Read Samoan Old Version Bible – O LE TUSI PAIA ESOTO 39 Bible Online

ESOTO 39 - Samoan Old Version Bible – O LE TUSI PAIA bible

ESOTO 39

¹Ua latou faia foi i le ie uli, ma le pāuli, ma le mūmū, o ie o mea e fai a‘i le tapuaiga e auauna ai i le mea paia; ua latou fai ai foi ofu sa ma Arona, faapei ona poloai mai ai O Ieova ia Mose.

²Ua faia foi e ia o le efota i le auro, ma le ie uli, ma le pāuli, ma le mūmū, ma le ie vavae ua milo ona manoa.

³Ua latou tu‘itu‘i i le auro ina seia salafalafa ma manifinifi, ua selesele ai e fai ma manoa, ina ia lalaga i le ie uli, ma le pāuli, ma le mūmū, ma le ie vavae i le galuega a le tufuga poto.

⁴Ua latou fai ai foi ona tau‘au ua faasooina ai, ua faasooina i ona tafatafa e lua.

⁵O ia lava mea na fai a‘i le fusi faalanu eseese o lona efota, e i ona luga, e pei o le galuega e i ai, o le auro, ma le ie uli, ma le pāuli, ma le mūmū, ma le ie vavae ua milo ona manoa, e pei ona poloai mai ai Ieova ia Mose.

⁶Ua latou teu foi maa soama ua faamauina ai i taai auro, ua togitogiina ai o igoa o atalii o Isaraelu, e pei o le togitogiga o le faamaufaailoga.

⁷Ua ia tuuina ai foi ia maa i tau‘au o le efota, o maa e manatuina ai le fanauga a Isaraelu, pei ona poloai mai ai o Ieova ia Mose.

⁸Ua ia faia foi le ufifatafata i le galuega a le tufuga poto, e tusa ma le galuega o i le efota, i le auro, ma le ie uli, ma le pāuli, ma le mūmū, ma le ie vavae ua milo ona manoa.

⁹Ua latou faia faatāfafa, ma ua faasautualua le ufifatafata; o le āga e tasi lona umi, ma le āga e tasi lona lau, ua faasautualua.

¹⁰Ua latou faamau foi i ai o atu maa e fa, o le atu maa, o le salikea, ma le topasi, ma le pereketa; o le atu maa muamua lea.

¹¹O lona atu lua, o le nofeka, ma le safaira, ma le ialoma;

¹²o lona atu tolu foi, o le lesema, ma le sevo, ma le aselama;

¹³o lona atu fa foi, o le tasesa, ma le soama, ma le iasepi; ua faamauina lava ia i le taai auro i o latou tuugāmaa.

¹⁴Ua tutusa foi ia maa ma igoā o atalii o Isaraelu, ua sefulu ma le lua, e tusa ma o latou igoa, pei o le togitogiga o le faamaufaailoga, e taitasi ma lona igoa, e tusa ma itu aiga e sefulu ma le lua.

¹⁵Ua latou faia foi i luga o le ufifatafata o filifili auro lelei e tutusa, o le galuega faafilifili uamea.

¹⁶Ua latou faia foi taai auro e lua, ma mama auro e lua, ua tuuina foi ia mama e lua i pito e lua o le ufifatafata.

¹⁷Ua latou tuuina foi ia filifili auro e lua i mama e lua i pito o le ufifatafata.

¹⁸O pito foi e lua o filifili auro e lua, ua latou faamauina i taai e lua, ua tuuina foi i tau‘au o le efota i ona luma.

¹⁹Ua faia foi e i latou o mama auro e lua, ma tuuina i ona pito e lua o le ufifatafata, i lona tafatafa lava o loo faasaga i le efota i totonu.

²⁰Ua latou faia foi o isi mama auro e lua, ma latou tuu ai i itu e lua i lalo o le efota, e lata ane i lona itu i luma, e felatai ma le mea e faasoo ai i luga o le fusi faalanu eseese o le efota.

