Read Samoan Old Version Bible – O LE TUSI PAIA SALAMO, 136 Bible Online

SALAMO, 136 - Samoan Old Version Bible – O LE TUSI PAIA bible

SALAMO, 136

¹Ia outou vivii atu ia Ieova, auā e lelei o ia; auā e faavavau lava lona alofa.

²Vivii atu outou i le Atua o atua; auā e faavavau lava lona alofa.

³Vivii atu outou i le Alii o alii; auā e faavavau lava lona alofa.

⁴O lē faia vavega tetele, na o ia lava; auā e faavavau lava lona alofa.

⁵O le na faia le lagi i le poto; auā e faavavau lava lona alofa.

⁶O le na fofola le lalolagi i luga o le vai; auā e faavavau lava lona alofa.

⁷O le na faia malamalama tetele; auā e faavavau lava lona alofa;

⁸o le la e pule i le ao; auā e faavavau lava lona alofa;

⁹o le masina ma fetu e pule i le po; auā e faavavau lava lona alofa.

¹⁰O le na fasia Aikupito, o a latou ulumatua lava; auā e faavavau lava lona alofa.

¹¹O le na aumaia Isaraelu nai ia i latou; auā e faavavau lava lona alofa;

¹²i le aao malosi ma le aao faaloaloa; auā e faavavau lava lona alofa.

¹³O le na vaea le sami Ulaula i vaega; auā e faavavau lava lona alofa;

¹⁴ma na faaui ane ai Isaraelu; auā e faavavau lava lona alofa;

¹⁵a ua lafoina e ia o Farao ma ana ‘au i le sami Ulaula; auā e faavavau lava lona alofa.

¹⁶O le na ta‘ita‘iina atu lona nuu i le vao; auā e faavavau lava lona alofa.

¹⁷O le na fasia tupu sili; auā e faavavau lava lona alofa;

¹⁸ma na fasiotia tupu mamalu; auā e faavavau lava lona alofa;

¹⁹o Sekono le tupu o sa Amorī; auā e faavavau lava lona alofa;

²⁰ma Oko le tupu o Vasana; auā e faavavau lava lona alofa.

²¹Ua na au mai foi lo latou laueleele e fai ma tofi; auā e faavavau lava lona alofa;

²²o le tofi lava o lana auauna o Isaraelu; auā e faavavau lava lona alofa.

²³O le na manatua i tatou, ina ua faamaulaloina i tatou; auā e faavavau lava lona alofa;

²⁴ma na laveai mai ia i tatou i e na saua mai; auā e faavavau lava lona alofa.

²⁵O lē foaiina mea e ‘ai i meaola uma lava; auā e faavavau lava lona alofa.

²⁶Ina vivii atu ia outou i le Atua o le lagi; auā e faavavau lava lona alofa.