ia faasooina ie puipui e lima, ia faatasi, ma ie puipui e ono, ia faatasi.

¹⁷Ua ia faia foi faamaufaalave e limagafulu i le tafatafa o le ie puipui i le mea e soo ai; ua ia faia foi faamaufaalave e limagafulu i le tafatafa o le tasi ie puipui i le mea e soo ai ma le tasi.

¹⁸Ua ia faia foi faamau ‘apa memea e limagafulu e faasooina ai le fale fetafai, ina ia tasi.

¹⁹Ua ia faia foi le ufiufi mo le fale fetafai i pa‘u mamoe poa faalanu ulaula, ma le ufiufi o pa‘u takesa e laualuga.

²⁰Ua ia faia foi laupapa mo le malumalu i le laau o le setima, ua faatutū.

²¹E tasi le sefulu o kupita o le umi lea o le laupapa e tasi, o le kupita e tasi foi ma le vaeluagalemu o le kupita o le lau lea o le laupapa e tasi.

²²E lua mea faanifo i le laupapa e tasi, ua faafeagai le tasi i le tasi, ua faapea ona faia e ia o laupapa uma lava o le malumalu.

²³Ua ia faia foi laupapa mo le malumalu, o laupapa e luafulu mo le itu i toga, e feagai lea ma le itu i toga;

²⁴e fagafulu foi lago ario ua faia e ia i lalo o laupapa e luafulu; e lua lago i lalo o le laupapa e tasi, e faatatau i mea faanifo e lua; ma lago e lua i lalo o le tasi laupapa, e faatatau i mea faanifo e lua.

²⁵Ua ia faia foi laupapa e luafulu mo le tasi itu o le malumalu, o loo i le itu i matu lea.

²⁶E fagafulu foi o latou lago ario; e lua lago i lalo o le tasi laupapa, ma lago e lua i lalo o le tasi laupapa.

²⁷Ua ia faia foi laupapa e ono mo itu i sisifo o le malumalu.

²⁸E lua foi laupapa ua faia e ia i tulimanu o le malumalu i ona itu e lua.

²⁹Ua faasooina foi ia papa ua faagatasi i lalo, e faasooina foi i luga i le faamaumama e tasi; ua faapea ona faia ia mea e lua i tulimanu e lua.

³⁰O laupapa ia e valu, ma o latou lago ario e tasi le sefulu ma le ono, o lago ia ua tailua i lalo o laupapa.

³¹Ua ia faia faalava e lima i le laau o le setima, mo laupapa i le tasi itu o le malumalu;

³²e lima foi faalava mo laupapa i le isi itu o le malumalu; e lima foi faalava mo laupapa o le malumalu i ona itu e lua i sisifo.

³³Ua ia faia foi le faalava vaeloto ina ia sulu i totonugalemu o laupapa, e gata mai i le tasi pito fale, e gata atu foi i le tasi pito.

³⁴Ua ia ufiufi foi laupapa i le auro; ua na faia foi o latou faamaumama i le auro, e sulu ai faalava, ma na ufiufi faalava i le auro.

³⁵Ua ia faia foi le puipui ie uli, ma le pāuli, ma le mūmū, ma le ie vavae ua milo ona manoa; ua ia fai i ai kerupi i le galuega a le tufuga poto.

³⁶Ua ia faia foi mo lea mea o pou setima e fa, ma na ufiufi ai i le auro, o le auro foi ona faamau; ua ia tunu le ario ua fai a‘i ona lago e fa.

³⁷Ua ia faia foi le puipui tautau mo le faitotoa o le fale fetafai i le ie uli, ma le pāuli, ma le mūmū, ma le ie vavae ua milo ona manoa, o le galuega a le tufuga fai ie lanu eseese;

³⁸ma ona pou e lima, ma o latou faamau; ua na ufiufi foi o latou pito i luga ma le amo pou i le auro; a o latou lago e lima, o le ‘apa memea ia.