Read Samoan Old Version Bible – O LE TUSI PAIA SALAMO, 138 Bible Online

SALAMO, 138 - Samoan Old Version Bible – O LE TUSI PAIA bible

SALAMO, 138

¹Ou te vivii atu ia te oe ma lo‘u loto atoa; ou te fai pesega ia te oe i luma o atua.

²Ou te ifo i lou malumalu paia, ou te vivii atu foi i lou suafa ona o lou alofa ma lou faamaoni; auā ua e faasilisili lau afioga i lou suafa uma.

³O le aso na ou valaau atu ai ia te oe, ua e tali mai ai ia te au; na e faateleina mai le malosi ia te au.

⁴Ieova e, e vivii atu ia te oe o tupu uma lava o le lalolagi, pe a latou faalogo i afioga a lou fofoga.

⁵E pepese foi i latou i ala o Ieova; auā e tele le mamalu o Ieova.

⁶Auā o loo maualuga Ieova, a e silasila mai o ia i le ua faamaulalo; a o le ua faamaualuga, e silafia mamao mai e ia.

⁷A a‘u savali i totonu o puapuaga, e te faaolaola mai ia te au; e te faaoo atu foi lou aao i le ita o e ita mai ia te au; e te faaola mai ia te au i lou aao taumatau.

⁸E faataunuuina e Ieova o mea uma mo a‘u; Ieova e, e oo i le faavavau lou alofa; aua e te tuulafoaiina le galuega a ou aao.