Read Samoan Old Version Bible – O LE TUSI PAIA SALAMO, 108 Bible Online

SALAMO, 108 - Samoan Old Version Bible – O LE TUSI PAIA bible

SALAMO, 108

¹Le Atua e, ua mau lo‘u nei loto, ou te pese lava, e fai pesega lo‘u lava mamalu.

²Ala mai ia le napeli ma le kitara, ou te ala i le taeao lava.

³Ieova e, ou te vivii ia te oe i luma o le nuu, ou te fai pesega foi ia te oe i luma o tagata.

⁴Auā ua sili lou alofa i le maualuga o le lagi, o lou faamaoni foi ua oo i ao.

⁵Le Atua e, ia faasilisiliina oe i le lagi, ia i ai i le lalolagi uma lou mamalu.

⁶Ina ia laveaiina au pele, ia e faaola mai i lou aao taumatau, ma ia e tali mai ia te au.

⁷Ua fetalai mai le Atua i lona malumalu, Ou te fiafia, ou te tofitofia Sekema, o le vanu o Sukota ou te fuafuatia lea.

⁸O loo ia te au Kiliata, o loo ia te au Manase; e fai foi Efaraima ma malosi o lo‘u ulu; o la‘u faipule, o Iuta lea.

⁹O Moapi, o le ipu lea ou te mulumulu ai; ou te lafoina lo‘u seevae i Etoma; ou te alaga i lo‘u manumalo ia Filisitia.

¹⁰O ai se na te avea a‘u i le aai nofo ‘olo? O ai se na te ta‘ita‘iina a‘u i Etoma?

¹¹E le o oe ea le Atua, sa e lafoaiina mai i matou, ma ua e le afio atu, o oe le Atua e, faatasi ma la matou itu taua?

¹²Foai mai ia le fesoasoani ia te i matou i le puapuaga, auā e le aoga le olataga mai tagata.

¹³O le Atua lava e fai ai i matou ma toa, auā o ia lava na te solia e ua faasaua mai ia i matou.