Read Samoan Old Version Bible – O LE TUSI PAIA IOPU, 18 Bible Online

IOPU, 18 - Samoan Old Version Bible – O LE TUSI PAIA bible

IOPU, 18

¹Ona tali mai ai lea o Pilitati le Sua, ua faapea mai,

²Tou te faaiuina afea a outou upu? Ia outou mafaufau, e mulimuli ane foi matou te tautala atu ai.

³Se a le mea ua ta‘umanuvaefa ai i matou, ma ua leaga ai i matou i o outou manatu?

⁴O loo saeia o ia e ia i lona ita; e tuua ea le lalolagi ona o oe? Pe siitia ea le papa ai le mea o iai?

⁵E tineia lava le malamalama o e amio leaga, e le pupula foi le mumū o lona afi.

⁶E avea le malamalama ma pouliuli i lona fale ie; e tineia foi lona lamepa i ona luga ae.

⁷E faalavelaveina ona laasaga malolosi, e lafotuina foi o ia i lana lava pule.

⁸Auā o ona lava vae ua faaooina ai o ia i le upega, ua savali foi o ia i luga o le mailei.

⁹E lāvea lona mulivae i le mailei, e taofimauina o ia e le matasele.

¹⁰Ua tatao i le eleele le matasele mo ia, ma le mailei mo ia i le ala.

¹¹E faamatautia o ia i itu uma i mea matautia, e tulitataoina ai foi o ia.

¹²E faavaivaia lona malosi i le fia ‘ai, e saunia foi le malaia i ona tafatafa.

¹³E ‘aina ona itu tino; e ‘aina lava ona itu tino e le ulumatua a le oti.

¹⁴E liaiina lona faatuatuaga ai lona fale ie, na te aumaia foi o ia i le tupu o mea matautia.

¹⁵E mau lea i lona fala ie, auā ua le toe fai mona; e luluina le teio i luga o le mea e nofo ai o ia.

¹⁶E mamago ona aa i lalō, e salaeseina foi ona la i luga.

¹⁷E faaumatia lona faamanatuga mai le lalolagi, e leai foi sona igoa i le malae.

¹⁸E tulia o ia ai le malamalama i le pouliuli, e tulieseina foi o ia i le lalolagi.

¹⁹E le i ai ia te ia se atalii, e leai foi se atalii o lona atalii i lona nuu, e leai foi sē toe i mea sa nofo ai o ia.

²⁰E fememeai tupulaga mulimuli i lona aso, faapei ona maua e le matautuia o e na muamua.

²¹E faapena lava fale o le ua amio leaga; e faapea foi le mea e nofo ai le ua le iloa le Atua.