Read Samoan Old Version Bible – O LE TUSI PAIA IOPU, 36 Bible Online

IOPU, 36 - Samoan Old Version Bible – O LE TUSI PAIA bible

IOPU, 36

¹Ua toe fai mai foi Eliu, Ia e onosai mai pea teisi ia te au,

²ou te faaali atu ai ia te oe, auā ua totoe pea upu mo le Atua.

³Ou te aumaia lo‘u poto ai le mea mamao, ou te ta‘uamiotonuina foi le na faia a‘u.

⁴Auā e moni lava, e le pepelo a‘u upu; ua ia te oe le tasi ua faamaoni lona poto.

⁵Faauta, ua silisili ese le Atua, a e le ‘ino‘ino o ia i se tasi, ua silisili ese le malosi o lona finagalo.

⁶Na te le faaola i le ua amio leaga; a e faia e ia le faamasinoga mo e ua puapuagatia.

⁷Na te le ‘alo ona fofoga i e ua amiotonu; a e silasila i tupu i nofoālii; na te faatumauina foi i latou e faavavau, ua faasilisiliina foi i latou.

⁸Afai foi ua noanoatia i latou i maea uamea, ma lavelavea i latou i maea o le puapuaga,

⁹ona faaali ai lea e ia ia te i latou o mea ua latou faia, ma o latou solitulafono, ina ua tele lava.

¹⁰Ua ia faafaalogoina foi o latou taliga i aoaiga; ma fetalai atu, ia latou foi mai nai le amio leaga.

¹¹Afai latou te faalogo ma auauna ia te ia, ona faauma ai lea o latou aso o manuia, ma o latou tausaga o fiafia.

¹²A e afai latou te le faalogo, ona faaumatia ai lea o i latou i le tao, e oti foi i latou e le popoto.

¹³A o e ua loto faalematau, ua latou faaputuina le toasa; latou te le alalaga ia te ia pe a noanoatia i latou e ia.

¹⁴E oti i latou a o taulelea; e iu foi o latou ola faatasi ma e ua faasotoma.

¹⁵Na te laveaiina le ua puapuagatia nai ona puapuaga; na te faafaalogoina foi o latou taliga a o sauaina i latou.

¹⁶E faapea foi ona ia ta‘ita‘ieseina o oe ai le mea va apiapi i le mea lautele e le o i ai se va apiapi; o le mea foi e laulauina i lau laoai e soona lololo lea.

¹⁷A ua e faaatoatoaina le faamasinoga a e amio leaga; e mulimuli le faasala i le faamasinoga.

¹⁸Auā ua i ai le toasa, ia oe, ne‘i aveesea oe e ia i le sasa; ona le faasaoina ai lea oe i se togiola tele.

¹⁹Na te finagalo ea i au oloa? Na te le finagalo lava i auro, po o faulaigāoa uma lava.

²⁰Aua e te manao i le po, e avae ai nuu ai le mea o loo latou i ai.

²¹Ia oe, ne‘i e loto atu i le amio leaga; auā ua sili lou loto i lea mea i lou loto i le puapuaga.

²²Faauta, ua silisili ese le Atua i lona malosi; o ai na te a‘oa‘o e faapei o ia?

²³Po o ai ua togia ia te ia lona ala? O ai foi na te fai atu, Ua e faia amioletonu?

²⁴Ia e manatua ona vivii i ana galuega o loo vaai i ai tagata;

²⁵ua matamata i ai tagata uma lava, ua iloa mamao atu e tagata.

²⁶Faauta, ua silisili ese le Atua, tatou te le iloa foi o ia; e le masino foi le faitau o ona tausaga.

²⁷Auā e aveina ae e ia faaafuafu o vai; e totō ifo le ua e sui a‘i lona ausa, e mauluulu mai ai i ao;

²⁸e totō tele mai ai i luga o tagata.

²⁹E iloa foi ea se tasi ona fofola o le ao, ma le taalili mai o lona fale apitaga?

³⁰Faauta, ua ia fofola i ona luga lona malamalama; ua ia ufiufi foi le iliti tai.

³¹Auā o ia mea ua ia faasalaina ai nuu; ua ia foai mai ai foi mea e ‘ai e tele.

³²Ua ia ufitia ona aao i le uila, na te poloai i ai i se mea e paū i ai.

³³Ua ia faailoa mai lona faititili i luga o tagata, i luga o lafu atoa ma mea e tutupu.