Read Samoan Old Version Bible – O LE TUSI PAIA ESOTO 4 Bible Online

ESOTO 4 - Samoan Old Version Bible – O LE TUSI PAIA bible

ESOTO 4

¹Ona tali atu lea o Mose, ua faapea atu, Faauta, latou te le talia mai a‘u, latou te le faalogo mai foi i la‘u upu, auā o le a fai mai i latou,

²E lei faaali mai Ieova ia te oe. Ona fetalai mai lea o Ieova ia te ia, Pe se a lena mea i lou lima? Ua fai atu ia, O le tootoo.

³Ua ia fetalai mai, Ina lafo ia i le eleele; ona lafo lea e ia i le eleele, ua liu gata; ona sola ese ai lea o Mose.

⁴Ona fetalai mai lea o Ieova ia Mose, Ina aapa atu ia o lou lima, ma tago i lona iu. Ona aapa atu ai lea o lona lima, ua pue atu ai, ona liu tootoo lea i lona lima;

⁵ina ia latou talia mai ai, na faaali ia te oe o Ieova le Atua o latou tamā, o le Atua o Aperaamo, o le Atua o Isaako, o le Atua foi o Iakopo.

⁶Ua toe fetalai mai Ieova ia te ia, Ia e tuu lou lima i lou fatafata; ona tuu ai lea o lona lima i lona fatafata; ona to mai ai lea, faauta, o lona lima ua lepela e pei o le kiona.

⁷Ua fetalai mai o ia, a toe tuu ia lou lima i lou fatafata; ua toe tuu lona lima i lona fatafata, ona toe to mai lea nai lona fatafata, faauta foi, ua toe liliu, ua tusa ma lona lava tino.

⁸Afai foi latou te le talia mai oe, ma lē faalogo i le leo o le uluai faailoga, latou te talia lava le leo o le faailoga mulimuli.

⁹Pe afai foi latou te le talia o nei faailoga e lua, e le faalogo mai foi i lau upu, ona e asu ai lea sina vai nai le vaitafe, ma sasaa i le eleele matutu, ona liu toto ai lea i le eleele matutu, o le vai e te asuina mai le vaitafe.

¹⁰Ona fai atu lea o Mose ia Ieova, A ē alofa, le Alii e, o a‘u o le tagata e le iloa fai lauga, talu anamua, ma ona po nei ua e fetalai mai ai i lau auauna; ua le matala lo‘u gutu, ua le matala foi lo‘u laulaufaiva.

¹¹Ona fetalai mai lea o Ieova ia te ia, O ai ea na na faia le gutu o le tagata, po o ai na te faia le gūgū, po o le tutuli, po o le vaai. Po o le tauaso? E le o a‘u ea o Ieova?

¹²O lenei, alu ia oe; o a‘u foi ou te faatasi ma lou gutu, ou te a‘oa‘o atu foi ia te oe i upu e te tautala atu ai.

¹³A ua fai atu o ia, A ē alofa, le Alii e, ia e auina atu se tasi e tatau ona e auina atu ai.

¹⁴Ona tele lea o le toasa o Ieova ia Mose, ua fetalai mai, E le o lou uso ea o Arona o le sa Levī? Ua ou iloa e fai lauga lelei lava ia; faauta foi, o loo sau o ia e faafetaiai ia te oe; a iloa mai foi oe, ona fiafia ai lea o lona loto.

¹⁵E te tautala atu lava ia te ia, ma tuu atu ai ia upu i lona gutu; ou te faatasi foi ma lou gutu atoa ma lona gutu, ou te a‘oa‘o foi ia te oulua i mea lua te faia.

¹⁶E tautala atu ia mo oe i le nuu, e fai foi o ia ma gutu mo oe, e fai foi oe ma Atua mo ia.

¹⁷O lena tootoo foi e te ave i lou lima, e te fai ai faailoga.

¹⁸Ona alu lea o Mose, ua foi atu i le tamā o lana avā, o Ietero, na ia fai atu ia te ia, Se‘i ou alu, ou te foi atu i o‘u uso o i Aikupito, ia ou iloa pe ola mai i latou. Ona fai mai lea o Ietero ia Mose, Ina alu ia oe ma le manuia.

¹⁹Ona fetalai mai lea o Ieova ia Mose i Mitiana, Ina alu ia, ia e foi atu i Aikupito, auā ua oti tagata uma e na fia fasioti ia te oe.

²⁰Ona ave lea e Mose o lana avā ma ona atalii, na ia faatietie i latou i luga o le asini, ua foi atu i le nuu o Aikupito; ua ave foi e Mose le tootoo o le Atua i lona lima.

²¹Ua fetalai mai foi Ieova ia Mose, Pe a e alu e foi atu i Aikupito, ia e faautauta i vavega uma lava ua ou tuuina atu ia te oe, ma ia e faia lava i luma o Farao; a o a‘u, ou te faamaaa i lona loto, e le tuuina mai e ia le nuu e o.

²²E te fai atu foi ia Farao, O loo faapea ona fetalai mai Ieova. O lo‘u atalii Isaraelu, o la‘u ulumatua;

²³ou te fai atu ia te oe, ia e tuu mai lo‘u atalii ia auauna mai o ia ia te au; a ē le mafai ona tuu mai, faauta, o a‘u ni ou te fasiotia lou atalii, o lau lava ulumatua.

²⁴Sa i le ala o ia, ona fetaiai lea o Ieova ma ia, ina o i le mea e moe ai, ua fia fasioti ia te ia.

²⁵Ona tago lea o Sepora i le fatu, ua tipi ese ai le pa‘u o le tino o lana tama, ua lafo atu i ona vae, ua faapea atu E moni, o le tane toto lima lava oe ia te au.

²⁶Ona tuu atu lea o ia ia te ia; ona faapea atu ai lea o le fafine, O le tane toto lima lava oe, ona o le peritomega.

²⁷Ua fetalai mai Ieova Arona, Ina alu ia oe, lua te fetaiai ma Mose i le vao. Ona alu lea o ia, ua la fetaiai ma ia i le mauga o le Atua, ona la feasogi ai lea ma ia.

²⁸Ona ta‘u atu lea e Mose ia Arona upu uma lava a Ieova o le na auina mai o ia, atoa ma faailoga uma lava na ia fetalai mai ai ia te ia.

²⁹Ona o lea o Mose ma Arona, ua la faapotopotoina toeaina uma lava o le fanauga a Isaraelu.

³⁰Ona talatala atu lea o Arona i upu uma lava na fetalai mai ai Ieova ia Mose, ua ia faia foi faailoga i luma o le nuu.

³¹Ona talia lea e le nuu, ina ua latou faalogologo ua asiasi mai Ieova i le fanauga a Isaraelu, ua na silasila mai foi i lo latou puapuaga; ona latou punonou lea ma ifo.