Read Samoan Old Version Bible – O LE TUSI PAIA IOPU, 14 Bible Online

IOPU, 14 - Samoan Old Version Bible – O LE TUSI PAIA bible

IOPU, 14

¹O le tagata ua fanau mai i le fafine, ua saasaa ona aso, mona ua tumu i le atuatuvale.

²E tupu ae o ia e pei o le fuga, a e salaeseina; e mavae atu foi o ia e pei o le ata, ma ua le tumau.

³Se tagata faapena ea e silasila i ai ou fofoga, ma e au mai ia te au e faamasinoina faatasi ma oe?

⁴Po o ai ea e aumai se mea mamā nai le mea eleelea? E leai se tasi.

⁵Faauta, ua tuupoina ona aso; o loo ia te oe le faitau o ona masina; ua e tuuina lona tuaoi e le sopoia e ia.

⁶O lea ia e silasila ese ai ia te ia, ia mapu ai o ia, seia faaatoaina e ia lona aso e pei o le ua galue i le taui.

⁷Auā a tā le laau, e faamoemoe i ai e toe tupu, e le aunoa foi ma ona tatupu.

⁸E ui lava ina ua leva ona aa i le eleele, ma ua mate lona tafue i le eleele,

⁹a e toe tupu ae i le susū o le vai, ma tutupu ona la, e pei o le laau tupu.

¹⁰A o le tagata e oti o ia, ma taatia, e to foi le mānava a le tagata, ona ifea lea o ia?

¹¹E pe le suāvai nai le vai, e mate foi le vaitafe, ma ua matutu.

¹²E taoto foi le tagata a e le toe tulai, seia mavae le lagi, latou te le ala, e le fagua foi i latou i lo latou moe.

¹³E! Fia natia a‘u e oe i le tuugamau ma ia e faaliloina a‘u, seia mavae atu lou toasa; ia e atofaina mai se aso mo a‘u, ma ia e manatua mai ai a‘u.

¹⁴Afai e oti le tagata, e toe ola mai ea o ia? Ou te faatalitali atu i aso uma o le taua ua tofia ai a‘u, seia oo ina suia o a‘u.

¹⁵Ia e valaau mai, ona ou tali atu ai lea ia te oe; ia e finagalo alofa i le galuega a ou aao.

¹⁶Auā ua e faitaulia nei o‘u laasaga, e le ua e lamalama ea i a‘u agasala?

¹⁷Ua faamaufaailogaina lo‘u solitulafono i le taga, ma e faaopoopoina faatasi la‘u amioletonu.

¹⁸E moni e mavae le mauga ua solo, e siitia foi le papa ai le mea sa i ai.

¹⁹E aia maa e le vai; e tāfea e le lolo le eleele o le fanua; e te faaumatia foi le faamoemoe o le tagata.

²⁰E te manumalo pea lava ia te ia, e alu ese ai foi o ia; ua e liua ona mata, ona e auina atu ai lea o ia.

²¹E oo ina mamalu ona atalii, a e le iloa e ia; e faaleaogaina foi i latou, a e le lagona ai e ia.

²²A e tigaina lona lava tino, ma faanoanoa lona lava loto.