Read Samoan Old Version Bible – O LE TUSI PAIA SALAMO, 107 Bible Online

SALAMO, 107 - Samoan Old Version Bible – O LE TUSI PAIA bible

SALAMO, 107

¹Vivii atu ia outou ia Ieova, auā e lelei lava o ia, auā e faavavau lava lona alofa.

²Ia faapea lava o e ua faaolaina e Ieova, o i latou na ia faaolaina nai le lima o lē faasaua,

³ma ua faapotopotoina i latou mai nuu, mai sasae ma sisifo, mai le itu i matu ma le itu i toga.

⁴Na feseai i latou i le vao, i le ala e lei uia; e lei maua e i latou se aai e nonofo ai.

⁵Sa matelaina i latou, ma fia inu, na lailoa o latou loto i totonu ia i latou.

⁶Ona alalaga lea o i latou ia Ieova i lo latou puapuaga; na ia laveai ia te i latou nai o latou tiga.

⁷Na ia ta‘ita‘iina foi i latou i le ala tonu, ina ia latou o atu ai i se aai e nonofo ai.

⁸Ia vivii atu i latou ia Ieova ona o lona alofa, ma ona vavega na fai i le fanau a tagata.

⁹Auā ua na faamălie i le tagata fia inu, o le tagata matelaina foi ua ma‘ona mai ia te ia i le mea lelei.

¹⁰O e nonofo i le pouliuli ma le ata o le oti, e ua noanoatia i le tiga ma le uamea;

¹¹auā na latou fouvale i afioga a le Atua, ma latou ‘ino‘ino i le pule a lē Silisili ese;

¹²o le mea lea na ia faamaulaloina ai o latou loto i le galuega mamafa; na pauu i latou, a e leai se fesoasoani.

¹³Ona latou alalaga atu lea ia Ieova i lo latou puapuaga; na ia faaolaina i latou nai o latou tiga.

¹⁴Na ia aumaia i latou nai le pouliuli ma le ata o le oti, ua na motusia foi o latou noanoaga.

¹⁵Ia vivii atu i latou ia Ieova ona o lona alofa, ma ona vavega na fai i le fanau a tagata.

¹⁶Auā na ia lepeti i puipui ‘apa memea, ma ua vavaeina faamau uamea.

¹⁷O tagata vālea ona o lo latou solitulafono, ma la latou amio leaga, ua faatigaina ai i latou;

¹⁸ua ‘ino‘ino i latou i mea e ‘ai uma lava, ua faalatalata foi i latou i faitotoa o le oti.

¹⁹Ona alalaga lea o i latou ia Ieova i lo latou puapuaga; na ia faaolaina i latou nai o latou tiga.

²⁰Ua ia auina atu lana afioga, ma faamalolo ia i latou, ma laveaiina ai nai lo latou malaia.

²¹Ia vivii atu i latou ia Ieova ona o lona alofa, ma ona vavega na fai i le fanau a tagata.

²²Ia latou fai taulaga foi i taulaga o le viiga, ma ta‘u atu ma le olioli ana galuega.

²³O i latou o e folau i vaa i le sami, o e fai galuega i le vasa tele;

²⁴o i latou ia latou te vaaia galuega a Ieova, ma ona vavega e fai i le moana.

²⁵Auā ua fetalai ane ia, ma faatupuina le afā, ua laga ai ona peau; e o ae i latou i le lagi,

²⁶e toe o ifo i lalo, ua liu suāvai ai o latou loto i le atuatuvale;

²⁷e tautevateva i latou ma tausuai pei o le tagata onā, ua faaumatia foi o latou atamamai uma lava.

²⁸Ona latou alalaga atu lea ia Ieova i lo latou puapuaga; ua ia aumaia i latou nai o latou tiga.

²⁹Ua liua e ia le afā i le malū, ua taoto ia te ia le au peau.

³⁰Ona latou fiafia lea, auā ua malū; ua na ta‘ita‘iina foi i latou i le taulaga na latou loto i ai.

³¹Ia vivii atu i latou ia Ieova ona o lona alofa, ma ona vavega na fai i le fanau a tagata.

³²Ia latou faaneenee ia te ia i le faapotopotoga o le nuu, ma ia vivii atu ia te ia i le saofaiga a toeaina.

³³E liua e ia o vaitafe e fai ma vao, o vaipuna foi e fai ma fanua naumati;

³⁴o le fanua lafulemu e fai ma mea lafulafua, ona o le amio leaga a e nonofo ai.

³⁵E liua e ia le vao e fai ma vailepa, o le fanua naumati foi e fai ma vaipuna.

³⁶Na te faanofo ai foi e ua matelaina; e sauniuni ai foi e i latou o le aai e nonofo ai;

³⁷ma latou lulu ai saito i fanua, ma totō ai tovine, e fua mai ai ona fua e tele.

³⁸E faamanuia foi e ia i latou, e matuā faatoateleina foi i latou; e le faaitiitia foi e ia a latou manu.

³⁹Ua faatoaitiitia foi i latou ma faamaulaloina, ona o le faasaua, ma le agaleagaina, ma le faanoanoa.

⁴⁰E faainosia e ia o alii, ma faaseseina i latou i le mea gaogao, e le o i ai se ala.

⁴¹A e faaeaina e ia o le ua mativa nai le puapuaga, ma tuuina atu o aiga mo ia, e pei o se lafu mamoe.

⁴²E iloa atu e ua amiotonu ma latou olioli ai; a o e amio leaga uma lava e mapuni ai o latou gutu.

⁴³O le ua poto na te tausia nei mea; e iloa e i latou o mea alofa a Ieova.