Read Samoan Old Version Bible – O LE TUSI PAIA SALAMO, 31 Bible Online

SALAMO, 31 - Samoan Old Version Bible – O LE TUSI PAIA bible

SALAMO, 31

¹Ieova e, ou te faatuatua lava ia te oe; aua ne‘i faamaina a‘u e oo i le faavavau; ia e laveai mai ia te au i lau amiotonu.

²Ia e liliu mai ou fofoga ia te au; ia e vave laveai ia te au; ia fai oe mo‘u papa malosi, o le ‘olo mauga ou te ola ai.

³Auā o oe lava lo‘u papa, ma lo‘u ‘olo; ia e ta‘ita‘i mai ma tausi ia te au ona o lou suafa.

⁴Ia e ave ese ia te au i lea lava upega na latou natia ia maua ai a‘u; auā o oe lava lo‘u malosi.

⁵Ou te tuuina atu lo‘u agaga i lou aao; Ieova e, le Atua faamaoni, ua e togiolaina a‘u.

⁶Ou te ‘ino‘ino i e ua anaana i mea faatauvaa ma le pepelo; a e ou te faatuatua lava ia Ieova.

⁷Ou te fiafia ma ou olioli i lou alofa mai; auā ua e silasila i lo‘u tiga; ua e silafia a‘u ina o puapuagatia.

⁸Ua e le tuuina foi a‘u i le pule a e ita mai ia te au; ua e faatuina o‘u vae i le mea lautele.

⁹Ieova e, ia e alofa mai ia te au, auā ua ou puapuaga; ua fole o‘u mata, atoa ma lo‘u agaga, ma lo‘u manava, i le tiga.

¹⁰Auā ua faauma lo‘u ola i le faanoanoa, ma ou tausaga i le mapuitiga; ua faavaivaiina lo‘u malosi i a‘u agasala, ua gagase foi o‘u ivi.

¹¹Ua faalumaina a‘u e i latou uma o e ita mai ia te au, a e sili lava i latou matou te tuaoi; ua avea a‘u ma faamatau i e sa matou masani; ua sosola ese ia te au o e iloa mai a‘u i fafo.

¹²Ua faagalogaloina a‘u e pei o le ua oti, ua le manatua lava; peiseai a‘u se ipu ua nutililii.

¹³Auā ua ou faalogo i le faaleaga mai e le toatele; ua siosiomia a‘u e le mata‘u, ona ua latou taupulepule faatasi ia te au, ua latou manatu i se togafiti ou te oti ai.

¹⁴A e peitai a‘u nei, ou te faalagolago ia te oe Ieova e, ou te faapea atu, O oe lava lo‘u Atua.

¹⁵O loo i ou aao o‘u aso; ia e laveai mai ia te au ai lima o e ita mai, ma e ua tuliloa mai ia te au.

¹⁶Ia malamalama mai ou fofoga i lau auauna; ia e faaola mai ia te au ona o lou alofa.

¹⁷Ieova e, aua ne‘i famaina lava a‘u, auā ou te valaau ia te oe; ia faamaina o e fai amio leaga, ia faalologo i latou i seoli.

¹⁸Ia faalologo laugutu pepelo; o e tautala faasiasia, ma le faamaualuga, ma le ‘ino‘ino i le tagata amiotonu.

¹⁹Ua tele lava lou agalelei ua teua e oe mo e ua matatau ia te oe, ua e faia i luma o le fanau a tagata mo e faatuatua ia te oe.

²⁰E natia i latou e oe i le mea lilo i ou luma, ia le oo ia te i latou taupulepulega a tagata; e te faalilo ia te i latou i lou fale apitaga, ina ia le oo ai le finauga a laulaufaiva.

²¹Faafetai ia Ieova, auā na ia faasilisili lona alofa ia te au i le aai nofo ‘olo.

²²O a‘u foi na ou fai atu i lo‘u polepole vale, Ua faateaina a‘u ai ou luma; a e peitai ua e faafofoga mai i le leo o la‘u aioi atu i lo‘u alaga atu ia te oe.

²³O outou na uma lava o ona tagata amio Atua, ia outou alolofa atu ia Ieova; e leoleoina e Ieova o e faamaoni, a e matuā tauia e ia o e amio faamaualuga.

²⁴O outou na uma lava, o e faamoemoe ia Ieova, ina faalototetele ia; e faamalolosia foi e ia o outou loto.