Read Samoan Old Version Bible – O LE TUSI PAIA IOPU, 21 Bible Online

IOPU, 21 - Samoan Old Version Bible – O LE TUSI PAIA bible

IOPU, 21

¹Ona tali atu ai lea o Iopu, ua faapea atu, Ina matuā faalogologo mai ia outou i la‘u upu,

²ia faia foi lea ma a outou faamafanafanaga.

³Ina onosai ia ia te au, a seia ou tautala atu; a mavae atu la‘u upu, i le tauemu mai pea ia.

⁴A o a‘u nei, ou te tagi atu ea i tagata? A faapea, se a le mea e le tiga ai lo‘u loto?

⁵Ia outou vaai mai ia te au, ma ia outou fememeai, ma ia tuu ae o outou lima i o outou fofoga.

⁶A ou manatu i ai, ona ou atuatuvale ai lea, ua maua ai foi lo‘u tino e le tetemu.

⁷Se a le mea ua ola mai ai o e amio leaga, ua oo ina toeaina, ma faateleina lava o latou oloa?

⁸Ua faatumauina a latou fanau i o latou luma e faatasi ma i latou, ma e o tutupu ia te i latou ua faatumauina o latou o vaai i ai.

⁹Ua saogalemu o latou fale e leai se mea e matatau ai, ua le i ai foi i o latou luga le sasa a le Atua.

¹⁰Ua ofia a latou povi, ma ua le papā, e fananau a latou povi, a e le fanau le au.

¹¹E aauina atu e i latou o latou tama iti e pei o se lafu mamoe, e taaalo foi a latou fanau.

¹²Ua latou avae le topa ma le kitara, ma latou olioli i le leo o le faaili.

¹³E faauma o latou aso o manuia, e pei o le emo o le mata ona o ifo o i latou i le tuugamau.

¹⁴Ua latou fai atu foi i le Atua, Ina alu ese ia oe ia te i matou, auā matou te le fia iloa ou ala.

¹⁵O ai ea Le e ona le malosi uma lava, matou te auauna ai ia te ia? Se a foi sona aoga ia te i matou pe a matou tatalo atu ia te ia?

¹⁶Faauta, e le o i o latou lima lo latou manuia; ia mamao ia te au le filifiliga a e amio leaga.

¹⁷E tineia faafia ea le lamepa a e amio leaga, ma oo atu ia te i latou lo latou malaia, ma na tufatufa i ai o puapuaga i lona toasa?

¹⁸E tutusa i latou ma ‘au o saito e lelea i le matagi, ua tutusa foi ma le aputi o saito ua lelea i le afā.

¹⁹E teu e le Atua lana agasala mā lana fanau; na te tauia o ia, e iloa ai foi e ia.

²⁰E iloa e ona mata lona malaia, e inu foi e ia i le toasa o Le e ona le malosi uma lava.

²¹Auā se a ea sona fiafia i lona aiga pe a mavae atu o ia, ma vaeluaina ona masina ua faitauina.

²²E a‘oa‘o atu ea se tasi le poto i le Atua? O ia lava le faamasino i e maualuluga.

²³E oti le tasi a o atoatoa lona manuia, ua matuā saogalemu lava o ia ma le filemu.

²⁴Ua tutumu ana faagagāmanu i le suāsusu, ua su foi le aano o ona ivi.

²⁵E oti foi le tasi a o faanoanoa lona loto, e lei ‘ai foi o ia ma le fiafia.

²⁶La te taooto faatasi i le eleele, e liloia foi i laua i ilo.

²⁷Faauta, ua ou iloa o outou mafaufauga, ma manatunatuga tou te faasaua mai ai ia te au.

²⁸Auā ua outou fai mai, O ifea o iai le fale o le faasaua? O i fea foi faleie e mau ai e ua amio leaga?

²⁹Ua outou le fesili ea ia te i latou o e ui ane i le ala? Pe tou te le iloa foi o latou faailoga?

³⁰Ua tuu le tagata amio leaga mo le aso o le malaia; e ta‘ita‘iina atu i latou i le aso o le toasa tele.

³¹O ai ea na te ta‘u atu lona ala i ona luma? O ai foi na te taui atu ia te ia o mea na ia faia?

³²E avea foi o ia i tuugamau, e leoleo foi se tasi i le loa.

³³E suamalie ia te ia le eleele o le vanu, e mulimuli solo atu foi ia te ia o tagata uma, o e ua muamua foi ia te ia e le ma faitaulia.

³⁴A faapefea ona outou faamatalaloto mai fua ia te au? Auā ua pepelo a outou tali.