Read Samoan Old Version Bible – O LE TUSI PAIA SALAMO, 25 Bible Online

SALAMO, 25 - Samoan Old Version Bible – O LE TUSI PAIA bible

SALAMO, 25

¹Ieova e, ou te faanaunau atu ia te oe ma lo‘u loto.

²Lo‘u Atua e, ou te faatuatua ia te oe; aua ne‘i faamaina a‘u; aua ne‘i mitamita mai ia te au o e ita mai ia te au.

³O i latou uma foi o e faatalitali ia te oe, aua ne‘i faamaina i latou; e faamaina o e fai fua a latou amio pepelo.

⁴Ieova e, ia e faailoa mai ia te au ou ala; ia e a‘oa‘o mai ia te au i ou magāala.

⁵Ia e ta‘ita‘i mai ia te au i le mea moni mai ia te oe, ma a‘oa‘o mai ia te au, auā o oe o le Atua o lo‘u olataga; ou te faatalitali ia te oe i le aso atoa.

⁶Ieova e, ia e manatua lou alofa mutimuti vale ma lou agalelei; auā talu mai le vavau lava ia.

⁷Aua e te manatua a‘u agasala ina o ou taulealea, ma o‘u solitulafono; a e tusa ma lou alofa ia e manatua mai a‘u, Ieova e, ona o lou agalelei.

⁸O Ieova, e agalelei ma amiotonu ia, o le mea lea na te faasinoina atu ai le ala i tagata agasala.

⁹E ta‘ita‘iina e ia o e agamalu i le faamasinoga; na te a‘oa‘o mai foi i e agamalu i lona ala.

¹⁰O ala uma lava o Ieova, o le alofa ia ma le faamaoni i e ua tausi i lana feagaiga ma ana tulafono.

¹¹Ieova e, ona o lou suafa, ia e faamagalo mai ai la‘u agasala, auā ua tele lava ia.

¹²O ai ea le tagata o lē mata‘u ia Ieova? E faasinoina atu i ai e ia le ala na te filifilia.

¹³E mau o ia i le manuia; o lana fanau foi e fai mo latou le nuu.

¹⁴O loo faaali e Ieova lona finagalo i e matatau ia te ia; na te faailoa atu foi lana feagaiga ia te i latou.

¹⁵O loo faasaga pea lava o‘u mata ia Ieova; auā o ia lava e tatalaina o‘u vae ai le upega.

¹⁶Ia e liuliu alo mai ia te au, ma alofa mai ia te au; auā o a‘u ou te toatasi ma puapuagaina.

¹⁷Ua faateleina puapuaga o lo‘u loto; ia e aveeseina a‘u i mea ou te tiga ai.

¹⁸Ia e silasila mai i lo‘u puapuaga ma lo‘u tiga; ma ia e faamagaloina a‘u agasala uma lava.

¹⁹Ia e silasila i e o ita mai ia te au, auā e toatele i latou; ua latou ‘ino‘ino foi ia te au i le ‘ino‘ino faasaua.

²⁰Ia e leoleo ia te au, ma laveai mai ia te au; aua ne‘i ou mā, auā ou te faatuatua ia te oe.

²¹Ia tausia a‘u e le amio sao ma le amiotonu; auā ou te faatalitali ia te oe.

²²Le Atua e, ia e laveai ia Isaraelu i ona puapuaga uma lava.