Read Samoan Old Version Bible – O LE TUSI PAIA SALAMO, 11 Bible Online

SALAMO, 11 - Samoan Old Version Bible – O LE TUSI PAIA bible

SALAMO, 11

¹Ou te faalagolago ia Ieova; se a le mea tou te fai mai ai ia te au, Ina sola ia e pei o le manulele i lo outou mauga?

²Auā, faauta, o e fai amio leaga ua latou lolou le aufana, ua latou tuu le u i le fu‘a, e fana faalilolilo ai i e ua tonu o latou loto.

³Auā ua fulisia faavae; se a se mea e mafai ai le tagata amiotonu ona fai?

⁴O Ieova o i lona malumalu paia o ia; o Ieova o loo i le lagi lona nofoālii; e silasila mai ona fofoga, e tofotofo le fanau a tagata e ona laufofoga.

⁵E tofotofo e Ieova i le ua amiotonu; a ua inosia e lona finagalo lē fai amio leaga, ma lē fiafia i le faasaua.

⁶E faatotō faaua mai e ia i luga o e fai amio leaga o mailei, o le afi ma le teio, o le matagi foi e manunu ai; o le tofi lea o la latou ipu.

⁷Auā o Ieova lē amiotonu e fiafia o ia i le amiotonu; e silasila ona fofoga i le ua amio sa‘o.