Read Samoan Old Version Bible – O LE TUSI PAIA IOPU, 2 Bible Online

IOPU, 2 - Samoan Old Version Bible – O LE TUSI PAIA bible

IOPU, 2

¹Ua oo i le tasi aso, ona o mai ai lea o atalii o le Atua e tutū mai i luma o Ieova, na sau foi Satani faatasi ma i latou e tu mai i luma o Ieova.

²Ua fetalai atu foi Ieova ia Satani, Ua e sau ea mai fea? Ona tali mai ai lea o Satani ia Ieova, ua faapea mai, ua ou sau na a‘u fealuai i le lalolagi, ma fesavaliai ai.

³Ua fetalai atu Ieova ia Satani, Ua e mafaufau ea i la‘u auauna o Iopu, auā e leai se tasi e tusa ma ia i le lalolagi, o le tagata ua sao lana amio ma le amiotonu, o le ua mata‘u i le Atua, ma ‘alo‘alo ese i mea leaga? Ua taofi mau pea foi e ia lana amiotonu, sa e faaosoina a‘u ia te ia, ia ou faaoo fua le malaia ia te ia.

⁴Ona tali mai ai lea o Satani ia Ieova, ua faapea mai, O le pa‘u e sui a‘i le pa‘u; o mea uma foi ua i ai i le tagata, e avatua e ia e sui a‘i lona ola.

⁵A e peitai ia e aapa atu lou aao, ma e tago atu i ona ivi ma ona aano, pe na te le faifai ai ea ia te oe i ou lava luma?

⁶Ona fetalai atu lea o Ieova ia Satani, Faauta, o ia o i lou lima, tau o lona ola e te faasaoina.

⁷Ona alu ese ai lea o Satani i luma o Ieova, ma na faaoo ia Iopu le ma‘i papala leaga, e gata ae i ona alofivae, e gata ifo i lona tumuai.

⁸Ona tago ai lea o Iopu i le ta‘egaipu omea, e valu a‘i ia te ia; ia nofo foi o ia i lalo i le lefulefu.

⁹Ona fai mai ai lea o lana avā ia te ia, Ua e taofi mau pea ea i lau amiotonu? Ina faifai ia e oe o le Atua, ma e oti ai.

¹⁰Ona fai atu ai lea o ia ia te ia, Ua e tautala mai, e pei ona tautala mai o se tasi o le vao fafine vālea; ua tatou talia mea lelei mai le Atua, a e tatou te le talia ea ma mea leaga? Ua le agasala Iopu i nei mea uma i ona laugutu.

¹¹Ua faalogo uo e toatolu a Iopu i nei mea leaga uma ua oo atu ia te ia, ona latou o mai ai lea e taitoatasi mai lona nuu, o Elifasa le Timanu, o Pilitati le Sua, ma Sofara le Naama; ua latou filifili ua loto gatasi e o mai e faamafanafana ia te ia, ma faamatalaloto atu ia te ia.

¹²Na latou vaai mamao atu, ua latou le iloa o ia; ona latou fetagisi ai lea ua leo tetele; ua latou taitoatasi ma saei lona ofu, ma asu ae i luga le efuefu i o latou ulu.

¹³Ona nonofo ai lea o i latou ma ia i le eleele i ao e fitu ma po e fitu, a e lei tautala atu o i latou sina upu ia te ia; auā ua latou iloa, ua matuā tele lava lona tiga.