Read Samoan Old Version Bible – O LE TUSI PAIA SALAMO, 10 Bible Online

SALAMO, 10 - Samoan Old Version Bible – O LE TUSI PAIA bible

SALAMO, 10

¹Ieova e, se a le mea e te tūtūmamao ai, ma e liliu ese ai i ona po e i ai le puapuaga?

²O le faamaualuga o le tagata amio leaga ua ia matuā faasaua ai i e ua puapuagatia; ua maua i latou i ia lava togafiti na latou manatua.

³Auā ua mitamita lē amio leaga i tu‘inanau o lona loto; o le ua matapeapea foi, ua faaamuia o ia e ia, ua ‘ino‘ino ia Ieova.

⁴O le faasiasia o mata o le ua amio leaga e le saili ai o ia; o ona mafaufau uma, E leai se Atua.

⁵Ua manuia ona ala e le aunoa; ua mamao i luga ia te ia au faamasinoga; ua na ulafia i e ita ia te ia uma lava.

⁶Ua fai ifo ia i lona loto, E le faagaeetia a‘u; e le oo mai se mea leaga ia te au e faavavau.

⁷Ua tumu lona gutu i le fetuu, ma le tau‘ole‘ole, ma le saua; o loo i lalo o lona laulaufaiva le faatiga ma le amio leaga.

⁸Ua nofo ia i mea e lamalama ai i faoa aai, na te fasioti i mea lilo i e le sala; ua lamalama ona mata i le ua tigaina.

⁹Ua lamalama ia i le mea lilo, e pei o le leona i le mea e fale ai; ua lamalama ia ina ia puea e ia le ua puapuagaina; ua puea e ia o le ua puapuagaina, i lona toso mai ia te ia i lana upega.

¹⁰Ua lafotuina ona ua momomo ua pauu foi e ua tigaina i lana ‘au malosi.

¹¹Ua fai ifo o ia i lona loto, Ua galo i le Atua; ua ‘alo ese ona fofoga; na te le silafia e faavavau.

¹²Ieova e, ia e tulai mai; le Atua e, ina sii ia lou aao; aua ne‘i galo ia te oe e ua puapuagaina.

¹³Se a le mea ua ‘ino‘ino ai i le Atua le ua amio leaga? Ua fai ifo i lona loto, E te le suesuea.

¹⁴Ua e silafia lava, auā o oe lava, e te silasila i le tiga ma le ita, ina ia tuu atu ai i lou aao; o le ua tigaina e tuuina o ia e ia ia te oe; o oe lava o le fesoasoani o le ua mātuaoti.

¹⁵Ia e gagau le lima o lē fai amio leaga; o lē agaleaga foi, ia e suesue i lana amio leaga seia e le toe silafia.

¹⁶O Ieova o le Tupu ia e faavavau faavavau lava; ua fano nuu ese nai lona laueleele.

¹⁷Ieova e, ua e faafofogaina le manao o e ua puapuagatia; e faamauina e oe o latou loto, ua liliu mai i ai ou fofoga;

¹⁸ina ia faamasino i le ua mātuaoti ma le ua faasauaina; ina ia le toe faamatau mai le tagata ua tupu mai le eleele.