Read Samoan Old Version Bible – O LE TUSI PAIA SALAMO, 105 Bible Online

SALAMO, 105 - Samoan Old Version Bible – O LE TUSI PAIA bible

SALAMO, 105

¹Vivii atu ia outou ia Ieova; valaau atu ia i lona suafa; ia outou faailo atu i nuu ana mea na fai.

²Ia pepese outou ia te ia, ia outou fai pesega ia te ia; talatala atu ia outou i ona vavega uma lava.

³Ia outou mitamita i lona suafa paia; ia olioli loto o e sailiili ia Ieova.

⁴Sailiili ia outou ia Ieova ma lona malosi; sailiili i ona fofoga, aua le aunoa.

⁵Ia outou manatua ana mea mamana na ia faia, o ona vavega, atoa ma faamasinoga a lona fofoga;

⁶o outou le fanauga a lana auauna o Aperaamo, o atalii o Iakopo na ia filifilia.

⁷O ia lava o Ieova lo tatou Atua; o i le lalolagi uma lava ana faamasinoga.

⁸E manatua e ia e faavavau o lana feagaiga, o le upu na ia poloai mai i tupulaga e afe.

⁹O le feagaiga sa la osia ma Aperaamo, ma lana tautoga ia Isaako;

¹⁰ua ia faamauina foi ia Iakopo e fai ma tulafono, o le feagaiga e faavavau mā Isaraelu;

¹¹ua faapea atu ia te ia, Ou te avatu ia te oe le laueleele o Kanana, o le vaega lea o lo outou tofi;

¹²ina o toaitiiti i latou, e toaitiiti lava, mona o tagata ese i lea mea

¹³Na feoai foi i latou i lea nuu ma lea nuu, nai le tasi itu malo i le tasi nuu.

¹⁴Ua le tuua e ia ia faasaua se tagata ia i latou; ua ia aoai atu foi i tupu ona o i latou.

¹⁵Ua faapea atu i ai, Aua le tago i e ua ou faauuina, aua foi le agaleaga atu i a‘u perofeta.

¹⁶Ua ia valaau foi i le oge e oo i le nuu, ua ia gagau le tootoo o le mea e ‘ai uma.

¹⁷Ua auina atu e ia o le tagata e muamua atu ia i latou, o Iosefa lea na faatauina e fai ma auauna.

¹⁸Ua latou faatiga i ona vae i le noanoaga; ua oo lava o ia i le uamea;

¹⁹ua oo i le tau na taunuu ai lana afioga, o le afioga a Ieova na tofotofo ai ia te ia.

²⁰Ua aauina atu nisi e le tupu e tatala ia te ia; o le na pule i le nuu ua faasa‘oloto ia te ia.

²¹Ua na tofia o ia e fai ma alii i lona aiga, ma ia pule i ana mea uma lava.

²²Ina ia noanoa e ia alii na ia te ia i lana faitalia, ma a‘oa‘o atu i lona au faipule ia popoto.

²³Ua oo atu foi Isaraelu i Aikupito, ua āumau foi Iakopo i le nuu o Hamo.

²⁴Ua ia faatoateleina foi lona nuu, ua na faamalolosia i latou e sili i e na faasaua ia i latou.

²⁵Ua ia liua foi o latou loto e ‘ino‘ino atu i lona nuu, ma ia togafiti pepelo i ana auauna.

²⁶Ua ia auina atu lana auauna o Mose, o Arona foi na filifilia e ia.

²⁷Ua la tuu atu ia i latou ona lava faailoga, o vavega foi i le nuu o Hamo.

²⁸Ua na auina atu le pouliuli, i le ua faapouliuligia ai, e lei foua foi lana afioga.

²⁹Ua ia liua o latou vai i le toto, ma faamamate i o latou i‘a.

³⁰Ua faatutupu tele mai o rane i lo latou laueleele, ua oo lava i afeafe o latou tupu.

³¹Ua ia fetalai ane, ona o mai ai lea o le vao garova ma ‘utu, ua oo i o latou nuu uma lava.

³²Ua ia tuuina atu ia i latou o le uato‘a e sui a‘i le ua, ma le afi mumū i lo latou nuu.

³³Ua na taia foi o latou vine ma o latou mati; ua gauia foi laau i lo latou nuu.

³⁴Ua fetalai ia, ona o mai lea o sē akerise, ma sē aleka e le mafaitaulia.

³⁵Ua ‘aina ai le vao iti uma i lo latou nuu, ua ‘aina lava le fua o lo latou laueleele.

³⁶Ua ia fafasi i ulumatua uma lava i lo latou nuu, o le amataga lea o lo latou malosi uma.

³⁷Ua ia aumaia i latou ma le ario atoa ma le auro; e leai foi se tasi sa vaivai i o latou itu aiga.

³⁸Ua fiafia Aikupito ina ua o atu i latou; auā na maua i latou i le fefe ona o i latou.

³⁹Ua ia fofola le ao e fai ma faapaologa, o le afi foi e faamalamalama a‘i le po.

⁴⁰Ua ole atu i latou, ona avatu lea e ia o salu, ma le mea e ‘ai mai le lagi ua ia faamaoona ai ia te i latou.

⁴¹Ua ia susue le papa, i le ua puna mai ai le vai; ua tafe i le nuu naumati, o le vaitafe lava.

⁴²Auā ua ia manatua lana afioga paia i lana auauna o Aperaamo.

⁴³Ua na aumaia lona nuu ma le olioli, o e na filifilia e ia ua ia aumaia ma le leo fiafia.

⁴⁴Ua ia avatu foi ia i latou o fanua o nuu ese; na maua foi e i latou o mea sa galulue ai nuu;

⁴⁵ina ia tausi i latou i ana sauniga, ma usiusitai i ana tulafono. Ia outou vivii atu ia Ioa.