Read Samoan Old Version Bible – O LE TUSI PAIA SALAMO, 115 Bible Online

SALAMO, 115 - Samoan Old Version Bible – O LE TUSI PAIA bible

SALAMO, 115

¹Aua ne‘i ia te i matou, Ieova e, aua ne‘i ia te i matou, a ia tuuina atu le viiga i lou suafa, ona o lou alofa ma lou faamaoni.

²Se a le mea e fai mai ai nuu ese, O ifea o i ai lo latou Atua?

³A o lo matou Atua, o i le lagi lava ia; ua faia e ia o mea uma ua ia finagalo i ai.

⁴O latou tupua, o ario ma auro ia, o le galuega a lima o tagata.

⁵E fai o latou gutu, a e le feganavai i latou; e fai o latou mata, a e le vaai i latou;

⁶e fai o latou taliga, a e le faalogo i latou; e fai o latou isu, a e le sogisogi i latou;

⁷e fai o latou lima, a e le fetagofi i latou; e fai o latou vae, a e le savavali i latou; e leai se leo i o latou faaī.

⁸O e faia ia mea ua tutusa lava ma i latou; o i latou uma o e faatuatua i ai.

⁹Isaraelu e, ia e faatuatua ia Ieova; o ia lava lo latou fesoasoani ma lo latou talita.

¹⁰Le aiga o Arona e, faatuatua ia outou ia Ieova; o ia lava lo latou fesoasoani ma lo latou talita.

¹¹Outou na, o e matatau ia Ieova, ina faatuatua ia ia Ieova; o ia lava lo latou fesoasoani ma lo latou talita.

¹²Ua manatu mai Ieova ia i tatou; e faamanuina mai e ia; e faamanuia e ia le aiga o Isaraelu; e faamanuia e ia le aiga o Arona.

¹³E faamanuia mai e ia i e matatau ia Ieova, o tagatānuu atoa ma alii.

¹⁴E faaopoopoina ia te outou e Ieova, o outou atoa ma la outou fanau.

¹⁵O loo faamanuia mai outou e Ieova, o le na faia le lagi atoa ma le lalolagi.

¹⁶O le lagi, o le lagi lava, e ia Ieova lea; a ua tuuina mai e ia le lalolagi mo le fanau a tagata.

¹⁷E le vivii atu ia Ioa e ua oti, ma i latou uma o e ō ifo i le mea taaligoligoa.

¹⁸A o i tatou nei, tatou te faamanū atu ia Ioa, e afua mai nei lava, a e oo i le faavavau. Ia outou vivii atu ia Ioa.