Read Samoan Old Version Bible – O LE TUSI PAIA SALAMO, 148 Bible Online

SALAMO, 148 - Samoan Old Version Bible – O LE TUSI PAIA bible

SALAMO, 148

¹Ia outou vivii atu ia Ioa. Ia outou vivii atu ia Ieova mai le lagi; ia outou vivii atu ia te ia i mea maualuluga.

²Ia vivii atu ia te ia outou ana agelu uma lava; vivii atu ia te ia outou ana ‘au uma lava.

³Ia vivii atu ia te ia le la ma le masina; ia vivii atu ia te ia outou fetu uma o loo fepulafi mai.

⁴Ia vivii atu ia te ia le lagi o lagi, ma vai o loo i luga o le lagi.

⁵Ia latou vivii atu i le suafa o Ieova; auā o ia na fetalai ane, ona faia lava lea.

⁶Na ia faatumauina foi i latou e faavavau faavavau lava; na faia e ia le tulafono, e le solia lava.

⁷Ia vivii atu ia Ieova ai le lalolagi o tanimo ma mea loloto uma;

⁸o le afi ma le uato‘a, o le kiona ma le ausa; o le matagi e afā ai, o loo faia lana afioga.

⁹O mauga tetele, ma mauga iti uma lava; o laau e fua mai, ma arasi uma lava.

¹⁰O manu feai, ma manu vaefa uma; o mea fetolofi, ma manu felelei.

¹¹O tupu o le lalolagi, ma nuu atoa uma lava; o alii, ma faamasino uma o le lalolagi.

¹²O taulelea atoa ma teine, o toeaina atoa ma tama;

¹³ia latou vivii atu i le suafa o Ieova; auā ua na o lona suafa e mamalu; o lona viiga ua sili lea i le lalolagi atoa ma le lagi.

¹⁴Ua faamaualugaina foi e ia le nifo o lona nuu, o le viiga o ona tagata amio Atua uma; o le fanauga a Isaraelu, o le nuu o loo latalata ia te ia. Ia outou vivii atu ia Ioa.