Read Samoan Old Version Bible – O LE TUSI PAIA SALAMO, 33 Bible Online

SALAMO, 33 - Samoan Old Version Bible – O LE TUSI PAIA bible

SALAMO, 33

¹Ina pepese ia ia Ieova o outou o e amiotonu; e ono lava i e ua amio sa‘o ona vivii atu.

²Ina vivii atu ia ia Ieova i le kitara; ia fai pesega ia te ia i le napeli e sefulu ona manoa.

³Ina pepese atu ia ia te ia i le pese fou; ia outou ta malie ma le leo fiafia.

⁴Auā e sa‘o lava le afioga a Ieova; ua faia foi e ia ana galuega uma i le faamaoni.

⁵E fiafia o ia i le amiotonu ma le faamasinoga; ua tumu le lalolagi i le alofa o Ieova.

⁶O le afioga a Ieova na faia ai le lagi; ma ‘au uma o i ai, na faia i le mānava a lona fofoga.

⁷Ua faapotopotoina e ia o suāsami e pei se mea maupuepue; ua tuuina atu e ia o le moana i fale oloa.

⁸Ia matatau ia Ieova atoa uma le lalolagi; ia fefefe lava ia te ia o outou uma o e nonofo i le atu laulau.

⁹Auā o ia lava na fetalai ane, ona i ai lava lea; o ia na tŭlei mai lana afioga, ona tu mai lava lea.

¹⁰E faaleaogaina e Ieova o taupulepulega o nuu ese; e faaiuvaleina e ia o mafaufauga a tagata.

¹¹E tu le pule a Ieova e oo i le faavavau; o mafaufauga a lona finagalo e a le tu a le tu lava.

¹²Amuia le nuu ua Atua ia Ieova, o le nuu ua filifilia e ia e fai mona lava tofi.

¹³O loo silasila mai Ieova mai le lagi; e silafia e ia le fanau uma a tagata.

¹⁴O loo matuā silasila mai o ia mai le mea o loo afio ai o ia ia i latou uma o e nonofo i le lalolagi.

¹⁵E faia lava e ia o latou loto uma lava; o loo matuā silafia e ia a latou galuega uma.

¹⁶E le faaolaina se tupu i le toatele o ana ‘au; e le laveaiina le tagata fitafita i lona malosi tele.

¹⁷E le aoga le faaola a le solofanua; e leai foi sē laveaiina e ia i lona malosi tele.

¹⁸Faauta, o loo silasila Ieova i e matatau ia te ia, o e faamoemoe i lona alofa;

¹⁹ina ia laveai ia te i latou ai le oti, ina ia ola foi i latou i le oge.

²⁰O loo faatalitali o tatou loto ia Ieova; o ia lava lo tatou fesoasoani ma lo tatou talita.

²¹Auā o loo fiafia ia te ia o tatou loto; auā ua tatou faatuatua i lona suafa paia.

²²Ieova e, ia i luga ia te i matou lou alofa, e pei ona matou faamoemoe ia te oe.