Read Samoan Old Version Bible – O LE TUSI PAIA SALAMO, 19 Bible Online

SALAMO, 19 - Samoan Old Version Bible – O LE TUSI PAIA bible

SALAMO, 19

¹Ua tala mai e le lagi le mamalu o le Atua; ua faaalia foi e le va nimonimo le galuega a ona aao.

²O loo ta‘u atu le upu e le tasi aso i le tasi aso, o loo faailoa foi le poto e le tasi po i le tasi po.

³E leai se gagana, e leai foi ni upu, e le lagona o latou leo.

⁴Ua oo atu lo latou leo i le lalolagi uma lava, ma a latou upu i tuluiga o le atu laulau. Ua na tuu i ai le fale ie mo le la;

⁵o ia foi, e faapei o se faatoafaiavā ua sau mai lona afeafe; e fiafia o ia e pei o se tagata fitafita e tamo‘e i le ala.

⁶O lona alu atu, mai le tasi tuluiga o le lagi lea, ua oo foi lana faataamilosaga i le tasi ona tuluiga; e leai foi se mea e lilo i lona vevela.

⁷E sao le tulafono a Ieova, e faafoisia mai ai le agaga; e faamaoni poloaiga a Ieova, e faapotoina ai le ua faigofie.

⁸E tonu feau a Ieova, e faafiafia ai le loto; e mamā poloaiga a Ieova, e malamalama ai mata.

⁹E mamā le mata‘u ia Ieova, e tumau e faavavau; o faamasinoga foi a Ieova e moni ia ma tonu uma lava.

¹⁰E silisili ona lelei i le auro, o le auro e sili ona lelei e tele; e sili foi ona suamalie i lo le meli, o le meli ua sisina ifo.

¹¹Ua apoapoaiina mai ai foi lau auauna; e tele foi le taui pe a tausi i ai.

¹²O ai ea na te iloa amio sese? Ia e faamagalo ia te au i agasala lilo.

¹³Ia e taofi foi i lau auauna i agasala faamaualuga; aua ne‘i pule ia ia te au ona sao ai lea o la‘u amio, ou te le nofo sala foi i le leaga sili.

¹⁴Ia mālie foi ia te oe upu a lo‘u gutu, ma mafaufauga o lo‘u loto, Ieova e, lo‘u papa ma le na te togiolaina a‘u.