Read Samoan Old Version Bible – O LE TUSI PAIA SALAMO, 116 Bible Online

SALAMO, 116 - Samoan Old Version Bible – O LE TUSI PAIA bible

SALAMO, 116

¹Ou te alofa, auā ua faafofoga mai Ieova i lo‘u leo ma a‘u aioi.

²Auā na liliu mai ona fofoga ia te au, o lea ou te valaau ai ia te ia i lo‘u olaga.

³Na siomia a‘u i mailei e oti ai; na maua a‘u e puapuaga o le tuugamau; na maua a‘u e le puapuaga ma le faanoanoa.

⁴Ona ou valaau atu lea i le suafa o Ieova, Ieova e, ou te aioi atu ia e laveai mai ia te au.

⁵O Ieova o lē alofa fua ma lē amiotonu ia; o lo tatou Atua, e alofa mutimuti vale ia.

⁶E tausi e Ieova i e faigofie; sa vaivai a‘u, ona faaola mai lea o ia ia te au.

⁷Lo‘u agaga e, ia e foi atu i lou mapusaga; auā ua agalelei mai Ieova ia te oe.

⁸Auā ua e laveai mai ia te au nai le oti, o o‘u mata ne‘i tagi, ma o‘u vae ne‘i paū.

⁹Ou te savali i luma o Ieova i nuu o tagata ola.

¹⁰Na ou faatuatua, o le mea lea na ou tautala atu ai; o a‘u nei sa matuā tigaina a‘u.

¹¹O a‘u nei sa ou faapea atu i lo‘u popole, Ua pepelo tagata uma lava.

¹²Se a se mea ou te taui a‘i atu ia Ieova ona o lona agalelei mai uma lava ia te au?

¹³Ou te avae le ipu o le olataga, ma ou valaau atu i le suafa o Ieova.

¹⁴Ou te avatua ia Ieova i luma o lona nuu uma lava o Ieova na ou tauto ai.

¹⁵E silisili i le manatu o Ieova le oti o ona tagata amio Atua.

¹⁶Ou te aioi atu, Ieova e, o lau auauna lava a‘u, o lau auauna a‘u nei, o le tama a lau auauna fafine.

¹⁷Ua e tatala mai i o‘u noanoaga. Ou te fai le taulaga o le viiga ia te oe, ou te valaau atu foi i le suafa o Ieova.

¹⁸Ou te avatua ia Ieova i luma o lona nuu uma lava o mea na ou tauto ai, i lotoā o le fale o Ieova,

¹⁹i totonu lava ia te oe, Ierusalema e. Ia outou vivii atu ia Ioa.