Read Samoan Old Version Bible – O LE TUSI PAIA ESOTO 38 Bible Online

ESOTO 38 - Samoan Old Version Bible – O LE TUSI PAIA bible

ESOTO 38

¹Ua ia faia foi le fata faitaulaga e fai ai taulaga mu, i le laau o le setima, e lima kupita lona umi, e lima foi kupita lona lau, ua faatāfafa, ua tolu foi kupita lona maualuga.

²Ua ia faia foi ona nifo i ona tuli fata e fa, ua fai i lea lava mea ona nifo; ua ia ufiufi ai i le ‘apa memea.

³Ua ia faia foi mea uma mo le fata faitaulaga, o ona tanoa e tali ai ona lefulefu, ma ona suo, ma ona ipu, ma ona tui, ma ona salefu; o ana mea uma ua na faia i le ‘apa memea.

⁴Ua ia faia foi mo le fata faitaulaga o le taigaafi, ua faamataupega ona fai i le ‘apa memea, i lalo ifo o lona tafatafa i totonu, ua oo lava i le totonugalemu.

⁵Ua ia faia foi mama e fa mo tuli taigaafi ‘apa memea e fa, e sulu ai amo.

⁶Ua ia faia foi amo i le laau o le setima, ma na ufiufi ai i le ‘apa memea.

⁷Ua ia sulu atu foi amo i mama i itu o le fata faitaulaga e amo a‘i; ua ia faia foi i laupapa, ua ōō.

⁸Ua ia faia foi le tanoa ‘apa memea e mulumulu ai ma lona tulaga ‘apa memea i faata o le galu fafine e na faapotopoto ane i le faitotoa o le fale ie o le faapotopotoga.

⁹Ua ia faia foi le lotoā i le itu i toga, e faasaga lea i le itu i toga, o ie puipui mo le lotoā, o le ie vavae ua milo ona manoa, e tasi le selau kupita o lona umi;

¹⁰e luafulu o latou pou, ma o latou lago ‘apa memea e luafulu; a ua faia i le ario o faamau o ona pou ma lo latou amo pou.

¹¹O le itu foi i matu e tasi le selau o ona kupita o ie puipui, e luafulu o latou pou, e luafulu foi o latou lago ‘apa memea; ua faia foi i le ario o latou faamau ma lo latou amo pou.

¹²Mo le itu foi i sisifo o ie puipui e limagafulu kupita o lona umi, e tasi le sefulu o latou pou, mo latou lago e sefulu, a o faamau o pou, ma lo latou amo pou ua faia i le ario.

¹³Mo le itu foi i sasae, e faasaga i sasae, e limagafulu kupita o le ie puipui.

¹⁴O ie puipui o le tasi itu o le faitotoa e sefulu ma le lima o kupita, o latou pou e tolu, ma o latou lago e tolu.

¹⁵O le tasi foi itu o le faitotoa, o i lea itu ma lea itu o le lotoā o ie puipui e sefulu ma le lima kupita, o latou pou e tolu, ma o latou lago e tolu.

¹⁶O ie puipui uma lava ua siosioina ai le lotoā, ua faia i le ie vavae ua milo ona manoa.

¹⁷O lago o pou o le ‘apa memea ia; o faamau o pou ma lo latou amo pou o le ario ia; o ufi foi o latou pito i luga o le ario ia; ua i ai foi i pou uma lava o le lotoā o amo pou ario.

¹⁸O le ie puipui o le faitotoa o le lotoā, ua faia i le galuega a le tufuga fai ie lanu eseese i le ie uli, ma le pāuli, ma le mūmū, ma le ie vavae ua milo ona manoa; o lona umi e luafulu o kupita, o lona maualuga foi o lona lau lea o kupita e lima, e tusa ma ie puipui o le lotoā;

¹⁹e fa o latou pou, e fa foi o latou lago ‘apa memea, a o latou faamau o le ario ia; o ufi foi o latou pito i luga ma lo latou amo pou o ario lava ia.

²⁰O faamau uma o le malumalu, atoa ma le lotoā i ona itu uma, o ‘apa memea ia.

²¹O ona atoatoa ia o mea o le malumalu, o le malumalu lea ua i ai le tulafono, na faituina e tusa ma le upu a Mose, e fai ai galuega a sa Levi, i le lima o Itamaro le atalii o le faitaulaga o Arona.

²²O mea uma lava na poloai mai ai Ieova ia Mose, na faia ia e Pesaleli le atalii o Auri, o le atalii o Huro lea, o le itu aiga o Iuta.

²³Sa faatasi foi ma ia o Aliavu le atalii o Aisamako, o le itu aiga o Tanu, o le tufuga togitogi mea, o le tufuga poto, ma lē lalaga ie lanu eseese i le ie uli, ma le pāuli, ma le mūmū, ma le ie vavae.

²⁴O le auro atoa uma na fai ai le galuega, o le galuega uma lea a le malumalu, o le auro o le taulaga, ua luafulu ma le iva o taleni, ma sekeli e fitu galau ma le tolu sefulu, e faatatau i le sekeli o le malumalu.

²⁵O le ario foi o e na faitaulia i le faapotopotoga, e tasi le selau o taleni, ma sekeli e tasi le afe e fitu galau ma le fitu sefulu ma le lima, e faatatau i le sekeli o le malumalu.

²⁶E taitasi ma lana peka, o le vaeluagalemu o le sekeli lea, e faatatau i le sekeli o le malumalu; e taitoatasi uma o e na faitaulia, ua luafulu o latou tausaga, atoa ma e ua matutua ai; o ona atoa o ia tagata, e ono selau o afe ma afe e tolu, e toalima galau ma le toalimagafulu.

²⁷O le selau o taleni ario na tunu e fai a‘i lago o le malumalu, ma lago foi o le ie puipui; e tasi le selau o lago na faia i taleni e selau, o le taleni e tasi i le lago e tasi.

²⁸O sekeli foi ia e tasi le afe e fitu galau ma le fitu sefulu ma le lima, na ia fai a‘i o faamau mo pou; na ia ufiufi a‘i foi i o latou pito i luga, ma faamau a‘i i latou.

²⁹O le ‘apa memea o le taulaga e fitugafulu taleni, ma ona sekeli e lua afe ma le fa galau;

³⁰na ia fai a‘i foi o lago o le faitotoa o le fale fetafai o le faapotopotoga; ma le fata faitaulaga ‘apa memea, ma lona taigaafi ‘apa memea, ma mea uma lava o le fata faitaulaga;

³¹ma lago o le lotoā ua siosioina ai; o lago foi o le faitotoa o le lotoā, ma faamau uma lava o le malumalu, ma faamau uma lava o le lotoā ua siosioina ai.