Read Samoan Old Version Bible – O LE TUSI PAIA SALAMO, 103 Bible Online

SALAMO, 103 - Samoan Old Version Bible – O LE TUSI PAIA bible

SALAMO, 103

¹Lo‘u agaga e, ia e faamanū atu ia Ieova, o mea uma foi o i totonu ia te au ia faamanū i lona suafa paia.

²Lo‘u agaga e, ia e faamanū atu ia Ieova, aua foi ne‘i galo se mea e tasi o ana meaalofa;

³o lē faamagaloina au amio leaga uma lava; o lē faamaloloina ou ma‘i atoa uma;

⁴o lē faaolaina mai lou ola ai le tuugamau; o lē faapaleina oe i le alofa ma le alofa mutimuti vale;

⁵o lē e mălie ai lou manao i mea lelei; o le faafouina lou taulealea faapei o le aeto.

⁶E faia e Ieova mea tonu, ma faamasinoga mo e ua sauaina uma lava.

⁷Na ia faailoa ona ala ia Mose, o ana galuega i le fanauga a Isaraelu.

⁸E alofa mutimuti vale ma alofa fua mai Ieova; e tele gese lona toasa, a e tele lona alofa.

⁹E le aoai mai pea lava ia; e le faamoemoe foi lona toasa e faavavau.

¹⁰E lei faia e ia ia i tatou e tusa ma a tatou agasala; e lei taui mai foi o ia ia i tatou e tusa ma a tatou amio leaga.

¹¹Auā e pei ona maualuga o le lagi i le lalolagi, e faapea ona tele o lona alofa i e matatau ia te ia.

¹²E pei ona vava mamao o sasae ma sisifo, e faapea lava ona faamamao e ia ia i tatou o a tatou solitulafono.

¹³E faapei ona alofa mutumuti vale o le tamā i lana fanau, e faapea lava ona alofa mutimuti vale o Ieova i e matatau ia te ia.

¹⁴Auā ua silafia lava e ia le mea na fai a‘i i tatou; ua manatu ia o le efuefu lava i tatou.

¹⁵O le tagata, e pei o le mutia ona aso; e pei o le fuga o le vao, e faapea ona fuga mai o ia;

¹⁶auā a agi mai i ai le matagi, ona leai lea o ia; ua le toe iloa foi o ia i le mea sa i ai.

¹⁷A o le alofa o Ieova, mai le vavau lava lea, e oo i le faavavau i e matatau ia te ia; o lana amiotonu foi e oo i le fanau a latou fanau,

¹⁸i e tausi i lana feagaiga, o e manatua foi ana poloaiga e fai ai.

¹⁹Ua faatumauina e Ieova o lona nofoālii i le lagi; ua pule aoao foi lona malo.

²⁰Faamanū atu ia ia Ieova outou ana agelu o e malolosi tele, o e faia lana afioga, o loo faalogo i lona siufofoga.

²¹Faamanū atu ia ia Ieova outou ana ‘au uma lava, o outou ana auauna, o e faia lona finagalo.

²²Faamanū atu ia ia Ieova o mea uma na ia faia i mea uma lava ua pule i ai o ia. Lo‘u agaga e, ia e faamanū atu ia Ieova.