Read Samoan Old Version Bible – O LE TUSI PAIA ESOTO 7 Bible Online

ESOTO 7 - Samoan Old Version Bible – O LE TUSI PAIA bible

ESOTO 7

¹Ua fetalai mai Ieova ia Mose, Faauta mai, ua ou tofia oe e fai ma Atua ia Farao, o lou uso foi o Arona, e fai o ia ma perofeta ia te oe.

²E te fai atu mea uma lava ou te fai atu ai ia te oe; e tautala atu foi lou uso o Arona ia Farao, ina ia tuu atu e ia o le fanauga a Isaraelu e o ese i lona nuu.

³O a‘u foi ou te faamaaa i le loto o Farao, ou te faatele foi o‘u faailoga ma o‘u vavega i le nuu o Aikupito;

⁴a e le faalogo mai Farao ia te oulua; ona ou faaoo lea o lo‘u lima i Aikupito, ou te aumaia foi o a‘u ‘au, o lo‘u nuu lava o le fanauga a Isaraelu, mai le nuu o Aikupito i sala tetele.

⁵E iloa foi e Aikupito, o a‘u lava o Ieova, pe a ou faaloaloa lo‘u lima i luga o Aikupito; ou te aumaia foi le fanauga a Isaraelu ai totonu ia i latou.

⁶Ona faia lea e Mose ma Arona e pei ona fetalai mai ai o Ieova ia te i laua, sa faapea lava ona fai e i laua.

⁷O tausaga o Mose ua valugafulu; o tausaga foi o Arona ua valugafulu ma le tolu, ina ua tautala atu i laua ia Farao.

⁸Ua fetalai mai foi Ieova ia Mose ma Arona, ua faapea mai,

⁹A fai mai Farao ia te oulua, ua faapea mai, Ina faia se vavega e oulua; ona e fai atu lea ia Arona, Tago ia i lou tootoo, ma lafo i luma o Farao, ona liu gata ai lea.

¹⁰Ona o atu lea o Mose ma Arona ia Farao, ua la faia faapei ona fetalai mai ai o Ieova; ua lafo e Arona lona tootoo i luma o Farao ma ana auauna, ona liu gata ai lea.

¹¹Ona valaau atu lea e Farao i le au popoto ma taulāitu; ua faapea foi ona fai e taulāitu a Aikupito i a latou togafiti faataulāitu.

¹²Auā ua latou taitasi ma lafo lona tootoo, ona liu gata ai lea; a ua folo o latou tootoo e le tootoo o Arona.

¹³A ua faamaaaina le loto o Farao, e lei faalogo foi o ia ia i laua, faapei ona fetalai mai ai o Ieova.

¹⁴Ua fetalai mai foi Ieova ia Mose, Ua maaa lava le loto o Farao, e le mafai e ia ona tuu atu o le nuu e o.

¹⁵Ina alu ia oe ia Farao i le taeao; faauta, o le a alu atu o ia i le vai; e te tu atu foi lua te fetaiai ma ia i le auvai o le vaitafe; o le tootoo foi sa liu gata e te ave i lou lima.

¹⁶E te fai atu foi ia te ia, Ua auina mai a‘u ia te oe e Ieova le Atua o sa Eperū, o loo fetalai mai, Ia e tuu mai lo‘u nuu e o, ina ia latou auauna mai ia te au i le vao; faauta foi, ua o le āu faalogo mai lava.

¹⁷O loo faapea ona fetalai mai Ieova, O le mea nei e te iloa ai, o Ieova lava a‘u; faauta, ou te ta i lenei tootoo ua i lo‘u lima i le vai o le vaitafe, ona liu toto ai lea;

¹⁸e mamate ai i‘a o i le vaitafe, e elo foi le vaitafe; ona ‘ino‘ino ai lea o Aikupito ona inu i le vai mai le vaitafe.

¹⁹Ua fetalai mai foi Ieova ia Mose, Ia e fai atu ia Arona, Ina tago ia i lou tootoo, ma faaloaloa lou lima i luga o vai o Aikupito, i o latou vaitafe, ma o latou vaita‘i, ma o latou vailepa, ma mea uma lava e i ai o latou vai, ina ia liu toto; ina ia i ai toto i le nuu uma lava o Aikupito, i ipu laau atoa ma ipu maa.

²⁰Ua faapea ona fai e Mose ma Arona, pei ona fetalai mai o Ieova; ua ia sii i luga foi le tootoo, ma ta le vai o le vaitafe i luma o Farao ma ana auauna; ona liu toto ai lea o le vai uma lava o le vaitafe.

²¹Ona mamate ai lea o i‘a sa i le vaitafe, ua elo foi le vaitafe, e le mafai e Aikupito ona inu i le vai o le vaitafe, sa i ai le toto i le nuu uma lava o Aikupito.

²²Ona faapea lea ona fai e taulāitu o Aikupito i a latou togafiti faataulāitu; ona faamaaaina ai lea o le loto o Farao, ua le faalogo foi ia te i laua, faapei ona fetalai mai ai o Ieova.

²³Ona liliu ai lea o Farao, ua alu i lona fale, e lei mafaufau foi o ia i lenei mea.

²⁴Ona eli lea o Aikupito uma i tafatafa o le vaitafe ia maua le vai latou te inu ai; auā e le mafaia e i latou ona inu o le vai nai le vaitafe.

²⁵Ua faaatoa foi ona aso e fitu, talu ona taia e Ieova o le vaitafe.