Read Samoan Old Version Bible – O LE TUSI PAIA IOPU, 41 Bible Online

IOPU, 41 - Samoan Old Version Bible – O LE TUSI PAIA bible

IOPU, 41

¹E te mafaia ea ona sisi o leviatana i se mātau, pe taomi lona laulaufaiva i se maea?

²E te mafaia ea ona tuu se maea i lona isu? Pe tui lona auvae i se mātau?

³Na te faateleina ea ni tatalo ia te oe? Pe tautala faaoleole ia te oe?

⁴Lua te osi ea se feagaiga ma ia? E te avea ea o ia e fai ma auauna e faavavau?

⁵Lua le taaalo ea ma ia e pei o se manu lele? Pe e te nonoa ia te ia mo outou teine?

⁶Pe fai a‘i ea se tausamiga e uo? Latou te tufatufa atu ea ia te ia e faatauoa?

⁷E te mafaia ea ona velosia ia lilo lona pa‘u i mea maamaai? Ma lona ulu i tao so‘a i‘a?

⁸Tuu atu ia lou lima i luga ia te ia, ia manatua le taua; e te le toe faia.

⁹Faauta, e fai fua le faamoemoe e maua ia; e le paū ea foi se tasi i le vaai atu ia te ia?

¹⁰E leai se na te faamalosi e faatei ia te ia; o ai foi se tu mai i o‘u luma?

¹¹O ai se na muai aumaia ni mea ia te au, ou te toe taui atu ai? O mea uma lava o i lalo o le lagi o a‘u mea ia.

¹²Ou te le natia ona itu tino, ma le tala i lona malosi, ma le matagofie o lona ofutau.

¹³O ai se susue lona ofu aupito i tua? O ai se oo atu i ona atu nifo e lua?

¹⁴O ai se tatala puipui o lona gutu? E matautia ona atu nifo faataaliolio.

¹⁵E maeu le malosi o ona talita, ua punimau i le faamaufaailoga.

¹⁶Ua sosoo le tasi i le tasi, e le sao le savili i o latou va.

¹⁷Ua fepiitai le tasi i le tasi, ua fesootai, ua le mafai ona faatea eseese.

¹⁸O ona mafatua ua pupula ai le malamalama; o ona mata foi e pei o laumata o le taeao.

¹⁹E o atu sulu ai lona gutu, e oso mai ai aloiafi.

²⁰E alu atu le asu ai ona pogaiisu e pei o se pani ua tapili i ai le afi, po o se ulo ua vevela.

²¹O lana mānava e mu ai malala, e alu atu foi le afi mumū ai lona gutu.

²²E i ai le malosi i lona ua, e saa foi le mata‘u i ona luma.

²³Ua maopoopo le aano o lona manava; ua maaa lea, e le mafaagaeetia.

²⁴Ua maaa lona fatumanava e pei o se maa, ua maaa lava e pei o se maaolo aupito i lalo.

²⁵A tulai o ia, ona fefefe ai lea o toa; ua sese i latou ina ua matautuia.

²⁶E taututa le pelu o lē faasaga atu ia te ia, faapea foi le tao, ma le u fanafana, ma le tao so‘a i‘a.

²⁷Ua tusa ia te ia le uamea ma le ‘au o saito, o le ‘apa memea o le laau pala lea.

²⁸E le sola o ia i le u fanafana, o maa o le maatā e avea ia ma tagutugutu o saito ia te ia.

²⁹Ua tusa ia te ia le uatogi ma tagutugutu o saito; ua ia ‘ata foi i le apoapo o le tao.

³⁰Ua i ona lalo fāsi ipu omea maamaai; na te fofolaina mea matuitui i luga o le palapala.

³¹Ua ia faapupuna le moana e pei o se ulo; ua ia fai le sami e pei o se ipu uu.

³²Ua ia faapupula le ala ua na tuanai; e manatu ai se tasi ua ulusina le moana.

³³E leai se tasi e tusa ma ia i luga o le laueleele, ina ua faia ua leai sona mata‘u.

³⁴Ua vaai ifo o ia i mea maualuluga uma; o ia o le tupu o manu feai uma lava.