Read Samoan Old Version Bible – O LE TUSI PAIA IOPU, 19 Bible Online

IOPU, 19 - Samoan Old Version Bible – O LE TUSI PAIA bible

IOPU, 19

¹Ona tali atu ai lea o Iopu, ua faapea atu,

²Tou te faatigaina ea lo‘u loto, ma outou tu‘imomomoina a‘u i upu seia afea?

³Ua faasefulu lava ona outou faaleagaina o a‘u, ua outou le mamā ona outou taia mai o a‘u.

⁴Afai foi e moni ua ou sese, ua i ai pea ia te au lava lo‘u sese.

⁵Afai lava e moni tou te faamaualuga mai ia te au, ma outou ta‘uta‘u mai ia te au mea e fai mo‘u luma; ia outou iloa lava;

⁶o le Atua ua faaliliuina a‘u, ua na siomia foi a‘u i lona upega.

⁷Faauta, ou te alaga atu ona o le saua, a ua le faafofogaina a‘u; ou te uio atu lava, a e leai se faamasinoga.

⁸Ua ia puipuia lo‘u ala, ou te le mafai ona sopoia atu lava, ua ia tuuina foi le pouliuli i o‘u magāala.

⁹Ua ia aveeseina lo‘u mamalu ia te au, ua ia to ese foi le palealii i lo‘u ulu.

¹⁰Ua ia faaumatia a‘u i itu uma; o le a ou alu; ua ia liaiina foi lo‘u faamoemoe e pei o le laau.

¹¹Ua matuā toasa mai foi o ia ia te au, e peiseai foi ua na faia a‘u mona fili.

¹²Ua o mai faatasi ana ‘au, ma latou tanu lo latou ala e tau ma a‘u, ma latou to lauapi e siosiomia ai lo‘u fale ie.

¹³Ua ia faamamaoina lava o‘u uso ia te au, o e ua matou masani foi ua latou faia a‘u ma tagata ese ia te i latou.

¹⁴Ua tuua a‘u e i latou matou te tuaoi, ua faagalogalo foi ia te au e a‘u aumea mamae.

¹⁵O e ua āumau i lo‘u fale, atoa ma a‘u auauna fafine, ua latou faia a‘u ma tagata ese; ua fai a‘u ma tagata ese i o latou manatu.

¹⁶Ua ou valaau i la‘u auauna, a ua le tali mai o ia; ua ou aioi atu ia te ia i lo‘u lava gutu.

¹⁷E ui lava ina ou aioi atu ona o le fanau a lo‘u tino, a ua ese la‘u mānava i la‘u avā.

¹⁸Ua ‘ino‘ino mai lava tama iti ia te au; ua ou tulai atu, a ua latou fai upu mai ia te au.

¹⁹Ua inosia a‘u e a‘u aumea mamae uma; o i latou foi na au alofa i ai ua latou liliu ese ia te au.

²⁰Ua pipii o‘u ivi i lo‘u pa‘u ma lo‘u aano, ua ou sao ma le pa‘u o o‘u nifo.

²¹Alofa mai ia outou ia te au, ina alofa mai ia ia te au outou o a‘u uo; auā ua papai mai le aao o le Atua ia te au.

²²Se a ea le mea tou te tulituliloa mai ai ia te au e pei o le Atua, ma ua outou le maoona i lo‘u tino?

²³E, fia tusia lava o a‘u upu! E, fia tusia ai i le tusi!

²⁴Ia togitogiina i le peni uamea ma le pulu uamea i le papa e faavavau.

²⁵Auā ua ou iloa, o loo soifua le na te togiolaina a‘u; o aso amuli foi e tulai mai ai o ia i luga o le eleele.

²⁶E ui lava foi ina faaumatia lenei tino pe a mavae atu lo‘u pa‘u, a e ou te iloa atu le Atua i lo‘u tino;

²⁷ou te iloa atu ia te ia mo a‘u lava, e vaai atu foi o‘u mata ia te ia, a e le o se tasi; pe a le toe ai o‘u manao i totonu ia te au.

²⁸Auā ua tatau pe ana outou fai mai, Se a le mea ua tatou tuliloa atu ai ia te ia? Ina ua iloa mai ia te au le aa o le upu.

²⁹Ia outou fefefe i le pelu; auā o le ita, o le agasala lea e oo mai ai le pelu; ina ia iloa e outou e fai le faamasinoga.