Read Samoan Old Version Bible – O LE TUSI PAIA IOPU, 7 Bible Online

IOPU, 7 - Samoan Old Version Bible – O LE TUSI PAIA bible

IOPU, 7

¹E le o iai ea le taua ua tofia i tagata i le lalolagi? Pe le tusa foi o latou aso i aso o le ua galue i le taui?

²E faapei ona naunau le pologa i le paolo, e faapei ona faatalitali atu foi o le ua galue i le taui i lona totogi;

³e faapea lava ona fai mo‘u o masina e tigaina ai, ua tofia foi ia te au o po e puapuagatia ai.

⁴A ou taoto, ona ou faapea lea, po o afea ou te tulai atu ai, ma mavae atu le po? Ua aoina ua ou le mapu i le feliuliuai.

⁵Ua liloia lo‘u tino i tuga, ua to‘ato‘a ai le eleele; ua iliganoa lo‘u pa‘u, ma ua toe sua.

⁶Ua sili ona tele vavave o‘u aso i le si‘a a le laga ie; ua uma foi ua aunoa ma se faamoemoe.

⁷Ia e manatua, o le matagi lava lo‘u ola; e le toe iloa e o‘u mata se mea lelei.

⁸E le toe vaai mai ia te au mata o le sa iloa a‘u; ua e silasila mai ia te au, ona leai lea o a‘u.

⁹Ua taape le ao ua mavae atu, e faapea le ua alu ifo i le tuugamau, e le toe alu ae o ia.

¹⁰E le toe foi mai o ia i lona fale, e le toe iloa o ia i le mea sa i ai o ia.

¹¹O le mea lea ou te le taofi ai lo‘u gutu, ou te tautala i le puapuaga o lo‘u agaga, ou te tagi atu i le tiga o lo‘u loto.

¹²O le sami ea a‘u, po o se tanimo, ua e tofia mai ai se leoleo ia te au?

¹³A a‘u faapea, O lo‘u moega e faamafanafanaina ai a‘u, o lo‘u taotoga e faamāmāina a‘i lo‘u tagi;

¹⁴ona e faafefe mai ai lea ia te au i miti, ua e faamatautia foi a‘u i mea e faaali mai.

¹⁵O lea ou te manao ai ina ia mole o a‘u; e tele lo‘u manao i le oti, a e itiiti o‘u nei ivi.

¹⁶Ou te ‘ino‘ino i ai, ou te le fia ola pea; tuu mai pea ia o a‘u, auā ua faatauvaa lava o‘u aso.

¹⁷Se a ea le tagata, e te faasilisili ai o ia? Ma e manatu mai ai ia te ia?

¹⁸Ma e asiasi mai ai ia te ia i taeao uma, ma tofotofo mai pea lava ia te ia?

¹⁹E te le ‘alo ea ou fofoga ia te au seia afea? E te le se‘i tuuina mai ea ia te au, seia ou folo lo‘u feanuga.

²⁰Ua ou agasala; se a se mea ua ou faia ia te oe, o le ua silasila i tagata? Se a ea le mea ua e fai ai a‘u ma manulauti ia te oe, ua fai ai a‘u ma avega ia te au?

²¹Se a le mea e te le aveeseina ai lo‘u solitulafono, ma faateaina la‘u agasala? Auā e le pine ona ou taoto i le eleele; e te ala saili foi ia te au, a ua le iai a‘u.