Read Samoan Old Version Bible – O LE TUSI PAIA SALAMO, 146 Bible Online

SALAMO, 146 - Samoan Old Version Bible – O LE TUSI PAIA bible

SALAMO, 146

¹Ia outou vivii atu ia Ioa. Lo‘u agaga e, ia e vivii atu ia Ieova.

²Ou te vivii atu ia Ieova a o ou ola; ou te fai pesega i lo‘u Atua a o ou tumau i le ola nei.

³Aua tou te faatuatua i alii, po o le fanau a tagata, e le o i ai se olataga.

⁴E alu ese lona agaga, e foi atu i le eleele na i ai o ia; e faaumatia i lea lava aso ona manatunatu.

⁵Amuia le tagata o i ai le Atua o Iakopo e fai mona fesoasoani; o i ai lona faamoemoe ia Ieova lona Atua;

⁶o le na faia le lagi atoa ma le lalolagi, o le sami ma mea uma o i ai; o le na te tausia le faamaoni e faavavau.

⁷O le na te faia le faamasinoga mo e o sauaina; na te avatua le mea e ‘ai i e o fia aai; e tatala e Ieova i e ua noanoatia.

⁸E faafepulafia e Ieova e ua tauaso; e faatutusa‘oina e Ieova e ua faano‘uno‘u; e alofa Ieova i e amiotonu.

⁹O Ieova na te tausia tagata ese; e fai ma lagolago mo le ua aumatuā ma le fafine ua oti lana tane; a o le ala o e ua amio leaga e faapiopioina e ia.

¹⁰E pule Ieova e faavavau lava; Siona e, e pule lou Atua e āu tupulaga. Ia outou vivii atu ia Ioa.