Read Samoan Old Version Bible – O LE TUSI PAIA SALAMO, 104 Bible Online

SALAMO, 104 - Samoan Old Version Bible – O LE TUSI PAIA bible

SALAMO, 104

¹Lo‘u agaga e, ia e faamanū atu ia Ieova; Ieova e, lo‘u Atua, e matuā silisili lava oe, e ofu oe i le viiga ma le matagofie.

²O loo e pulupulu i le malamalama pei o se ie pulupulu; o loo e fofola le lagi faapei o se ie puipui.

³O loo faia e ia o ona afeafe aupitoaluga i le vai; o loo faia e ia o ao mona nofoa faataavalevale; e feafioai o ia i apaau o le matagi.

⁴O lē fai o matagi ma ana agelu, o ana auauna o le afi mumū ia.

⁵O le na faavaeina le lalolagi i luga o ona lava faavae, ina ia le gaee e faavavau faavavau lava.

⁶Ua e ufitia ia i le moana e pei o se ofu; o le vai ua lofia ai mauga.

⁷O lau aoai atu na sola ai o ia, na taalise atu i le leo o lou faititili.

⁸Ua o ae mauga, ua o ifo vanu, e oo i lea lava mea na e saunia mo i latou.

⁹Ua e tuuina i ai le tuaoi ne‘i sopoia e ia, ne‘i toe foi mai ia e lofia le laueleele.

¹⁰Ua aunai atu e ia o vaipuna i vanu, ua tafe ia i va o mauga.

¹¹E inu ai manu uma lava o le vao, e malilie ai foi asini o le vao.

¹²E nonofo latalata ane i ai o manu felelei, e lagona o latou leo i totonu o la laau.

¹³O lē faasūsū mauga mai ona afeafe aupitoaluga; o fua o au galuega e ma‘ona ai le laueleele.

¹⁴Ua faatupu e ia mutia mo manu vaefa, atoa ma mea totō e aoga i tagata; e faatupu mai le mea e ‘ai i le eleele;

¹⁵ma le uaina e faafiafia ai loto o tagata, ina ia pupula ai o latou mata e sili i le suāuu, o le mea e ‘ai foi e malosi ai tagata.

¹⁶Ua lauolaola laau o Ieova, o arasi o Lepanona na totōina e ia.

¹⁷E fai ai e manu iti o latou ofaga; o le kasita o i perosi lona fale.

¹⁸O mauga maualuluga mo ‘oti o le vao ia; o papa o mea ia e malu ai sefanai.

¹⁹Na ia faia le masina e atofaina ai aso; ua iloa e le la le mea e goto i ai.

²⁰Ua e faia le pouliuli, ona po lava lea, e fetolofi mai ai o manu feai uma lava o le vao.

²¹Ua tagi leona taanoa i mea e saeia, ma sailiili mai i le Atua la latou mea e ‘ai.

²²Ua alu ae le la, ona faapotopotoina ai lea o i latou, ma taooto i o latou ana.

²³E alu atu ai le tagata i lana galuega, ma ana mea e fai seia oo i le afiafi.

²⁴Ieova e, ua matuā tele au galuega. Ua e faia ia mea uma i le poto; ua tumu le lalolagi i au oloa.

²⁵O lenei sami tele ma le lautele, o i ai mea fetolofi e le masino, o meaola iti atoa ma e tetele.

²⁶E feoai ai vaa; o le leviatana na e faia e taalo ai.

²⁷O loo faatalitali ia mea uma ia te oe, ina ia e avatu i ai la latou mea e ‘ai i ona aso e tatau ai;

²⁸e te avatua i ai, ua faaputuina e i latou; e te faamafolafola lou aao, ua maoona ai i latou i mea lelei.

²⁹Ua ‘alo ou fofoga, ona atuatuvale ai lea o i latou; ua e aveeseina a latou mānava, ona mamate ai lea, ua toe liu efuefu.

³⁰E te auina atu lou Agaga, ua faia ai i latou; e te toe fuataiina foi le fogaeleele.

³¹E tumau le mamalu o Ieova e faavavau; e fiafia Ieova i ana mea na fai.

³²E silasila mai o ia i le lalolagi, ona gatete ai lea; e papai atu ia i mauga, ona pupusa ai lea.

³³Ou te pese ia Ieova i lo‘u nei olaga; ou te fai pesega i lo‘u Atua a o au ola.

³⁴E mălie lo‘u mafaufau ia te ia; ou te fiafia lava a‘u ia Ieova.

³⁵E faaumatia o e agasala ai le lalolagi, ma e amio leaga e le toe i ai i latou. Lo‘u agaga e, ia e faamanū atu ia Ieova. Ia outou vivii atu ia Ioa.