Read Samoan Old Version Bible – O LE TUSI PAIA IOPU, 26 Bible Online

IOPU, 26 - Samoan Old Version Bible – O LE TUSI PAIA bible

IOPU, 26

¹Ona tali atu ai lea o Iopu, ua faapea atu,

²Ua faapefea ea ona e fesoasoani i le ua leai sona malosi, ma faamalosia le lima vaivai?

³Ua faapefea ea ona e faatonu i le ua leai sona poto, ma faailoa tele mai le tonu?

⁴Ua e ta‘u mai ea ia upu ia te ai? Se atamai ea o ai ua oo mai mai ia te oe?

⁵E gatete agaga o e ua oti ua i lalo, o le moana foi atoa ma mea o i ai.

⁶Ua taatia fua seoli i ona luma, e leai foi se ufiufi o le mea o i ai le malaia.

⁷Ua ia folasia le itu i matu i luga o le va nimonimo, ua ia tautauina le lalolagi, a e leai se tautaulaga.

⁸Ua ia ‘ofu‘ofuina vai i ona ao uliuli, a e le masae le ao i ona lalo.

⁹Ua ia puipuia luma o lona nofoālii, ua ia fofola ifo lona ao i ona luga.

¹⁰Ua tusi faataaliolio e ia tuluiga o le fogātai, e oo i le gataaga o le malamalama atoa ma le pouliuli.

¹¹Ua luluina pou tu o le lagi, ua fememeai foi i ana aoaiga.

¹²O lona mana na te faamalūina ai le sami, o lona poto foi na te taia ai lona faamaualuga.

¹³O lona agaga ua ia faamatagofie ai le lagi; ua manua foi i lona aao le gata televave.

¹⁴Faauta, o mea aupito mai ia a ona ala, a e matuā itiiti se mea ua tatou lagona ia te ia; a o le faititili o lona malosi, o ai se lagona lea?