Read Samoan Old Version Bible – O LE TUSI PAIA IOPU, 33 Bible Online

IOPU, 33 - Samoan Old Version Bible – O LE TUSI PAIA bible

IOPU, 33

¹O lenei, Iopu e, faafogafoga mai ia i la‘u tautalaga, ma liliu mai ou fofoga i a‘u upu uma.

²Faauta, ua ou faamaga atu lo‘u gutu, ua tautala lo‘u laulaufaiva i lo‘u gutu;

³o le faamaoni o lo‘u loto e fai atu ai a‘u upu; e tautala atu o‘u laugutu i le poto e sao ona lelei.

⁴Na faia a‘u e le Agaga o le Atua; o le mānava foi a Le e ona le malosi uma lava ua ola ai a‘u.

⁵Afai ua e mafaia, ina tali mai ia ia te au, ina sauni mai ia ia te au; ina tulai mai ia.

⁶Faauta, o a‘u nei o le sui o le Atua, e pei ona e fetalai mai ai. O a‘u foi, ua faia a‘u i le eleele.

⁷Faauta mai, e le faamatautia oe i so‘u matautia; e le mamafa foi la‘u avega i luga ia te oe.

⁸Ua e fetalai mai lava o loo ou faalogo atu, ua ou lagona atu foi upu o lau fetalaiga, ua faapea mai,

⁹Ua mamā a‘u; ua aunoa ma le solitulafono; ua sao a‘u; e leai foi sa‘u agasala.

¹⁰Faauta, ua ia saili mea e toasa mai ai ia te au, o lona manatu ia te au, o a‘u le ita ia te ia.

¹¹Ua ia tuu o‘u vae i laau faamau, ua ia lamalama i o‘u ala uma.

¹²Faauta, ua e le amiotonu i lenei mea; ou te tali atu ia te oe, auā ua sili le Atua i tagata.

¹³Se a le mea ua e finau atu ai ia te ia? Auā ua ia le faamatala mai se tasi o ana mea.

¹⁴Auā ua fetalai mai le Atua faatasi ma faalua, a ua le manatu i ai tagata.

¹⁵O le miti, o le mea e vaaia i le po, ina o moe gagase tagata, ina o momoe i latou i luga o moega;

¹⁶ona faafaalogo ai lea e ia o taliga o tagata, ma faamauina atu ai le mea ua a‘oa‘oina ai i latou e ia.

¹⁷Ina ia liliueseina le tagata ai lana mea e fai; ia faalilo foi i le tagata le faamaualuga.

¹⁸Ua ia taofi ia te ia ia le oo i le lua, atoa ma lona ola ia le faaumatia i le tao.

¹⁹Ua aoaiina o ia i luga o lona moega i le tiga, ma le tiga tele o ona ivi e le aunoa.

²⁰Ua ‘ino‘ino foi o ia i mea e ‘ai, ua le manao foi i mea suamalie.

²¹Ua faaumatia lona aano, ua le iloa; ua aliali mai ona ivi sa le iloa.

²²Ua faalatalata foi o ia i le tuugamau, ma lona ola i e fasioti.

²³Afai ua ia te ia le Agelu, o le Puluvaga, Le ua sili i le toaafe, e faaali atu i le tagata lana amiotonu.

²⁴Ona alofa lea o ia ia te ia, ma fetalai ane, Laveai mai ia ia te ia, ne‘i alu ifo i le lua; ua ou maua le togiola.

²⁵E toe ola lelei ai lona tino e sili i le tama itiiti, e toe foi o ia i ona po o lona taulealea.

²⁶E tatalo o ia i le Atua, ona finagalo mălie mai ai lea o ia ia te ia; e iloa foi e ia ona fofoga ma le olioli; na te faafoi mai foi i le tagata lana amiotonu.

²⁷E faasagasaga o ia i tagata, ma fai atu, Ua ou agasala, ua ou faia le amio faapiopio, a ua le tauia mai ia te au.

²⁸Na te laveaiina o ia, ina ia le oo i le lua; e iloa foi e ia le malamalama.

²⁹Faauta, ua faia ia mea uma faalua ma faatolu e le Atua i le tagata,

³⁰ina ia faafoisia o ia ai le lua, ina ia faamalamalamaina i le malamalama o tagata ola.

³¹Iopu e, liliu mai ia ou fofoga, ina faafofoga mai ia ia te au; alaala mai ia, ou te tautala atu ai a‘u.

³²Afai e ai sau upu, tali mai ia ia te au; ia e tautala mai; auā ou te loto ina ia ta‘uamiotonuina oe.

³³Afai e leai, ia e faafofoga mai ia te au; alaala mai ia, ou te a‘oa‘o atu ai ia te oe i le poto.