Read Samoan Old Version Bible – O LE TUSI PAIA IOPU, 28 Bible Online

IOPU, 28 - Samoan Old Version Bible – O LE TUSI PAIA bible

IOPU, 28

¹O i ai lava le mea e maua ai le ario, ma le mea mo le auro latou te faamamāina ai.

²E maua le uamea i le eleele, e tunu ia liu suāvai le maa e maua ai ‘apa memea.

³E faagataina e le tagata le pouliuli, e matuā suesueina foi e ia mea uma; o maa o i ai i le pouliuli ma le ata o le oti.

⁴E elia e ia le lua maulalo e mamao ma le mea e nonofo ai tagata, e faagalogaloina e le vae; ua latou tautau ma tāupe e mamao ae ma tagata.

⁵E tupu mai mea e ‘ai i le laueleele; o ona lalo foi pe a suatia e i ai e peiseai o le afi.

⁶O ona maa o le mea lea e i ai safaira, e i ai foi efuefu auro.

⁷O le ala i ai e le iloa e le manu lele e feai, e le vaai i ai foi mata o le aia.

⁸E le savavali i ai manu feai, e le ui ai le leona.

⁹E tago atu le lima o le tagata i le papa alā, na te fulisia mauga ai o latou vae mauga.

¹⁰E foa e ia alāvai i papa; e vaai atu foi ona mata i mea tāua uma.

¹¹E punitia e ia vaitafe ia le tulutulu ifo; na te au mai foi i le malamalama le mea sa lilo.

¹²Ao le poto e maua lea i fea? Po o i fea foi le mea o iai le mafaufau?

¹³E le iloa sona tau e le tagata; e le maua foi i le nuu o tagata ola.

¹⁴Ua fai mai le moana, E le o i ai lea ia te au; ua fai mai foi le sami, E le o ia te au.

¹⁵E le taulia i auro lelei, e le fuatia atu foi ario e faatau a‘i.

¹⁶E le faatatauina i auro mai Ofeira, po o le soama tāua, po o le safaira.

¹⁷E le faatusatusa i ai auro ma maa tioata; e le fesuiaiina foi i teugāauro lelei.

¹⁸E le ta‘ua ramuta ma le kapesa, auā a maua le poto e sili lea i penina.

¹⁹E le faatusatusa i ai le topasi mai Kusa, e le faatatauina i auro lelei.

²⁰O lenei, pe sau mai fea le poto? Po o i fea foi le mea o iai le mafaufau?

²¹Auā ua natia i mata o e ola uma lava, ua lilo foi i manu felelei.

²²Ua fai mai le malaia ma le oti, Ua lagona e o ma taliga lona logo.

²³Ua silasila le Atua i lona ala, o ia lava ua silafia le mea o i ai.

²⁴Auā o loo silasila o ia i tuluiga o le lalolagi; o loo silafia e ia i lalo o le lagi uma;

²⁵ina ia faatatau ai le mamafa o le matagi, ma ia fuatia ai vai i le fua.

²⁶O ona po na ia faia le tulafono mo le ua, ma le ala mo le uila o le faititili;

²⁷Na silafia ai e ia, ma na faaalia mai ai; na ia saunia, ma na suesueina lava.

²⁸Na fetalai mai foi o ia i le tagata, Faauta, o le mata‘u i le Alii, o le poto lava lea; o le ‘alo ese i le amio leaga, o le mafaufau lea.