Read Samoan Old Version Bible – O LE TUSI PAIA IOPU, 22 Bible Online

IOPU, 22 - Samoan Old Version Bible – O LE TUSI PAIA bible

IOPU, 22

¹Ona tali mai ai lea o Elifasa le Timanu, ua faapea mai,

²E aoga ea le tagata i le Atua, e pei ona aoga o le ua poto ia te ia lava?

³Se mea ea e fiafia ai Le e ona le malosi uma lava ina ua e amiotonu? Po ua aoga ia te ia ina ua sao o au amio?

⁴E faia ea e ia se finauga ma oe ona o le mata‘u ia te oe? Na te faia ea se faamasinoga faatasi ma oe?

⁵E le ua tele ea au amio leaga, e ai foi se gataaga o au agasala?

⁶Auā ua e talia fua lava mai ou uso le mea tuu faafaatau; ua e to ese foi ofu o e matitiva.

⁷Ua e le avatua le vai i le ua lailoa ia inu ai; ua e le avatua foi le mea e ‘ai i le ua fia ‘ai.

⁸A o le tagata malosi, ua fai mona le laueleele; ua mau ai foi le alii mamalu.

⁹Ua e aaufuaina atu fafine ua oti a latou tane; ua gauia foi lima o e ua aumatuā.

¹⁰O le mea lea ua siosiomia ai oe i mailei; ua faaatuatuvaleina ai foi oe i le mata‘u faafuasei;

¹¹po o le pouliuli e te le iloa ai se mea, ma vai e tele ua lofia ai oe.

¹²E lē o i le lagi i luga ea le Atua? Ina vaai ia foi i le maualuga o fetu, ua maualuluga lava!

¹³Ua e fai mai foi, Pe silafia mai faapefea le Atua? E mafai ea ona faamasino mai o ia i tua mai o le pogisa?

¹⁴Ua fai ao uliuli ma puipui ia te ia, ua ia le silafia mai ai; ua feafioai foi o ia i le faataaliolio o le lagi.

¹⁵Ua e mafaufau ea i le ala tuai na savavali ai tagata amio leaga?

¹⁶O e na aveeseina faafuasei, na lofia o latou faavae i le lolo.

¹⁷O e na fai atu i le Atua, Ina alu ese ia oe ia te i matou; i le ma lea, Se a se mea e faia e Le e ona le malosi uma lava mo i latou?

¹⁸A e peitai sa faatumuina e ia lava o latou fale i mea lelei. Ia mamao ia te au le filifiliga a e amio leaga!

¹⁹E iloa e tagata amiotonu, ma latou olioli ai; o e ua sao foi a latou amio, latou te tauemu ia te i latou.

²⁰E, ua fano le na fai i tatou mona fili, ua faaumatia i le afi la latou faulaigāmea!

²¹Ia e faamasani ma ia, e te filemu ai; o le mea lea e oo mai ai le manuia ia te oe.

²²Ia e talia le tulafono mai lona fofoga, ma ia e tuu ana afioga i lou loto.

²³Afai e te foi atu i Le e ona le malosi uma lava, e atiina ae ai oe; ia e faateamamaoina le amioletonu i ou fale ie.

²⁴Ona e teu ai lea o auro e sili i le efuefu, o auro foi o Ofeira e pei o maa o alia.

²⁵E avea foi Le e ona le malosi uma lava ma au auro, ma faulaigāario ma oe.

²⁶Ona e fiafia ai lea i Le e ona le malosi uma lava, ma faasaga ae ou mata i le Atua.

²⁷E te talotalo ia te ia, na te faafofoga mai foi ia te oe; e te faataunuuina foi mea na e tauto ai.

²⁸O le mea foi e te filifili e fai, e faatumauina lea mo oe; e pupula foi le malamalama i ou ala.

²⁹Pe a faamaulaloina nisi, ona e fai atu lea, E faaeaina. Na te faaolaina foi le ua faamaulalo.

³⁰Na te laveaiina le ua sala; e laveaiina foi o ia e ou lima mamā.