²¹Ua latou nonoa foi le ufifatafata i ona mama, i mama o le efota i le manoa uli, ina ia i luga ae o le fusi faalanu eseese o le efota, ina ne‘i te‘a ese le ufifatafata i le efota; faapei ona poloai mai ai o Ieova ia Mose.

²²Ua ia faia foi le ofu talaloa o le efota, ua atoatoa i le ie uli ua lalagaina.

²³Ua i ai foi i le ofu talaloa se ua i totonu, e pei o le ua o le ofutau, ma le mea na afei faataaliolio ai le ua ne‘i masae.

²⁴Ua latou faia foi i tafatafa o le ofu o rimoni i le ie uli, ma le pāuli, ma le mūmū, ua milo ona manoa.

²⁵Ua latou faia foi tagitagi i le auro lelei, ma tuuina i va o rimoni i le tafatafa o le ofu, ua faataaliolioina ai i le va o rimoni;

²⁶o le tagitagi ma le rimoni, o le tagitagi ma le rimoni i tafatafa o le ofu talaloa, o loo faataaliolioina ai, ina ia auauna ai; faapei ona poloai mai ai o Ieova ia Mose.

²⁷Ua latou faia foi ofu tino i le ie vavae ua lalagaina, mo Arona atoa ma ona atalii;

²⁸ma le pulou o le ie vavae, ma pulou matagofie o le ie vavae, ma ofuvae i le ie vavae ua milo ona manoa;

²⁹ma le fusi i le ie vavae ua milo ona manoa, ma le ie uli, ma le pāuli, ma le mūmū, o le galuega a le tufuga fai ie lanu eseese; e pei ona poloai mai ai o Ieova ia Mose.

³⁰Ua latou faia foi le mea pupula i le pale paia i le auro lelei; ma latou tusi ai le upu, pei o togitogiga o le faamaufaailoga, E PAIA IA IEOVA.

³¹Ua latou tuu foi i ai le manoa uli, e faamauina ai i luga i le pulou; e pei ona poloai mai ai o Ieova ia Mose.

³²Ona uma lea o le galuega uma lava o le malumalu o le fale fetafai o le faapotopotoga; ua faia foi e le fanauga a Isaraelu e pei o mea uma na poloai mai ai Ieova ia Mose, ua faapea lava ona latou faia.

³³Ua latou avane foi le malumalu ia Mose, o le fale fetafai ma ana mea uma, o ona faamau, ma ona laupapa, o ona faalava, ma ona pou, ma ona lago;

³⁴ma le ufiufi o pa‘u mamoe poa ua faalanu ulaula, ma le ufiufi o pa‘u takesa, ma le ie puipui e ufiufi a‘i;

³⁵o le atolaau o le tulafono ma ona amo; ma le nofoa o le alofa;

³⁶o le laoai ma ana mea uma, ma le areto e laulauina i luma;

³⁷o le tuugālamepa auro lelei ma ona lamepa, o lamepa e teuteua ia lelei, ma ana mea uma, atoa ma le suāuu e mu a‘i le afi;

³⁸ma le fata auro, ma le uu e faauu a‘i, ma mea manogi e mu, ma le ie puipui mo le faitotoa o le fale fetafai;

³⁹o le fata ‘apa memea, ma lona taigaafi ‘apa memea, o ona amo, ma ana mea uma, o le tanoa e mulumulu ai ma lona tulaga;

⁴⁰o ie puipui o le lotoā, o ona pou ma ona lago, ma le ie puipui mo le faitotoa o le lotoā, o ona maea ma ona faamau; atoa ma mea uma lava e fai a‘i le sauniga o le malumalu mo le fale fetafai o le faapotopotoga.

⁴¹O ie o mea e fai a‘i le tapuaiga i le mea paia, atoa ma ofu paia mo le ositaulaga o Arona, ma ofu o ona atalii e fai ai le faiva o ositaulaga;

⁴²ua faia e le fanauga a Isaraelu le galuega uma lava, a pei o mea uma na poloai mai ai Ieova ia Mose.

⁴³Ona vaavaai lea o Mose i le galuega uma lava; faauta lava, ua latou faia e pei ona poloai mai ai o Ieova, ua faapea lava ona latou faia; ona faamanuia le o i latou e Mose.